هه‌رئێك خه‌ریكى خوه‌یه‌ و ئه‌م خه‌ریكى چنه‌؟

فاضل عمر

 

من دڤێت هنده‌ك رێزان لدۆر ره‌وشا ده‌وله‌تێن كوردستان داگیركرى و یا كوردان بنڤێسم.. و پاشى پرسیاره‌كا له‌وچه‌ بكه‌م. پێشوه‌خت من دڤێت داخوازا جوامێریا هه‌وه‌ بكه‌م چونكى نه‌دووره‌ هنده‌ك په‌یڤێن بێئه‌ده‌ب بكاربینم.

ئیران، خه‌ریكى خه‌ریتا خوه‌یه‌ و كڤانێ خوه‌ (كڤانێ شیعى) نێزیكى ته‌مامكرنێ كریه.. هه‌لبه‌ت،‌ ژبلى ده‌ڤه‌را هێزا پارتى، وه‌كى دى كڤان گه‌ره‌نتى بوویه‌. هه‌ڤبه‌ندیێن خوه‌ دگه‌ل رۆژاڤا خوه‌شكرینه‌ و نێزیكه‌، گه‌رمتر دێ هێته‌ ناڤ بازاڕێ نه‌فتێ و تێهنا ئه‌تۆمى. ل ئه‌ڤى وه‌ختى، باسێ رامالینا هه‌رێما كوردستانێ دكه‌ت، داكو دگه‌ل ئیراقێ و سۆریێ و لوبنانێ ئیمپراتۆریه‌كا سه‌رانسه‌رى دامه‌زرینت.

تركیا، پشتى ئاكپارتى ژ خه‌ونا سولتانێ ئیمپراتۆریا ئۆسمانى هوشیاربووى، خه‌ریكه‌ دگه‌ل رۆسان و جهوویان پێكبهێت داكو رێ لبه‌ر هه‌رێما كوردستانێ و رۆژاڤا و هێزێن باكۆرى بگرت.. دبت دگه‌ل سعۆدیێ و خه‌لیجى ژى پێكبهێت و به‌رماییكێن داعشیان بده‌ته‌ جه‌بهه‌ت ئه‌لنوسره‌ و ناڤمالیا خوه‌ پاكژبكه‌ت. نه‌خاسمه‌ پشتى قومارا په‌كه‌كێ بۆ ئیرانێ كرى، مه‌زنترین تراجیدیا ل باكۆرێ كوردستانێ ژێ په‌یدابووى و ره‌نگه‌ چاڤنقاندنه‌كا جیهانى ل په‌ى هاتى.. تركیا نه‌چار بوو یان ژبه‌ر ده‌نگ ژێ نه‌ئینانێ هاته‌ نه‌چاركرن، چاڤگێڕانه‌كێ ل سیاسه‌تا خوه‌ بكه‌ت.

ئیراقا مریمرى یان بێژین نه‌مرى نه‌ماى ژى، وه‌ختێ ده‌لیڤه‌ هه‌بت، دربێ خوه‌ دوه‌شینت.. گێله‌شۆكا مللى دهنێرته‌ ده‌ڤه‌رێن سنۆرى، به‌هرا هه‌رێمێ ژ داهاتىیێ ئیراقێ و چه‌كى ناده‌ت، هنده‌ك كوردان چه‌كدار دكه‌ت، و یا ژ هه‌میێ خوه‌شتر و سه‌یرتر ئه‌وه‌، هێشتا كورد هه‌نه‌ دچنه‌ به‌غدا، به‌لكو‌ تشته‌ك هه‌بت بئالیسن!

ئه‌ره‌بێن سونه‌، یێن داعشى و نه‌داعشى، په‌یمان دگه‌ل داعشێ گرێدان و پشتى ده‌ڤه‌رێن خوه‌ رزگاركرین، ئێكه‌مین بزاڤا كرین، بزاڤا ستاندنا پایته‌ختا ئیراقێ نه‌بوو، به‌لكو بزاڤا داگیركرنا كوردستانێ بوو!

ل ئه‌ڤێ ره‌وشێ، كورد خه‌ریكى چنه‌؟

  1. هه‌مى لسه‌ر هێزێن هه‌رێمى و جیهانى دابه‌شبووینه‌.
  2. ل ناڤخوه‌، هه‌ر هنده‌كان په‌یمانه‌ك دژى یێن دى گرێدایه‌.
  3. هنده‌ك دژى به‌غدا راوه‌ستاینه‌، هنده‌ك ژ كه‌ربان دچنه‌ به‌غدا.
  4. هنده‌ك دژى ئیرانێنه‌، هنده‌ك هه‌ڤپه‌یمانن.
  5. هنده‌ك سه‌ربخوه‌ییێ و ده‌وله‌تێ دخوازن، هنده‌ك دبێژن هێشتا زووه‌.
  6. پارتێن ماركسى دڤێن ئابۆرا كوردستانێ بێخنه‌ ده‌ست به‌غدا و یێن ترادسیۆنال دڤێن سه‌ربخوه‌ییا ئابۆرى هه‌بت!
  7. شه‌ڕێ داعشێ، ئابلۆقا ئیراقێ، مه‌لیۆنه‌ك و هه‌شتسه‌د هه‌زار په‌نابه‌ر، مووچه‌یێن گیرۆ و نیڤه‌ڕۆ، بێكارى و بێبه‌رهه‌مى.. ل ئه‌ڤى وه‌ختى، باسێ هه‌لبژارتنان دهێته‌كرن. ب دیتنا من، نهۆ، هه‌لبژارتن خوه‌ش ده‌لیڤه‌یه‌، به‌س بۆ تشته‌كى، ئه‌و ژى ئه‌وه‌؛ هنده‌ك پاره‌ (ژ ده‌رڤه)‌ بۆ پارت و گرۆپێن سیاسى بهێن.
  8. هێزه‌ك نه‌فتێ د تركیا را دفرۆشت، یا دى بزاڤێ دكه‌ت د ئیرانێ را بفرۆشت.

ئه‌ڤه‌ ره‌وشا كوردانه‌ و ئه‌و ره‌وشا هه‌ڤڕك و دژمنێن وانه‌.

ل ئه‌ڤى دیمه‌نێ گشتى ئه‌ز دبینم؛ ل رۆژهه‌لاتا ناڤین پێناسا هه‌مى ده‌وله‌تان و ئارمانجێن وان، ئاشكرانه‌: ئیرانا فارسان و شیعه‌یان، ئیراقا ئه‌ره‌بان و شیعه‌یان، تركیا تركان و سونه‌یان.. من دڤێیا بزانم؛ كوردستان چىیه‌ و یا كێیه‌؟ پرسیارێ، دێ پچه‌كێ رۆهنتر لێ كه‌م: وه‌كى وه‌لاته‌ك هه‌یه‌ ب ناڤێ كوردستان و یا كوردانه‌ وه‌كو ئه‌م دبێژین، بۆچى بێ پێناسه‌ و بۆچى به‌ربازاڕ دكه‌ین؟

 

بابه‌تێن ب ڤێ مژارێ ڤه‌ گرێدای