ده‌مێ ده‌نگێ خه‌لكى ژ سیبه‌را وى ده‌رباز نه‌بت

ته‌حسین ناڤشكى

ئه‌هڤه‌ بهتر ژ 27 سالانه‌، ده‌نگێ خه‌لكه‌كى یێ بلند دبت و دخوازن گوهۆڕین ل ڤێ هه‌رێما بچووك بهێنكرن، لێ ژ به‌رسڤا ده‌ستهه‌لاتێ دیاره‌، ده‌نگێ وى خه‌لكى ژ سیبه‌را وى ده‌رباز نابت. خالا بالكێش ئه‌وه‌ كو ده‌ستهه‌لات ژى گه‌له‌ك جاران ده‌نگێ خوه‌ دده‌ته‌ دگه‌ل ده‌نگێ وى خه‌لكى و سۆز و په‌یمانان ژى دده‌ت كو ل ڤێ كابینه‌یێ نه‌ یا دى كو ده‌ست ب گوهۆرینان بكه‌ت و ل پێشیێ دێ ده‌ست ب نه‌هێلانا گه‌نده‌لیێ و دزیان هێته‌ كرن. واته‌ هه‌ر كه‌سه‌ك تاوانبار ل دووڤ قانوونێ دێ گه‌هت مافێ خوه‌ و كه‌س ژ وێ قانوونێ مه‌زنتر نینه‌. لێ راستیا ژیوارى تشته‌ك جودایه‌، واته‌ به‌ره‌ڤاژى، دزى و گه‌نده‌لى رۆژ بۆ رۆژێ زێده‌تر لێدهێن، دیاره‌ ئه‌و گوهۆڕينێن دهێنه‌ كرن ژى، ره‌نگه‌ ل هه‌ڤ گوهه‌ڕتنن و دوورن ژ راستیێ و تنێ مژداركرنا ژیوارێ تلۆڤه‌یه‌ ژ ئاڕیشه‌ و كێموكاسییان. هه‌لبه‌ت پرانییا مه‌ وه‌سا دبینن كو دڤێت گوهۆڕین ژ مرۆڤى ده‌ست پێ بكه‌ن، پرسیار ئه‌وه‌: ماهه‌كه‌ لاشێ مرۆڤێ كول بت، دێ چاوا شێت بته‌ نۆشدارێ خه‌لكه‌ك دى و ئه‌نجامێن ئه‌رێنى ب ده‌ستڤه‌ هینت. وه‌ك مه‌نتق ئه‌ڤه‌ نابت، واته‌ ئه‌و ئالیێ گوهه‌ڕتنان دكه‌ت دڤێت ژبلى كو خودان ده‌ستێن پاقژ بت، دڤێت ئیراده‌ هه‌بت گوهۆڕینان بكه‌ت، واته‌ باوه‌ریه‌ك مكوم ب گوهۆرینان هه‌بت كو ئه‌و ده‌ستپێشخه‌رى، دێ خزمه‌تا گشتى و پرنسیپێن نه‌ته‌وه‌یا وى كه‌ت و دڤێت ستوخواهریێ بۆ بكه‌ت، هه‌كه‌ خوه‌دیێ وى بت، داكو بشێت گوهۆڕینێن ره‌هوریشالى لسه‌ر خه‌لكه‌ك دى بكه‌ت. مخابن ئه‌ڤا ئه‌م هه‌رده‌م دكه‌ین و دبێژین، هه‌كه‌ هه‌بت ژى ژ حاله‌تێن ده‌گمه‌نه‌ د ده‌ستهه‌لاتا هه‌رێما كوردستانێ دا. ژ به‌ر كو چو ئالیێن سیاسى ل هه‌رێمێ به‌رهه‌ڤ نینن ده‌ستپێشخه‌ربن و كه‌سانێن دز و گه‌نده‌لێن حزبا خوه‌ ده‌ستنیشانبكه‌ن و ناڤێن وان بۆ رایا گشتى رابگه‌هینن داكو باوه‌ریا خه‌لكه‌كى ب ده‌ستهه‌لاتا هه‌رێمێ بزڤڕت. به‌ره‌ڤاژى هندى حزبێن كوردستانێ هێز هه‌یه‌ دز و گه‌نده‌ل و تاوانبارێن خوه‌ یێن مه‌زن ب به‌هانه‌یا وێ پارێزبه‌ندیا دایێ دپارێزن و ناهێلن بچنه‌ به‌رامبه‌ر ته‌رازوویا دادگه‌هێ، تنێ ئه‌و ته‌رازوو بۆ هه‌ژار و نه‌دارێن بێپشت و بێپارێزمه‌ندى دمینت، دادوه‌ر پێرابوونێن قانوونى هنبه‌ر وى بستینت. ل ڤێره‌ تنێ رۆلێ راگه‌هاندنێ و رێكخراوێن جڤاكێ مه‌ده‌نى دمینت، ئه‌و ژى پشكا شێرى ژ وان سازییان