دبێژن دێ کورسیێن خۆ ل سەر حسابا وێ زێدە کەین!

ژیوار بامەرنی

هەلبژارتنێن جڤاتا نوونەرێن ئیراقێ نێزیک بووینە، هند ئالییان نەدخواست پشکدار بن، هندێن دی ئارمانج زێدەکرنا کورسییان بوو و هەر ئێک ژ وان، یێن دی دکەتە ئەگەر کو رەوشا هەرێمێ گەهشتییە قووناغەکا بزەحمەت.

پارتەکا هەرێمێنەدخواست پشکداری هەلبژارتنان بیت، حزبێن دی ل سەر پشکداریێ و وەرگرتنا پشکا خۆ ژ کورسیێن پەڕلەمانی رژد بوون، ئەرێ ئەو پارت لاوازە و دخوازیت بایکۆتێ بکەت؟ یانژی پارتێن دی ناخوازن ژ ئیراقێ ڤەقەتیێن و هزر دکەن لاوازییا وێ دێ کورسیێن وان زێدە کەت؟ دهێتە گۆت کو ئەو پارت ل ئێکەم قووناغ د ناڤا خۆ دا بوویە دو بەر و لاواز بوویە. دهێتە گۆتن کو ژبەر رێفڕاندۆمێ ل سەر ئاستێ ئیراقێ ژی پەیوەندیێن وێ دگەل پارتێن عەرەبی ب تایبەت یێن شیعی لاواز بووینە، دهێتە گۆتن کو ل سەر ئاستێ نێڤدەولەتی ژی د ناڤبەرا ئەمریکا و رۆسیا، ئیران و تورکیا دا بەرزە بوویە و نێزیکە هێز و دەستهەلاتا خۆ ژ دەست بدەت و قەوارەیێن سیاسی یێن نوو و گەنج بگەهنە دەستهەلاتێ.وێ پارتێ ب بکارئینانا رێفڕاندۆمێ بۆ ئارمانجێن حزبی یێن بەرتەنگ توومەتبار دکەن، هەر وێ ب بکارئینانا ئارمانجێن نەتەوەیی بۆ پاراستنا دەستهەلاتا خۆتوومەتبار دکەن، و هەر دیسان وێ پارتێ ب ڤەقەتاندنا هەرێما کورستانێ ژ ئیراقا دیمۆکراسی یا فیدڕال توومەتبار دکەن.

ئەو پارت لاواز نینە و بایکۆت بۆ دووپاتکرنا ئێکڕێزییا کوردان و دیارکرنا بێ باوەرییا وان ب ئیراقا ل سەر بنەمایێ شەراکەتێ هاتییە ئاڤاکرن بوو. حزبێن هزر دکەن دێ کورسیێن خۆ ل سەر بنەمایێ بایکۆتکرنا هەلبژارتان ژ ئالیێ وێ پارتێ ڤە ل هندەک دەڤەران زێدە کەن، دوور نینە قەوارەیێن نوو کورسیێن وان ژی ببەن. حزبێن هزر دکەن کو ئەو پارت د ناڤا خۆ دا بوویە دو بال، ئەو حزب د ناڤا خۆ دا چەندین بالن و ل سەر دەڤەران دابەش بووینە. ل سەر ئاستێ نێڤدەولەتی و هەرێمی ژی، واشنتون و مۆسکۆ، ئەنقەرە و تەهران، هەر سەرەدەریێ دگەل وێ پارتا هەرێمێ دکەن و ب نوونەرا دروست یا هەرێمێ دزانن و ئەو وەلاتێن ب رژدی بزاڤێن راگرتنا ئەنجامدانا رێفڕاندۆما سەرخوەبوونا کوردستانێ دکرن، دوبارە دگەل کەسێن پلانێن ئەنجامدانا رێفڕاندۆمێ داناین، کەفتنە دانوستاندنان، دەرگەهێن سنۆری نەهاتنە گرتن، گرێبەستا دگەل رۆسنەفت نەهاتە هەلوەشاندن و بناغەیێ مەزنترین کونسۆلخانەیا ئەمریکی ل جیهانێ، ل هەولێرێ هاتە دانان و بۆ هەموو لایان دووپات بوویە کو ئەو ئارمانجێن نەتەوەیی یێن وێ پارتێخۆ لێ کرییە خودان، چو پارتێن دی نەشیاینە نێزیک ژی ببن.

ل دوماهی و بەراهیێ، هەلبژارتن نێزیک بووینە، هەر حزبەک ب رەنگەکی بانگەشێ بۆ خۆ دکەت و خۆ ب خودانا پرۆژەیێن نەتەوەیی ددەتە زانین، لێ یا گرنگ ئەوە بزانین کیژ قەوارە بۆ بهێزکرنا ئیراقێ و لاوازکرنا هەرێمێ کار دکەت و کیژ بەروڤاژی. کیژ حزب سۆزێن بجهئینانا سیاسەتا تڕامپی زەنگینکرنا گەنجان ددەت و تا نها قەرێن گەنجان ل سەرن. کیژ حزب دخوازیت ب دوعایان ئارمانجێن نەتەوەیی بجهـ بینیت و بالێ وێ یێ دی دوعایان بۆ ئیراقەکا بهێز دکەت، کیژ پارت تا نها نەشیایە د ناڤا خۆ دا ئێکدەنگ بیت و دخوازیت ببیتە نوونەرا گەلەکی و کیژ تەڤگەر داخوازا سزادانا کەسێن پشکداری رێفڕاندۆمێ بووین، دکەت و د هەمان دەم دا دخوازیت کەسێن پشکداری رێفڕاندۆمێ بووین باوەریێ ب وێ بینن و دەنگێن خۆ بدەنێ.

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.