كورد و تاقیكرنا دوازدێ‌ ئایارێ‌

سالح زێباری

ژ خاسیه‌تێن هه‌فپشكێن هه‌ری گرنگ و گشتی ل ده‌می خاندنا دیروكا كوردان یا كه‌ڤن و ناڤین و نوی و هه‌فچه‌رخ و هه‌تا ریدانێن ڤێ‌ داویێ‌ ژی , نه‌بونا ئێك رێزی بویه‌ دناڤ مالا كوردی دا . ده‌هان شوره‌ش و سه‌رهلدان و بزاڤێن كوردی ب سه‌ركردێن خوه‌ڤه‌ ژناڤچونه‌ هه‌ر ژ به‌ر ڤی فاكته‌ری. نه‌بونا ئێك رێزیێ‌ ژی بو چه‌ندین ئه‌گه‌ران دزڤریت كو دڤێ‌ گوتارێ‌ دا دێ‌ به‌حس ژ هه‌لبژاردنێن (12 ئایارێ‌) كه‌ین كو تنێ‌ هه‌یڤه‌ك بو ئه‌نجامدانێ‌ وێ‌ ماینه‌.ئه‌رێ‌ ئه‌ڤ هه‌لبژاردنه‌ چه‌ند دێ‌ كو كوردان ل سه‌ر ئێك مێزادانوستاندنێ‌ كومكه‌ت؟ ئه‌رێ‌ كورد دێ‌ چه‌ند شێتن وی پێگه‌هێ‌ بهێز یێ‌ به‌ری شازدێ‌ ئوكتوبه‌رێ‌ زڤرینیت؟ رولێ‌ حكومه‌تا هه‌رێما كوردستانێ‌ ل پاراستنا ئارامی و پێكڤه‌ژیان و جوداهیێن هزری و حزبی دڤێ‌ كڤانێ‌ دێ‌ چاوا بیت ؟
ب ریدانێن شازدێ‌ ئوكتوبه‌رێ‌ ناڤ مالا كوردی ب راده‌كێ‌ تێكچو هه‌می ئالی ل سه‌ر هندێ‌ رێككه‌فت بون كو رێكنه‌كه‌ڤن و دژاتیا ئێك دوو بكه‌ن! ل ده‌مه‌كێ‌ دا كوردان مه‌زنترین كاره‌سات ب سه‌ری هاتبو ژ ئه‌نجامێ‌ پیلانه‌كا نافخوی و هه‌رێمی و نێڤده‌وله‌تی. له‌وما فه‌ره‌ پارتێن كوردستانی ب گیانه‌كێ‌ نه‌ته‌وه‌ی و نیشتیمانی ئێك دوو قه‌بول بكه‌ن و هه‌می پێكولا وان ئه‌و بیت كو بشێن ئه‌و سنورێن ب خوینێ‌ هاتینه‌ كێشان بێنه‌ڤ زڤراندن ب ده‌نگدان و روحا كورداتیێ‌ كو ل وان ده‌ڤه‌ران ژ ئه‌گه‌رێ‌ خیانه‌تێ‌ هاتبو دیركرن. ئه‌ڤ چه‌نده‌ ژی ب وێ‌ ئێكێ‌ دئێته‌ مه‌یدانێ‌ ده‌مێ‌ هه‌می ئالیێن كوردستانی ل ده‌مێ‌ بانگه‌شه‌یا هه‌لبژاردنان بهایێن نه‌ته‌وه‌ی بپارێزن و سنورێن ئاسایشا نیشتیمانی نه‌هێنه‌ بن پێكرن بو مه‌ره‌مێن تایبه‌ت و حزبی.
