31ێ شانازیێ و 16ێ شه‌رمه‌زاریێ

 كارزان فه‌قى

به‌رى ئه‌م باش ژ خیانه‌تێ بگه‌هین، گرنگه‌ جاره‌كێ دوور ژ ئایدۆلۆژیا حزبا خوه‌ بریاری ل سه‌ر دوو روودانان بده‌ین، دوو روودان كو دێ به‌شه‌ك بن ژ دیرۆكا مه‌ و هه‌ر سال دێ ل وێ رۆژێ گه‌نگه‌شه‌یێن زۆر ل سه‌ر دهێنه‌ كرن‌، 31ى ئاب و 16ى ئكتۆبه‌ر، هه‌ر ئالییه‌ك ئالیێ دى ب خیانه‌تێ تاوانبار دكه‌ت، لێ ژبۆ من هه‌ر دوو رودان خیانه‌ت نینه‌ و ده‌رئه‌نجامێ وان رودانان گرنگن، ل ده‌ف من زێره‌كى و لێزانیه‌ حزبه‌ك بكاریت سوپایێ سه‌دامى بۆ خوه‌ بكه‌ته‌ جاش و (كونا مشكى) ژ بۆ ئیران و دارده‌ستێن وێ ل هه‌ولێرێ بكه‌ته‌  قه‌یسه‌رى، شانازیا پارتى ل 31ى ئاب ب تنێ ئه‌و نینه‌ كو هه‌ولێر ده‌ستڤه‌ ئینا، به‌لكو ژلایه‌كێ ڤه‌ بۆ جارا یه‌كه‌م عه‌ره‌ب بۆ كوردانه بوونه‌ جاش و سوپایێ ئیرانێ و ده‌رده‌ستێ وێ ژ هه‌ولێرێ ده‌ركرن، ئه‌گه‌ر ئه‌ڤه‌ ژ بۆ ئێكه‌تى روودانه‌كا گه‌له‌كه‌ نه‌خوه‌ش و كرێت ژى بیت، لێ بۆ كورد و هه‌ولێرێ و پارتى جهێ شانازیێ یه‌ و بوویه‌ ئه‌گه‌رێ ڤه‌ژاندنا هه‌ولێرێ، نه‌ ب تنێ ل سه‌ر ئاستێ كوردستانێ، به‌لكو پشتى روودانێن 31ى ئاب هه‌ولێر به‌ره‌ف قۆناغه‌كا دى چوو و  ئه‌و خه‌ونا ئیرانێ بخوه‌ چێكربوو كو برێكا هه‌ژموونا خوه‌ ل هه‌رێما كوردستانێ دێ ڤێ ده‌ڤه‌رێ كۆنترۆل كه‌ت، بجهـ نه‌هات. هه‌ر ل وێ رۆژى ئیدى هه‌رێما كوردستانێ هه‌م ژ روویێ سیاسى و هه‌م ژ روویێ جڤاكى ڤه‌، ژ جڤاكێ عه‌ره‌بى و كاریگه‌ریا ئیرانێ دووركه‌فت و پتر نزیكى ئه‌مریكا و ئه‌وروپا بوو. ژ هه‌موو گرنگتر ژى، ئه‌و ده‌ما ئێكه‌تى و ئیران پێت وان ل سنورێ هه‌ولێرێ نه‌مان، رۆژا پاشتر هه‌ولێر ب تنێ بۆ كوردان ما. كه‌واته‌ ئه‌و پێشكه‌فتنا نها ل هه‌ولێرێ هه‌ى به‌رهه‌مێ 31ى ئاب و ده‌ستهه‌لات و حكمرانیا پارتیه‌، خه‌لكێ هه‌ولێرێ باشتر دزانن جاده‌یێن 100 و 150 مه‌ترى، پاركێن ناڤا هه‌ولێرێ، كۆمپانى و كه‌رتێ گه‌شت و گۆزار ژ كه‌نگیڤه‌ ده‌ستپێكر، بۆ پارتى گرنگ‌ نینه‌ ئێكه‌تییه‌ك یان گۆرانه‌ك په‌سنا 31ى ئاب بكه‌ت، به‌لكو ده‌رئه‌نجامێن 31ى ئاب چ بوون و گۆتنا ئه‌ندامێن پارتى و خه‌لكێ هه‌لێرێ گرنگه‌.

