پێل – بۆتانی نە زمانێ قۆرەیشیانە گەلۆ ئەم چ بکین؟!

زنارێ عەدنانێ مەلەی

رێڤەبەری یا چالاکی یێن وێژەیی بەری ھەیامەکێ کۆمبوونەک ل ھۆلا کۆنگرەیان یا زانینگەھا دھۆکێ چێکر. ئەو کۆمبوون ل سەر زمانی بوو. ئەز ژی ل وێ دەرێ بەرھەڤ بووبووم. گەلەک کەس ژ زانینگەھان ئوو ژ دەزگەھێن راگەھاندنێ ژی ل وێ دەرێ بەرھەڤ بووبوون. ھەر یەک ژ وان ل دوو دیتن ئوو زانینا خوە بەحسا ئارێشە یێن مشە یێن زمانی ل دھۆکێ کر. لێ تشتێ غەریب ژبۆ من ئەو بوو کۆ مەیلداری یا دەڤەرێ ل نک پررانی یا وان ھەبوو. ل وێ کۆمبوونێ، من تەنێ سەیدایێ ھزرڤان دیت کۆ بێ مەیلداری یا دەڤەرێ بەحسا زمانی دکر. وی ئاماژە ب وێ راستیێ ددا کۆ ھەمی دەڤۆکێن کرمانجیێ نێزیکی ھەڤن. لێ ھندەک ژ وان وەکی کێماسیەکێ ئوو خەتەرەکێ ددیت کۆ بادینی خوە نێزیکی دەڤۆکێن دی یێن کرمانجیێ بکت. ھندەک ژ وان ژی بەحسا وێ یەکێ دکر کۆ بادینی ژ سۆرانیێ ئوو بۆتانیێ کێمتر نینە. ژبۆ من تشتەکێ گەلەک غەریب بوو کۆ وان بادینی ئوو بۆتانی ژی وەکی زاراڤا دحەسباندن. ئینان ئوو ھەڤبەرکرنا ناڤێ بادینیێ د گەل سۆرانیێ ئوو بۆتانیێ وێ مانایێ دگەھینت کۆ ئەو بادینیێ ئوو بۆتانیێ ژی وەکی زاراڤا دبینن. لێ بادینی ئوو بۆتانی دو دەڤۆکێن زاراڤا یا کرمانجیێ نە. سەیدا یێ من, دکتۆر رەشیدێ فندی، ژی گەلەک دوپاتی ل سەر بادینیێ کر. ل دوو ئاخڤتنا وی، ئەو دبینت کۆ ھەما بادینی ژ ھەمی دەڤۆک ئوو زاراڤا یێن دی درستترە ئوو دبێ ھەمی کورد وەکی بادینی یا مە بنڤیسن ئوو بخوینن. وی د ناڤ ئاخڤتنا خوە دا بەحسا رۆژھەلاتناسەکی کر. ئەو رۆژھەلاتناس دبێژت کۆ کوردی یا درست ھەکاری یا ژێری ئانکۆ بادینی یە. دکتۆری بەحسا وان ئالیان ژی کر یێن کۆ بۆتانیێ ب سەر بادینیێ دئێخن ئوو گۆت: “ژ خوە بۆتانی زمانێ قۆرەیشیان نینە!”. ھەلبەت بۆتانی زمانێ قۆرەیشیان نینە. لێ ھەروەسا بادینی ئوو ھەکاری ژی نە زمانێن قۆرەیشیانن. ھەکەر ئەم ب ئاوایەکێ زانستی ل وێ بنێرین، دێ ببینین کۆ ھەمی دەڤۆکێن کرمانجیێ نێزیکی ھەڤن. ئەز دێ گەلەک جاران د ڤێ قونجکێ دا بەحسا ڤێ یەکێ بکم. لێ ئەز دێ ئەڤرۆ تەنێ نموونەیەکێ بدم وە. دەما کرمانجێن دی دئێن دھۆکێ، بێ ئارێشە ب مە را دئاخڤن. ئەم ژی بێ ئارێشە بەرسڤا وان ددین. لێ د ناڤبەرا مە ئوو سۆرانان دا ھندەک زەحمەتە. ئەو شەش مەهـ بوون ئەز ل گوندێن دۆسکی ئوو بەرواریان دگەریام. من ھزر ئوو ھشێن خوە باش بەردان سەر ئاخڤتنا وان. من دیت کۆ زمانێ وان ھێشتا بتر نێزیکی یێ کرمانجێن دی یە. ئەڤ دەڤۆکا ناڤەندا دھۆکێ گەلەک کەڤتیە بن باندۆرا عەرەبیێ ئوو سۆرانیێ. ھەکەر ئەم گوھداری یا سترانێن گەلێری یێن دھۆکێ بکین، دێ ببینین کۆ دەڤۆکا نھا یا دھۆکێ ھندەک ھاتیە گوھەرتن. ھەروەسا ھەکەر ئەم ل کلاسیکێن وەکی بەکر بەگێ ئەرزی ژی کۆ ژ گوندەکێ دھۆکێ بوو ڤەبگەرین، دێ ببینین کۆ بادینی یا بەری پێنجی ھەتا سەد سالان ھێشتا بتر نێزیکی دەڤۆکێن دی یێن کرمانجیێ بوو. ئەز ب باوەرم کۆ ئەو رۆژھەلاتناس ژی ھەر یێ وان سەردەمان بوویە. ئەنجام؛ ئەم دکارین ب کرمانجیەکا پیڤانکی بنڤیسین ئوو ھەمی کرمانج دێ وێ بفەھمینن. دەڤۆکێن کرمانجیێ وەکی یەکن. جداھی یێن بچووکێن ناڤبەرا وان بێ چارە نینن. دبێ ئەم ل دوو راستی ئوو درستی یا وان جداھیان بگەرین. ژ خوە ھەکەر ئەو ھەردو درست بن, دبێ ئەم وان ھەردویان ب کار بئینین. ھندەک جاران ژی ب-ھەڤ-کرن رۆلێ خوە دگێرت.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.