كه‌ڤرێ سیزیفى و ده‌وله‌تا كوردى!

ته‌حسین ناڤشكى

به‌رى ب ناڤ ناڤه‌رۆكا بابه‌تیڤه‌ بچین، باشتره‌ ئه‌م ئاماژه‌یێ ب پۆخته‌یێ ئه‌فسانه‌یا ((سیزیفى)) بده‌ین.. گۆره‌ى پێزانێن من ئه‌فسانه‌یا ((سیزیفى)) یان ((سیسیفۆس)) ژ ئه‌فسانه‌یێن گریكییه‌ و قاره‌مانێ وێ بێنرخترین قاره‌مانێ ئه‌فسانه‌یێن گریكییه‌. نڤیسه‌رێ هه‌بوونگه‌ریێ ((ئه‌لبیركامۆ))ى د گۆتاره‌كا خوه‌ دا، مژارێ ڤێ كه‌سۆكییا ئه‌فسانه‌یى د فه‌لسه‌فه‌یا مرنێ دا، بۆ بێهووده‌یا ژیانا مرۆڤى د گه‌ردۆنێ دا زیندیكرییه‌. ((سیزیف یان سیسیفۆس، پشتى مرى، شیا فێلبازییه‌كێ ل خوداوه‌ندێ مرنێ تاناتۆسى بكه‌ت و كه‌ربا خوداوه‌ندێ خوداوه‌ندان زیۆسى ڤه‌بكه‌ت؛ پشتى خوداوه‌ندێ مرنێ ب وێ فڵبازیێ ئه‌و ژ جیهانا مرنێ زڤڕاندى، زیۆسى وێ گاڤێ سیزیف سزا دا كو ئه‌و كه‌ڤره‌كى مه‌زن ژ بنێ گه‌لى هه‌لگرت و ببته‌ سه‌رێ چیاى و گرێل بكه‌ت و جاره‌كا دى دوباره‌ و دوباره‌ وه‌ها بكه‌ت؛ هه‌تا هه‌تا یێ لسه‌ر وێ ئه‌شكه‌نجه‌دانێ به‌رده‌وامبت))! هه‌ژییه ‌بێژین كو پشتى بۆهرینا نێزیكى سێ هزار سالان ژ ڤه‌گێڕانا ڤێ ئه‌فسانه‌یێ؛ نوكه‌ كه‌سۆكییا ((سیزیفێ)) گریكى بوویه‌ سیمبۆلا ئه‌شكه‌نجه‌دانا هه‌روهه‌رى د ره‌وشه‌نبیرییا گه‌لان دا! هه‌ر وه‌ك مه‌ لسه‌رى ئاماژه‌دایێ كو ((ئه‌لبیر كامۆى)) گۆره‌ى تێگه‌هێ فه‌لسه‌فه‌یا هه‌بوونگه‌رییا پووچ و بێهۆده‌، ئه‌ڤ چیڤانۆكا تژى فه‌لسه‌فه‌‌ د گۆتاره‌كا خوه‌ یا ناڤدار دا ته‌وزیفكرییه‌ و كرییه‌ سه‌رناڤێ پرتووكه‌كا خوه‌ ب ناڤێ ((ئه‌فسانه‌یا سیزیفى)). ئه‌ز دێ د ڤێ گۆتارێ دا هه‌ولدم كو ئه‌ز ژى مفاى ژ كاكلا ڤێ ئه‌فسانه‌یێ ببینم و هه‌ڤبه‌رى نه‌بوونا ده‌وله‌تا كوردى بكه‌م! راسته‌ ((كامۆ))ى ب گۆشه‌یێ كامیره‌یه‌ك ڤه‌كرى ته‌ماشه‌ى فه‌لسه‌فه‌یا ڤێ ئه‌فسانه‌یێ كرییه‌، لێ ئه‌ز د هه‌مان گۆشه‌یێ دا دێ رۆناهیێ ئێخمه‌ سه‌ر ره‌وشا كێشه‌یا كوردى كو تنێ هه‌كه‌ ئه‌م د ڤان 100 سالێن ڤێ دوماهیێ دا ته‌ماشه‌ بكه‌ین كو پرانییا گه‌لێن جیهانێ یێن كو گه‌له‌ك و گه‌له‌ك ژ نه‌ته‌وه‌یا كورد ئاكنجیێن وان وه‌لاتان و رۆپانێن ئاخا وان كێمتر ژ رۆپانێ وه‌لاتێ كوردان بووینه‌ ده‌وله‌ت و خودان كیانێن سه‌ربه‌خوه‌، لێ كورد هه‌ر ل رێزا بنى ماینه‌! راسته‌ ئه‌و خه‌بات و به‌رخوه‌دانا گه‌لێ كورد د رێژییا دیرۆكێ دا كرى، ره‌نگه‌ كێم گه‌لێن جیهانێ كربت، لێ هه‌ر ده‌م هێلیڤانكا وان پیڤاز بوویه‌؛ هه‌كه‌ جاره‌كێ تشته‌ك ب ده‌ستڤه‌ هینابت ژى گه‌له‌ك دومانه‌كرییه‌ و جاره‌كا