دوو خوله‌ك بۆ بێ ده‌نگكرنا ئه‌ردوگانى

كارزان فه‌قى

كۆربه‌ندا ئابۆرییا جیهانى ل باژارێ سانبترسبۆرگ ب ئێك ژ خالێن وه‌رچه‌رخانا ئابۆرا هه‌رێما كوردستانێ دهێته‌ دانان، كو داوى كوربه‌ند ب پشكدارییا شانده‌كا هه‌رێمێ ل خزێرانا بۆرى هاتبوو‌كرن، هه‌ر چه‌ند ئه‌و جارا ئێكه‌م نه‌بوو حكومه‌تا هه‌رێمێ و خودێ سه‌رۆكێ جڤاتا وه‌زیران نێچیرڤان بارزانى پشكدارى وێ كۆربه‌ندێ ببیت، لێ ڤێجارێ شاندا هه‌رێمێ شییا گه‌له‌ك دیدارێن گرنگ د په‌راوێزا وێ كۆربه‌ندێ دا بكه‌ت، ژبلى رێكه‌فتنه‌كا لێكتێگه‌هشتنێ دناڤبه‌را حكومه‌تا هه‌رێمێ و كۆمپانییا گازپرۆم یا رووسى، دیدارا دوو خوله‌كییا دناڤبه‌را نێچیرڤان بارزانى سه‌رۆكێ حكومه‌تا هه‌رێما كوردستانێ و ڤلادیمیر پۆتین سه‌رۆكێ رووسیا كو ل 2ى خزێرانا 2017 د په‌راوێزا كۆربه‌ندا ئابۆرییا سانبترسبۆرگێ هاته‌كرن؛ هێز و بهایه‌كا دا په‌ترۆلا هه‌رێمێ ب تایبه‌ت ژ بۆ كۆمپانیێن روسی، پشتى وێ دێدارێ ئیدی كۆمپانیێن وى وه‌لاتی دخوازن پشكا شێری ژ په‌ترۆلگه‌هێن هه‌رێما كوردستانێ به‌ر ب وان بكه‌ڤیت، گه‌له‌ك لۆژیكیه‌ ژى ئه‌گه‌ر بێژین رێكه‌فتنا ڤێ داویێ یا دناڤبه‌را حكومه‌تا هه‌رێما كوردستانێ و كۆمپانییا رۆزنه‌فت یا رووسی ئێك ژ ده‌رئه‌نجامێن وێ دیدارا دوو خوله‌كییا دناڤبه‌را بارزانیێ سه‌رۆك وه‌زیر و پۆتینێ سه‌رۆكێ روسیا بوو، له‌ورا نه‌ ب تنێ ژ به‌ر قازانجا ئابوورى به‌لكو ژ بۆ ره‌وشا نها ژى ئارامییا كوردستانێ ژ بۆ روسیا و كارمه‌ند و كۆمپانیێن وێ یێن په‌ترۆل و گازێ گرنگه‌، بۆ میناك پشتى ریفراندۆما سه‌رخوه‌بوونا هه‌رێما كوردستانێ هاتییه‌كرن، داخویانیێن دژوار و توند ژلایێ رایه‌دارێن وه‌لاتێن جیران یێن وه‌كو توركیا و ئیران دهێنه‌ بهیستن، ئه‌ڤه‌ ژبلى گه‌فێن دۆرپێچ و برسیكرنێ، لێ هه‌لوه‌ستێ روسیا ب به‌راورد دگه‌ل ڤان وه‌لاتان ب 180 پله‌یان جیاوازه‌. ل داوى سه‌ره‌دانا ڤلادیمر پۆتین بۆ توركیا؛ گرنگى و بهایێ دیدارا دوو خوله‌كییا نێچیرڤان بارزانى و سه‌رۆكێ روسیا باشتر ئاشكه‌را دبیت، ل ئیرانێ ژى مه‌ هاى ژ ئه‌ردووگانى بوو كو چ ب ره‌نگه‌كى دادا سه‌ر ریفراندۆمێ و خواستا گه‌لێ كوردستانێ، لێ ئه‌گه‌ر گۆتنێن ئه‌ردووگانى یێن به‌رى هاتنا پۆتینى بۆ توركیا دگه‌ل داخویانیێن وى یێن پشتى پۆتینى به‌راورد بكه‌ین؛ دێ ب باشى ئاشناى وێ گهۆرین و كاریگه‌ریێ بین كو ب سه‌ر هه‌لوه‌ست و شێوازێ ئاخفتنێن ئه‌ردوگانى هاتییه‌، دێ باشتر ژى زانین كو پۆتین هیچ تشته‌ك بۆ دژایه‌تیكرنا هه‌رێما كوردستانێ و ریفراندۆما سه‌رخوه‌بوونێ نه‌دایه‌ ده‌ستێ ئه‌ردوگانى، رۆل و بهایێ دوو خوله‌كێن سانبترسبۆرگێ ب تنێ هه‌تا ڤێرێ نه‌بوو، به‌لكوو ل 4/10/2017ـێ ژى ڤلادیمر پۆتین ل كۆربه‌ندا ئابۆرییا روسیا دا ل مۆسكۆ باس ل ئه‌گه‌رێن راگرتنا په‌ترۆلا هه‌رێمێ كر و گۆت: روسیا په‌یوه‌ندیێن دیرۆكى و باش دگه‌ل هه‌رێما كوردستانێ هه‌نه‌ و ئه‌و ده‌ستوه‌ردانێ د كێشه‌یێن ناڤخوه‌یێن ئیراقێ ناكه‌ن، لێ دێ هه‌ردوو ئالییان بۆ دانوستاندنێ گازى كه‌ین. پۆتینى ب زمانه‌كێ نه‌رم و شێوازێ گه‌فكرنێ تلێ خوه‌ ئاراسته‌ى توركیا و ئیرانێ كریه‌ و گۆتییه‌: د به‌رژه‌وه‌ندا چ كه‌س و ئالییان دا نینه‌ په‌یوه‌ندیێن خوه‌یێن ئابۆرى دگه‌ل كوردستانێ ببریت و دوپاتى ل په‌یوه‌ندیێ روسیا و كوردستانێ كریه‌. ئه‌ڤه‌ هه‌موو ئاماژه‌نه‌ كو رێگرتن ل په‌ترۆلا هه‌رێما كوردستانێ نه‌ بتنێ زیان ب كوردان دكه‌ڤیت؛ به‌لكو روسیاژى دێ بیته‌ ئێك ژ زه‌ره‌رمه‌ندێن وێ بریارا چاڤه‌رێكریا توركیا. ئه‌ڤه‌ هه‌موو ئاماژنه‌ كو دبلۆماسییه‌تا حكومه‌تا هه‌رێما كوردستانێ ل ده‌مێن بۆرى شیایه‌ ماركێتینگه‌كا باش ژ بۆ په‌ترۆل و گازا سروشتییا هه‌رێما كوردستانێ ل بازارێن جیهانێ بكه‌ت، ژلایه‌كێ دیڤه‌ ژى دووخوله‌كێن سانبترسبۆرگێ شیا روسیا بكه‌ته‌ ژێده‌ره‌كێ ئابوورى و دۆسته‌كێ رۆژێن ته‌نگاڤییان.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.