بێھنڤەدانا شەمبیێ ڤالنجا زانستی بوو!

بێھنڤەدانا شەمبیێ ڤالنجا زانستی بوو!

عیماد ئالیخان

كێمتر ژ مەھەکێ مایە دەرگەھێن خواندنگەھا ل سەرانسەرێ ھەرێما کوردستانێ و بەرامبەر قوتابی و مامۆستایان بھێنە ڤەکرن و سالا نوو یا خواندنێ دەستپێبکەت، وەزارەتا پەروەردا حکومەتا ھەرێما کوردستانێ ب فەر دیت بێھنڤەدانا رۆژا شەمبی بو سالا نوو یا خواندنێ نەمینیت و ببیتە ئێک ژ رۆژێن دەواما فەرمی ل قوتابخانەیان، ددەمەکی دا پار و ژ بەر رەوشا ئابووری و قەیرانا دارایی و وەک ئاسانکاریەک بۆ مامۆستایان ئەو رۆژە ھاتبوو دەستنیشانکرن وەک بێھنڤەدان، ژ لایەکی ڤە ئەڤ بێھنڤەدانا رۆژا شەمبی د بەرژەوەندیا ھندەک مامۆستایێن تەمبەل دابوو، یێن کو حەزا گۆتنا وانا و پێگیری ب دەوامێ نەی، لێ د بەرامبەر دا ژی زیانێن مەزن یێن زانستی ژ ئەنجامێ ڤێ بێھنڤەدانێ گەھشتنە سەرجەم قوتابیان، ژ بەرکو رۆژا ئەینی و شەمبی ئانکو دو رۆژان بۆ قوتابیان بێھنڤەدان بوو و ئەگەرێ ھەرە مەزن بوو کو قوتابی ژ قوتابخانێ و وانەیێن خوە دور بکەڤن و د ئەنجامدا دبوو ئەگەرێ ژبیرکرنا وانە و ئەرکێن خوە یێن قوتابخانێ. ب دیتنا من ئەڤە ئێک ژ وان خالان بوو یێ کو ئاستێ زانستی یێ قوتابیان لاواز بووی دسالێن بۆری دا، ھەروەسان ئەو بێھنڤەدانە بۆ ھندەک مامۆستایان ژی دەلیڤەیەک بوو کۆ خوە ماندی نەکەن ب گۆتن و گەھاندنا بابەتی ڤە بۆ قوتابیان و پتر گرنگی ددا ئەرکێ خواندنا مال نەک ل قوتابخانێ، کو ئەڤێ سەرەدەریێ ئاستەنگ بۆ زۆربەیا قوتابیان پەیدادکر ژ بەرکو گەلەک ژ دایک و بابێن قوتابیان نە خواندەڤان بوون یان پێشمەرگەبوون و د ئەرکێ خوە یێ پیرۆز دابوون، یان ژی ئەو شیانێن زانستی ل دەڤ نەبوون ھاریکاریا زارۆیێ خوە بکەت بۆ نیشادان و گەھاندنا بابەتێن خواندنێ! سەرەرای زیانێن بێھنڤەدانا رۆژا شەمبی ل سەر ئاستێ زانستی یێ قوتابیان، گەلەک جاران ھندەک بێھنڤەدانێن دی ژی دھاتنە سەر و دبوو ئەگەرێ دورکەڤتنا قوتابی ژ وانێن خوە بۆ ھەیاما چەند رۆژان وەکو بێھنڤەدانێن نیشتمانی و … ھتد، کو د شیانێن وی یێن ھزری دا نەبوون بزانیت کا وی ل قوتابخانێ چ ئەرک ھەبوون، یان پەرتووکێن خوە یێ قوتابخانێ وندا دکرن ژ ئەگەرێ درێژیا رۆژانێن بێھنڤەدانێ، یا ژ ھەموویان خرابتر گەلەک جاران مامۆستای ژی بخوە ب دەلیڤە ددیت داخوازا دەستۆریا بێھنڤەدانێ ژ رێڤەبەرێ قوتابخانا خوە دکر! لەوا ئەڤە ھەموو دبوو ئەگەرێ لاوازی و ڤالنجا زانستی ل دەڤ زۆربەیا قوتابیان و کارتێکرنا وێ ل سەر ھەموو قوناغێن خواندنێ دکر، لێ ب تایبەت قوناغا شەشێ ئامادەیی، ھەروەسان کارتێکرنا وێ ل سەر مامۆستای ژی یا بەرچاڤ بوو، ژ بەرکو زۆربەیا جاران و پشتی وان بێھنڤەدانا مامۆستای ژی نە د زانی ب دروستی ھەتا چ لاپەرە بابەت بۆ قوتابیێن خوە شرۆڤەکریە! پار دەمێ وەزارەتا پەروەردێ د مەھێن دەستپێکێ دا کارتێکرنا نێگەتیڤ یا بێھنڤەدانا رۆژا شەمبی ل سەر ئاستێ زانستی دیتی دڤێت ب لەز ئەو بێھنڤەدانە نەھێلابا و ببا تەمامکەرا رۆژانێن دی یێن دەواما ئاسایی، لێ ھەر چاوا بیت دەستخوشیێ ل وەزارەتا پەروەردێ دکەم، ژ بوو دەرکرنا ڤێ بریارێ بو سالا نوو یا خواندنێ کو د بەرژەوەندیا قوتابیێن مەدایە ژبو ب دەستڤەئینانا ئاستەکێ زانستی و نمرێن بەرز، ھیڤیە زێدەتر گرنگی ب پەروەردێ، مامۆستا و قوتابیان بھێتە دان ژ بەرکو ئاڤاکەرێن ھەر وەلاتەکی ژ بنیات و پەروەردەکا باشە، نە ب زێدەکرنا دەم و رۆژێن بێھنڤەدانا!

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.