دى ب سه‌ده‌مێ فاكته‌رێن خویانى و بیانى ژ ناڤ چۆیانه‌ و كورد هه‌ر تنێ ماینه‌ و چیا هه‌ڤالێن وانێن وه‌فادار بووینه‌ و ئه‌شكه‌نجه‌دانا وان دۆمكرییه‌. واته‌ سه‌ده‌مێن سه‌ره‌كى یێن شكه‌ستنا كوردان د درێژیا دیرۆكێ دا ره‌نگه‌ دوبه‌ره‌كییا كوردان، خیانه‌ت و به‌رژه‌وه‌ندیێن ده‌وله‌تێن زلهێز بووینه‌. كه‌واته‌ گۆره‌ى وان سه‌ربۆهرێن د درێژییا دیرۆكێ دا ب سه‌رێ كوردان هاتین و مفا بۆ خوه‌ ژێ ‌وه‌رنه‌گرتى، ئانكو هه‌كه‌ سه‌ركێشێن كوردان هشیارییه‌ك هه‌بت، دێ زانن ئێشا وان و چاره‌كرنا وان چییه‌؟ هشیارنه‌بوونا كودران، رژدیا وان لسه‌ر دزینێ و كه‌لپوورتى و كه‌س خوه‌ ب كه‌سێ نه‌دانێ خویا دكه‌ت كو نه‌ به‌رژه‌وه‌ندیێن نێڤده‌وله‌تى و زلهێزان دخوازن كورد ببن ده‌وله‌ت، نه‌ كورد داگێڕانێ بۆ هه‌ڤدو دكه‌ن كو گڤاشتنێ لسه‌ر به‌رژه‌وه‌ندیێن زلهێزان بكه‌ن و مافێن ژ ده‌ستداین بده‌ستڤه‌ بینن.. داویا نه‌داوى كاره‌ساتا چاڤه‌رێكرییا ل 16-10-2017 ب سه‌رێ هه‌رێما كوردستانێ هاتى نموونه‌یه‌كا به‌رچاڤه‌ كو كارتێكرنا وێ چو ژ كارتێكرنێن كاره‌ساتێن به‌رییا نها ب سه‌رێ ملله‌تێ كورد هاتین كێمتر نه‌بوویه‌. لێ وه‌ها دیاره‌ نه‌ده‌وله‌تبوونا كوردان د به‌رژه‌وه‌ندییا جڤاكێ نیڤده‌له‌تى دانه‌، وان تنێ كورد بۆ به‌رژه‌وه‌ندییا خوه‌ دڤێن كو وه‌ك چه‌ته‌ بۆ خوه‌ بكاربینن دژى وان هێز و گرۆپێن چه‌كداریێن ل ده‌ڤه‌رێ كارتێكرنێ ل به‌رژه‌وه‌ندیێ وان دكه‌ن. به‌رانبه‌ر ئه‌و سه‌ركرداتیێن كوردان یێن به‌رده‌وام ژى شكه‌ستنان دخون هه‌ست ب به‌رپرسیاریێ ناكه‌ن؛ هه‌تا كو داخوازییا لێبۆهرینێ ژى ژ خه‌لكى بخوازن كو تووشى ڤان جۆره‌ كاره‌ساتان دكه‌ن و نه‌ خه‌لكێ مه‌ ئه‌و هشیارى و ئیراده‌ هه‌نه‌ كو ب ده‌ستێن خوه‌ ڤان به‌رپرسان سزابده‌ن و پشتگیرییا هنده‌ك سه‌ركردایه‌تێن نووخواز و هه‌ڤچه‌رخ بكه‌ن. واته‌ ده‌مێ پرانییا خه‌لكێ مه‌ ئه‌ڤ تۆڤه بت ل به‌ر هه‌موو بلوولان بره‌قسن و هه‌تا نها مفا ژ لۆژیكێ ئه‌قلى نه‌كربت، ره‌وشا كوردان چو ژ ره‌وشا ((سیزیفێ گریكى)) یێ خوداوه‌ندێ خوداوه‌ندان خفس و نفرین لێكرین كێمتر نابت و به‌رده‌وام دێ د بن بارێ خوه‌ڤه‌ نالن و هندى كه‌ڤرێ ده‌وله‌تێ بگه‌هییننه‌ سه‌رى جاره‌كا دى ره‌فتارێن وانێن تاكانه‌ و تژى خیانه‌ت، ئه‌مریكا و ده‌وله‌تێن دن یێن رۆلێ زیۆسێ خوداوه‌ندێ خوداوه‌ندان دكه‌ن دێ وان زڤڕینه‌ بنێ گه‌لى و ئه‌شكه‌نجه‌دان دێ هه‌روهه‌رى بت!

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.