كورد پشتی كه‌فتنا سه‌دامێ‌ دكتاتور ب سیاسی و سه‌ربازی و دبلوماسی بونه‌ به‌رێ‌ بونیاتی یێ‌ عیراقا نوی كو جهێ‌ داخازا هه‌می تاكه‌كێ‌ عیراقی بو ب هیڤیێن خوه‌یێن ساده‌ بگه‌هیت , به‌لێ‌ ئه‌و هه‌می هه‌ڤی بونه‌ شه‌رێ‌ نافخوی و مالوێرانی . ب درێژاهیا پتر ژ ده‌ه سالان رولێ‌ كوردان یێ‌ میحوه‌ری بو و یاریزانێن هژماره‌ ئێك بون ل پرانیا جاران دپروسێسا سیاسی ل به‌غدا, به‌لێ‌ پشتی كو سه‌ركردێن عیراقێ‌ پێكولا لاوازكرن و نه‌هێلانا كیانێ‌ سیاسی و ده‌ستوری یێ‌ كوردستانێ‌ دای و ده‌ستور و پره‌نسیپێ‌ ته‌وافقێ‌ بنپێكری, كورد به‌ره‌ف پروسه‌كا دیموكراسی چون ئه‌نجامدا گه‌لی سه‌ربه‌خوی هه‌لبژارد ل ئه‌یلولا چوی د ریفراندومێ‌ دا . به‌لێ‌ خیانه‌ت و دوژمناتیا گه‌لێن ده‌ڤه‌رێ‌ بو دوزا كوردی و گلوپێ‌ كه‌سكێ‌ روژئاڤایێ‌ شازدێ‌ ئوكتوبه‌رێ‌ بدیف دا هات و پێگه‌هێ‌ بهێزێ‌ هه‌رێما كوردستانێ‌ زور بێهێز بو , به‌لێ‌ ب پێكولێن سه‌ركه‌فتیانه‌یێن نێچیرڤان بارزانی سه‌روكێ‌ حكومه‌تا هه‌رێما كوردستانێ‌ كار هاته‌ كرن كو ئیدی عیراق ل سنورێن سزادان و نه‌هێلانا كوردستانێ‌ ب راوه‌ستیێت و ده‌ست ب دانوستاندنا بێته‌ كرن و ئه‌نجامێن باش ب وان پێكولان ڤه‌ هات وه‌ك دیار. نها ژیب ئێك رێزی و ته‌بای و دیركه‌فتن ژ توندوتیژی و ئێك دوو ره‌تكرنێ‌ دێ‌ گه‌هینه‌ وی ده‌رئه‌نجامی كو ستراتیجه‌ك هه‌فپشك هه‌بیت بو كوردستانێ‌ ل سالێن بێت , ئه‌ڤ چه‌نده‌ ژی ل هه‌لبژاردنێن (12ئایارێ‌) دیار دبیت.
حكومه‌تا هه‌رێما كوردستانێ‌ دنها دا وه‌ك تاكه‌ نونه‌رێ‌ كوردستانیان ئه‌ركه‌ كو پلان هه‌بیت بو پاراستنا ڤێ‌ پروسا گرنگ و سه‌رئێخستنا وێ‌ بو هندێ‌ نونه‌رێن جیهانێ‌ هه‌می وێ‌ راستیێ‌ بزانن كو كوردستان دێ‌ زڤریت بو سه‌ر پێی خوه‌ و ئه‌و ریدانێن ڤێ‌ داویێ‌ دێ‌ هه‌می بنه‌ وانه‌ بو دیروكێ‌.چه‌ندین جاران ژی ژ ئالیێ‌ سه‌روكێ‌ حكومه‌تێ‌ دووپاتی ل سه‌ر پاراستنا ئێك رێزیێ‌ هاتیه‌كرن وه‌ك بنیاتێ‌ سه‌ركه‌فتن و بهێزكه‌فتنێ‌.
فه‌ره‌ هه‌می ئالیێن كوردستانی ل ئاستێ‌ به‌رپرسیارێ‌ دا بن ل ده‌مێ‌ بانگه‌شه‌یا هه‌لبژاردنان و سنورێن ئاسایشا نه‌ته‌وه‌ی و نیشتیمانی بپارێزن و ئیدی وان روژێن كو كورد ل خیانه‌تێ‌ توره‌ دبو و دگریا ب پروسه‌كا ئازادانه‌ و پاراستنا ئێك رێزیا ناڤ مالا كوردیقه‌ره‌بو بكه‌ن. پێگه‌هێ‌ كوردان یێ‌ ب هێز ب ئه‌نجامدانا پروسه‌كا بێ‌ ئاریشه‌ دایه‌. قوناغا مه‌ترسیدار ل سه‌ر كوردستانێ‌ ده‌رباز بویه‌ و نها قوناغا ڤه‌گه‌ریانا هه‌می وێ‌ شكو و ئاخ و خوینێ‌ یه‌ كو كوردان ل چه‌ندین سالێن چوی بو سه‌ربه‌خویی و ئازادیێ‌ ژ ده‌ست دا . قوناغا ڤه‌گه‌ریانا پێگه‌هێ‌ كوردستانێ‌ یێ‌ بهێز ل حكومه‌تێ‌ ب سه‌ركه‌فتی ده‌ربازبویه‌ ب هه‌می وان پێكولێن سه‌روكێ‌ حكومه‌تێ‌ ده‌مێ‌ شیای هه‌می ئالیێن نافخوی و هه‌رێمی و نێڤده‌وله‌تی بو ئالیێ‌ خوه‌ رابكێشیت و شیا دانوستاندن و دبلوماسیه‌ت و چه‌ند كارێن دیتر ئه‌جامبده‌ت كو شیایه‌ خه‌لكی ب پروسه‌كا ئاشتیێ‌ بگه‌هینیته‌ ڤێ‌ قوناغێ‌ . ئیدی رولێ‌ پارتێن سیاسی دئێت به‌لێ‌ ب ستراتیجه‌ك نوی نه‌ته‌وه‌ی و نیشتیمانی و كوردستانی كو لادان لێ‌ خیانه‌ت بیت.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.