پارتى ل هه‌ولێرێ تشته‌ك ب ده‌ست خست، كه‌واته‌ دكاریت به‌هانه‌یه‌ك هه‌بیت كو بۆچى 31ى ئاب روودا، لێ ده‌ما حزبه‌ك ل 16ى ئكتۆبه‌رێ ب ده‌ست ڤالایی ژ كه‌ركووكێ ده‌ركه‌ڤیت؛ ئه‌و شه‌رمزارى یه‌، ب تنێ ده‌ركه‌فتن پیچه‌كێ ریك دچیتێ، لێ بۆ رۆژا دووڤدا ل كه‌ركووكێ ببیه‌ قه‌چاخ و ب نهێنێ رێكخستنا خوه‌ ل كه‌ركووكێ بكه‌ى، ئه‌ڤه‌ ڤه‌گه‌راندنا كوردانه‌ بۆ به‌رى سالێن نۆتان و سه‌رده‌مێ رێكخستنا نهێنێ. كه‌واته‌ ل 31ى ئاب هه‌ولێرێ بۆ پارتى ماڤه‌، لێ ل 16ى ئكتۆبه‌رێ كه‌ركووك بوو ملكێ حه‌سه‌ن پلایس، ئێكه‌تى ل كه‌ركوكێ خوه‌دان مال بوو و پۆستێ پارێزگه‌رێ كه‌ركووكێ و گه‌له‌ك ژ ئه‌ندامێن جڤاتا پارێزگه‌هێ ژ ده‌ست وێ بوون، هه‌روه‌سا پۆسـێ پتریا رێڤه‌به‌رێن كه‌ركووكێ ئێكه‌تى بوون، لێ سه‌یر ئه‌وه‌ نها ئێكه‌تى ب نڤێساره‌كا فه‌رمى ل پارێزگارێ نها یێ كه‌ركووكێ خواستیه‌ موله‌تێ بده‌نه‌ وان كو 6 زێره‌ڤانێن وان چه‌كى هه‌لگرن بۆ پاراستنا مه‌لبه‌ندێ ئێكه‌تیێ، لێ پشتى 31ى ئاب پارتى ل هه‌ولێرێ خوه‌دان ماله‌ و ئه‌و موله‌تێ دده‌ته‌ حزبێن دى بۆ چه‌ك هه‌لگرتنێ و پاراستنا مه‌لبه‌ندێن خوه‌، ل 16ى ئكتۆبه‌رێ حه‌سه‌ن پلایس بو خوه‌دانێ قودسا كوردا و په‌یكه‌رێ مام جه‌لالێ تاله‌بانى ل كه‌ركووكێ راكر، لێ ل 31ى ئاب هه‌ولێر بوویه‌ پایته‌خته‌كێ ناڤدارێ جیهانێ و فرۆكخانا وێ ژى ترافیكا هاتن و چوونا سیاسه‌تڤان و سه‌رۆكێن وه‌لاتانه‌، ل 16ى ئكتۆبه‌رێ سیاسه‌تا ئیرانێ جاردن ب سه‌ر ئێكه‌تى ب سه‌ر كه‌فت و كه‌ركووك ته‌سلیم حه‌شدا شه‌عبی كر و ئێكه‌تى كره‌ قه‌چاخ، لێ ل 31ى ئاب پارتى نه‌هێلا هه‌ژموونا ئیرانێ ب سه‌ر هه‌موو كوردستانێ بهێته‌ سه‌پاندن و ئیران و ئێكه‌تى هه‌تا سه‌رێ سنوران برن. ژ هه‌موو گرنگتر ژى ئه‌وه‌ پارتى ب هه‌موو ئه‌ندامێن مه‌كته‌ب سیاسى و سه‌ركردایه‌تى و خه‌لكێ خوه‌ڤه‌ شانازیێ ب 31ى ئاب و ب ده‌ست خستنا هه‌ولێرێ دكه‌ن، لێ ئێكه‌تى هه‌ر رۆژا پشتى 16ى ئكتۆبه‌رێ كۆسره‌ت ره‌سوول گرۆپێ خیانه‌تا 16ى ئكتۆبه‌رێ ب (كالفامێن ناڤا سیاسه‌تێ) ب ناڤكرن، مه‌لا به‌ختیارى حزبا خوه‌ ژ وى گروپى بێ به‌ریكر، ل داویێ ئه‌و گروپ ب خوه‌ ژى دانپێدان ب شاشیا خوه‌ كرن، دێ وه‌رن‌ ته‌ماشه‌ى هاوكێشه‌یا 31ى ئاب و 16ى ئكتۆبه‌رێ بكه‌ن و پیچه‌كێ دوور ژ حزباتیا خوه‌ بریارێ بده‌ن

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.