چاڤکێن نووسەک و کۆمپیوتەر دبنە ئەگەرێ هشکبوونا چاڤان

چاڤکێن نووسەک و کۆمپیوتەر دبنە ئەگەرێ هشکبوونا چاڤان

وار – دهۆک :

چێدبیت دەمێ مرۆڤ لدەستپێکێ کارێ نڤیسینگەهان دکەت و کۆمپیوتەران بکاردئینیت گەلەکا هێسان بیت و چ ئاریشەیان نەبینیت، لێ ب راستی نە بڤی رەنگییە و گەلەک ئاریشە یێن هەین کو دروست دبن ژ ئەگەرێ کارکرنێ ل نڤیسینگەهان، و ژوان ئاریشەیان ژی ‘’هشکبوونا چاڤان’’ە ئەوا سێیەکا کەسێن ل نڤیسینگەهان کاردکەن ژێ دنالن و ب تایبەتی ژی ئەو کەسێن چاڤکێن نووسک “عدسات لاصقة” بکاردئینن و دەمەکێ درێژ د بوورینن لبەر شاشەیا کۆمپیوتەری.
‘’هشکبوونا چاڤان ‘’ کۆمەکا نەخوەشییانە دروست دبن ژ ئەگەرێ کێمبوونا بڕ و دیسان جۆرێ رۆندکان، ژ بەرکو ئەڤ شلەیە تیڤلەکی دروست دکەت چاڤی دپارێزیت و دبیتە ژێدەرێ خوارنێ بۆ چاڤی.
ژ نیشانێن سەرەکی یێن نەخوەشییا هشکبوونا چاڤان ژی؛ وەکی ماندیبوونا چاڤی دیار دکەت، لێ ب هێسانی مرۆڤ دکاریت راستییا وێ بزانیت و ژوان نیشانان ژی:
گەلەک هشکبوون، کولبوون، سۆتن و هەستکرن ب وەکی تشتەک دناڤا چاڤیدا هەی، گەلەک وەستیان، یان هەستکرن وەک دندکێن خیزی د چاڤیدا، کێمبوونا دیتنێ یان شێلی بوونا دیتنێ، گەلەک هەستیاری ژ رۆناهییێ.
ئەڤ نیشانێن ناڤبری دیار دبن ژ ئەگەرێ روونشتنەکا درێژ بەرامبەر کۆمپیوتەری و بێی بێهنڤەدان، یان کرنا هندەک راهێنانان، کێمبوونا چاڤ نقاندنێ بۆ نیڤا رێژەیا نۆرمال، ئەڤە ژی دێ بیتە ئەگەرێ هشکبوونا قەرەنییا چاڤی، لدەمێ بکار ئینانا لێنسێن چاڤی شلەیێ چاڤی دبیتە هەلم و دەردکەڤیت، دو ئەگەرێن دن ژی یێن هەین دبنە ئەگەرێ هشکبوونێ ئەو ژی هشکبوونا بایێ دناڤا نڤێسینگەهێدا و بایێ ئامیرێن گۆنجاندنا سەقای ئەوێن کاردکەن بێی راوەستیان و دبنە ئەگەرێ کێمبوونا شهێ دناڤ بای دا ب رێژەیا 15ھەتا 20 %.
ژبەر هشکبوونا چاڤان ژی مرۆڤ گەلەک هەست ب وەستیانێ دکەت و هێزا دیتنێ لاوازتر لێ دهێت و دبیت ببیتە ئەگەرێ تێکچوونا چاڤی ژی ب تەڤاڤی.
دا کو مرۆڤ نەهێتە هنگافتن ب نەخوەشییا ناڤبری ژی، پێدڤییە مرۆڤ لدووڤ رۆلێن خوەپاراستنێ بچیت ئەوێن کو دبێژن بێهنڤەدان دناڤبەرا دەمەکی و دەمەکێ دن ئانکو هەر ساتەکێ یان دو ساتان جارەکێ، بکارئینانا ئامیرێن شهبوونا بای و ئەنجامدانا راهێنانێن چاڤان ژ دەمەکی بۆ ئێکێ دن، و هەروەسا بکارئینانا دلۆپێن چاڤی یێن دبنە ئەگەرێ تەربوونا چاڤی بۆ هەیامەکا درێژ.
ل داویێ ژی ئەم دکارین بێژین بتنێ دووڤچوونا خال و رۆلێن ناڤبری تێرا وێ یەکێ هەنە کو خوە بپارێزین ژ نەخوەشییا هشکبوونا چاڤان.

بابه‌تێن ب ڤێ مژارێ ڤه‌ گرێدای