زارۆیێن مامۆستایان مافێ قوتابیان دخوون!

عیماد ئالیخان

د سالێن بەرێ دا و تا نوکە ل سەرانسەری قوتابخانان دیاردەیا گرنگی و پیتەدانا زێدە یا زارۆیێن مامۆستایان بەراود د گەل قوتابیێن دی د قوتابخانانێ ڤە و د پۆلان دا رۆژ ب رۆژ یا د زێدەبوونێ دا و ئێدی بوویە دیاردەکا بەرچاڤ، کو ئێدی زۆربەیا قوتابیان ھەست ب وێ جیاوازیێ دکەن ئەوا مامۆستا جێبەجێ دکەن د ھەموو ئەرکێن قوتابخانێ دا و بوویە جھێ تورەیی و نیگەرانیا زۆربەیا قوتابی و سەمیانێن وان و تا رادەکی دەستھەلات د قوتابخانێ و د پۆلان دا یا ددەستێ زارۆیێن وان دا و بۆ ئەنجامدانا ھەر چالاکیەکا د ناڤا قوتابخانێ و پۆلان دا دەلیڤەیا ھەرە مەزن بۆ وانە! بۆ نموونە رۆژا بلندکرنا ئالایێ کوردستانێ د گورەپانا قوتابخانێ دا یان چالاکیەکا وەرزشی، ھونەری و … ھتد. یان ژی دھێنە ھەلبژارتن بۆ زێرەڤانیا پۆلێ و جھێ وان یێ رونشتنێ ژی د پۆلێ دا ل رێزێن ئێکێ نە و مەرج نینە ئاستێ وان یێ زانستی یێ بەرز بیت یان یێ لاواز ل دووماھیا سالێ و پشتی ئەنجامدانا ھەموو ئەزموونان ئەو ل رئزێن ئێکێ نە د سەرکەفتنێ دا! ئەرێ ئەڤ خالێن من ل سەری من ئاماژە پێ داین ل سەر سەرەدەری و گرنگیا ماموستای دگەل زارۆکێن خوە ل قوتابخانێ و د پۆلێ دا و ل پێش چاڤێن قوتابیێن دی، دێ چ کارتێکرن ل سەر دەروونێ قوتابیان ب گشتی ھەبیت؟ ئەرێ دێ چاوا قوتابی حەز ژ قوتابخانێ و خواندنێ و ماموستایان ب گشتی کەن؟ ئەگەر ماموستا خوە ب سەمیانێن قوتابیان دزانن بۆچی ڤێ جیاوازیێ د ناڤبەرا زارۆیێن خوە و قوتابیێن دی دا دکەن؟ یان دێ چاوا قوتابی شێن ئەرکێن خوە یێن قوتابخانێ ژ وانە و ئەزموون و … ھتد ئەنجامدەن کۆ ل پێش چاڤێن خوە دبینن چ گرنگی ب وان ناھێتە دان بەرامبەر زارۆیێن مامۆستایان؟ ئەرێ مافێ مامۆستایە ڤێ جیاوازیێ د ناڤبەرا زارۆیێ خوە و قوتابیێن دی دا بکەت؟ یان ئەڤێ جیاوازیێ دێ چ کارتێکرنا خوە ل سەر پاشەرۆژا وان ھەبیت؟ یان ژی کارێ مامۆستایان ب دروستی چیە؟ پەروەردە و فێرکرنەکا زانستی یە یان ژی پەروەردە و فێرکرنا گەندەلییێ یە؟ ژ بەرکو ئەڤە ژ پێنگاڤێن دەستپێکی نە کۆ قوتابی تێدا فێری ئەتەکێتێن گەندەلیێ ببیت و ھێدێ ھێدی د گەل دەربازبوونا وی بۆ ھەر قوناغەکێ ئەڤ دیاردە بۆ قوتابیان پتر رون دبیت کو ئەو ژی ئێدی ل سەر ڤی بنیاتی رابیت و د پاشەرۆژێ دا جێبەجێ بکەت، ھەروەسا ئێکە ژ وان خالان کو مرۆڤ ھەر ژ دەستپێکێ ل سەر بنیاتێ نیاسینی و مرۆڤ مرۆڤکانێ فێری گەندەلیێ دبیت؟ یا باش ئەوە تاکو ئەم ژ ڤێ دیاردەیا نە شارستانی قورتال بین وەزارەتا پەروەردێ یان رێڤەبەریێن پەروەردە و قوتابخانان ل ھەر پارێزگەھەکێ بریارەکێ دەربێخن کۆ نابیت مامۆستا و زارۆکێن خوە ل ئێک قوتابخانە دەوامێ بکەن؟ یان ژی ئەڤە ل سەر رێڤەبەرێن قوتابخانا دمینیت کو ئەوی مافی نەدەتە مامۆستایان کو ب ڤی کاری رابن د ناڤ قوتابخانێ دا، و ئەڤە دێ بیتە پێنگاڤەکا باش و د بەرژەوەندیا ھەموو قوتابیان دا نەکو ئەوا نوکە ئەم ل ھندەک قوتابخانان دبینین زارۆیێن مامۆستایان مافێ ھەموو قوتابیێن دی خواریە د ھەموو ماف و ئەرکێن قوتابخانێ دا. مامۆستا وەلاتان ئاڤەدان دکەن ل سەر بنیاتەکێ ب ھێز و د ھەمان دەم دا مامۆستا دشێت وەلاتان وێران و تێکدەن، لەوا بلا ئێدی مامۆستا خوە ژ ڤێ دیاردەیێ دوربێخن داکو ئەو نفشێ ل بەر دەستی رادبن وەلاتی ئاڤەدان بکەن و د پاشەرۆژێ دا کوردستانەکا بھێز بینین ژھەموو لایەکی ڤە.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.