فلمێ هه‌لوه‌شانا یه‌كگرتوو ده‌ستپێكر

حه‌سه‌ن فه‌تاح :

یه‌كگرتوویا ئیسلامییا كوردستانێ، كو ل سالا 1994ێ هاتییه‌ دامه‌زراندن، درووشمێ وێ ژى (برایه‌تى، ئازادى، دادپه‌روه‌ری)یه‌، ل سه‌ر لۆگۆیێ وێ ژى دوو ده‌ستن تێكدا كو رامانا یه‌كگرتنێ دده‌ت، گۆما چه‌ند ساله‌ په‌نگیایی ئه‌ڤرۆ لێ په‌قى و ناكۆیێن وێ سه‌ر ئاڤ بوون.
یه‌كگرتوو؛ خودان پێگه‌هه‌كێ جه‌ماوه‌رییه‌، ب تایبه‌ت ل ده‌ڤه‌را به‌هدینان، كو ب دووه‌م هێز دهێته‌ نیاسین پشتى پارتى، لێ ب دیتنا من بهێزبوونا پێگه‌هێ وێ نه‌ ژ جامێرى و ژێهاتنا كادرێن وێ بوو،نه‌ژى مه‌له‌ڤانییا وێ بوو د سیاسه‌تێ دا، به‌لكۆ خاپاندن و سه‌ردا برنا خه‌لكى بوو برێكا په‌یاما پیرۆزا ئیسلامێ كو وان بۆ مه‌به‌ستێن خو یێن سیاسى كربوو رێیه‌ك، خه‌لكێ ده‌ڤه‌را به‌هدینان ژى ب گشتى خه‌لكه‌كێ دیندار و خوداپه‌رێسه‌، له‌وما برێكا كاركرن ل سه‌ر عاتیفه‌یا خه‌لكى دشیان ده‌نگێن وان بۆخو راكێشن، ئه‌گه‌ر نه‌، ما كێ گوتییه‌ براده‌رێن یه‌كگرتوو هه‌لگر و وارسێن په‌یاما ئیسلامێ نه‌، لی بتنێ وان بۆخو كرییه‌ رێیه‌ك و مه‌به‌سته‌ك بۆ گه‌هشتنا ئارمانجێن خو یێن سیاسى.
ژمێژه‌ ئه‌ز ل وێ باوه‌رێ بووم روویێ دروستێ یه‌كگرتوو دێ ئاشكرابیت،دیسان ناكوكیێن وان دێ ئاشكرابن و دێ ده‌رز تێكه‌ڤن، سه‌رئه‌نجام ئه‌و خه‌لكێ دلسۆزێ وان ب ناڤێ پیرۆزێ ئیسلامێ د سه‌ردا برى، دێ زانن مه‌به‌ستا یه‌كگرتوو نه‌ ئاین په‌روه‌رییه‌، ئه‌ڤ ناكوكى و ئالۆزیێن نها دناڤبه‌را سه‌ركردایه‌تییا وان یا ده‌ڤه‌را به‌هدینان دگه‌ل سه‌ركردایه‌تییا یه‌كگرتوو دا ده‌ركه‌فتین و ده‌ست ژ كاركێشانا یه‌ك ژ كادرێن دامه‌زرێنه‌رێن وێ حزبێ، ده‌سپێكا سیناریۆیا دیاربوونا روویێ دروستێ یه‌كگرتوویه‌ و لاوازبوونا وێ هێزا سیاسییه‌.
ئه‌ز نابینم نه‌ یه‌كگرتوو، نه‌ ژى هێزێن دى یێن ئیسلاما سیاسى ل سه‌ر گۆره‌پانا هه‌رێما كوردستانێ جهه‌ك ل پاشه‌رۆژێ هه‌بیت، وه‌كو پێگه‌هێ جه‌ماوه‌رى به‌لكۆ مینا تاڤیێن بارانا بهارى دێ هێن و چن و لاوازبن، چونكى ب سیسته‌م و رێیه‌كا ئه‌كادیمى كارێ سیاسى ناكه‌ن، به‌لكۆ ل سه‌ر عاتیفه‌ و هه‌ست و سۆزا خه‌لكێ دیندار كاردكه‌ن، مه‌دیت ژى ل دوو دووماهى هه‌لبژارتنێن بۆرى، هنده‌ك بانگخواز به‌ربژاركرن كو ئه‌و جامێره‌ ژ بنه‌مایێن سیاسه‌تێ به‌ریئن، لێ ب ناڤێ بانگخوازییا ئیسلامێ شیان خه‌لكه‌كێ ئاسایی ب خاپینن و هه‌ر یه‌ك ژ وان هه‌ژماره‌كا مه‌زن یا ده‌نگان بینن و نها ئه‌م دبینین ژى ل سه‌ر گۆره‌پانا سیاسى وان چ رۆلێ خو نینه‌ و گه‌له‌ك جاران ده‌ما دكه‌ڤنه‌ گه‌نگه‌شه‌یه‌كا سیاسى، جهێ پێكه‌نینێنه‌ كو ب هه‌مان روحیه‌تا بانگخوازیێ دان و ستاندنێ دكه‌ن، ل دووماهیێ دووپاتدكه‌م ئه‌ڤه‌ ده‌سپێكا چوونا یه‌كگرتوویه،‌ چونكى سیاسه‌ت ب رێیا عاتیفا خه‌لكى ناهێته‌كرن.

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.