هه‌كه‌ نه‌بێژین هه‌موو، یان ئۆرگانێن حزبێن هه‌رێمینه‌ یان سیبه‌رێن وانن، هه‌كه هات و جاره‌كێ‌ ده‌نگه‌كى كفنێ خوه‌ كره‌ سه‌رێ خوه‌ و دز و گه‌نده‌ل ب ناڤ ده‌ستنیشانكرن، هینگێ دڤێت ئه‌و ده‌نگ ژ هه‌رێمێ باركه‌ت یان چاره‌نڤیسێ وى كه‌ته‌ د هاتوباتێ دا؛ مینا هنده‌ك ژ وان ره‌ڤین و هنده‌ك ژى بووینه‌ قوربانێن په‌یڤا ئازاد و هێشتا یێن دچن و باده‌كێن وان ل بن تۆزێ ماینه‌. ره‌نگه‌ براده‌ره‌ك وه‌ها ئاماژه‌یێ بده‌تێ كو ده‌مۆكراسیه‌ و ئازادیه‌ و ئه‌ڤا تو دنڤیسى پارچه‌یه‌ك ژ وێ پرۆسێسا ژيێ وێ نێزیكى 28 سالان. ئه‌ز هه‌ر ل ڤێره‌ دێ به‌رسڤێ ده‌م كو ئه‌ڤا نها ئه‌ز د ڤان رێزكان دا دبێژم، هه‌كه‌ نها ناڤێ دزه‌كى یان گه‌نده‌له‌كى ئه‌ز دگه‌ل دیار بكم، هه‌كه‌ خوه‌ به‌لاڤۆكه‌كا مه‌ وێ وێره‌كیێ بده‌ته‌ خوه، هینگێ ڤێ نڤیسارێ‌ به‌لاڤ ژى كه‌ت، دێ هه‌ر د سه‌رێ مه‌ڕا ژ كێت؛ ژ به‌ر كو هه‌ر تشته‌كى دز و گه‌نده‌لان ژ ڤى وه‌لاتى تالانكرى فه‌رمى و قانوونى ئێخستیه‌ سه‌رناڤێ خوه‌ یان مرۆڤه‌كێ خوه‌ و تۆمار كریه‌. یان ژێر به‌ژێر ئه‌و سامانێ دزى سپیكریه‌ و نها دپانقێن جیهانى دانه‌؛ هینگێ دێ ئه‌م هێینه‌ تاوانباركرن ب ناڤزڕاندن و شكاندنا وان كه‌سانێن دز و گه‌نده‌ل و مافێ وانه‌ سكالایا تۆماركه‌ن؛ وه‌ك گه‌له‌ك جاران تۆماركرین. واته‌ ئه‌ڤ گازنده‌ و ره‌خنه‌یێن گشتى ئه‌م هه‌موو بۆ خوه‌ دكه‌ین هه‌مان ئه‌و دز و گه‌نده‌لن ژى دكه‌ن و كه‌س پرسا چاره‌كرنێ ناكه‌ت! كه‌واته‌ ل دووڤ گۆتنا پێشیان: ((ئه‌ز چیا و تو چیا…..)) هندى كو چو حزبێن هه‌رێمێ ده‌ستپێشخه‌ریێ نه‌كه‌ن و دز و گه‌نده‌لێن خوه‌ ده‌ستنیشانكه‌ن و ل دووڤ قانوونێن هه‌ولێرێ و به‌غدایێ سزانه‌ده‌ن و نه‌گه‌هیننه‌ مافێ گه‌ل، ره‌وش دێ رۆژ بۆ رۆژێ كامباختر لێهێت و قه‌یران دێ زێده‌بن. هه‌لبه‌ت ئه‌ڤه‌ ژى دمینته‌ لسه‌ر ئیراده‌یا رابه‌رێن حزبان برێڤه‌دبه‌ن، هه‌كه‌ ئه‌و ئیراده‌ هه‌بت و خوه‌دیێ وان خالێن ره‌ش لسه‌ر بن دانپێدانێ پێبكه‌ن؛ هینگێ دێ شێن ره‌شه‌ خالێن خه‌لكه‌ك دن ژى ده‌ستنیشانكه‌ن و گه‌هیننه‌ مافێ گه‌ل؛ لێ هه‌كه‌ ئه‌ڤ ئیراده‌ نه‌بت، نه‌هه‌لبژارتنێن دهێنه‌ كرن و نه‌ لێكگوهه‌ڕتنا به‌رپرسێ ڤێ لیژنێ یان ڤێ كۆمیتێ مفادكه‌ت و نه‌گوهه‌ڕتنا به‌رپرسێ ڤێ سازیێ ب به‌رپرسێ سازیا دى مفا دكه‌ت. ئه‌ڤه‌ هنده‌ ساله‌ ئه‌مێ به‌رهه‌مێ ڤى سیسته‌مى دبینین، تنێ ده‌مبۆهراندنه‌ و رۆژ بۆ رۆژێ ره‌وشا كامباختر لێدهێت.

بابه‌تێن ب ڤێ مژارێ ڤه‌ گرێدای