بلا سازیێن ژنان پەرستنا هەشتی مارسێ نەکەن

 

هوزان عەبدوللا

د هەموو شورەش و سەرهلدان و خەباتا گەلێ کورد دا ژنێ روولێ هەرە سەرەکی د سەرکەفتنێن مللەتی دا هەبووینە، پشتی سەرهلدانێ ئێدی دەلیڤە ژ بۆ ژنێ خوشبوو بەژداری سازیێن حکومی ببیت سەرەرای داب و نەریتێن کەلتوری یێن وی دەمی، سازیێن گرێدای ژنان هاتنە دامەزراندن و چالاککرن لێ خەلەتییا هەری مەزن ئەو بوو هەر پارتەکێ وەک چاڤلێکرن دگەل پارتا بەری خوە، سازیەکا تایبەت ب ژنان ڤە و ب ناڤەک و بەرنامەکێ جودا ژ پارتا دی دامەزراندن، ئەڤ سازیە بوونە پاشکویێن حزبان هەر سازیەکا ژنێ ئەجێندایێن پارتا خوە جێبەجێ دکرن بێی کو بشێت یا ئەو بانگەشێ بو دکەن جێبەجێ بکەت، ئەگەر هوسا نەبیت باشە بوچی تا نها ژنێن هەموو حزبان نەشیاینە خوە کۆمبکەن ل ژێر ئێک ناڤ ( ئافرەت، ژن، خویشک، خانم)  ئەڤە د سەلمینیت هین ئەجێندا و پلانێن حزبێن خوە یێن کو زەلامان دارشتین پەیرەو دکەن.

سازیێن ژنان بەردەوام داخواز دکەن مافێ ژنێ بهێتە دان و یا ئازاد بیت، بەردەوام سمینار دێ بو ژنان هێنە دان و بەحسا ئازادیا ژنێ کەن، باشە ئەو ژنا پێدڤی سمینارەکێ بیت داکو بەحسا ئازادیێ بو بهێتە کرن تو بێژی ئەو چەوا ئازادیێ شلۆڤە کەت؟ بوچی تا نها نەشیاینە کۆمەلگەهێ ب تایبەت رەگەزێ بەرامبەر تێبگەهینن ئازادی نە ئەوا کو دڤێت ژن یا سەربەردای بیت و تا نیڤ شەڤ ل کولانان بیت یان جلو بەرگێن ب دلێ خوە بکەتێ، دڤێت هین شیابان کۆمەلگەهێ تێبگەهینن ئازادیا هین بانگەشێ بو دکەن نە ئەوە یا ئەو د هزرا خوەدا چێدکەن بەلکو وە دڤێت یەکسانیێ بێخنە دناڤبەرێ دا داکو ژیانا وان باشتر برێڤە بچیتلێ هین نەشیاینە، هەر جهەکێ بەحسا مافێ ژنێ بهێتە کرن پتریا جاران و دناڤ پتریا تەخێن جڤاکی دا دێ ئاخفتنێن نە جان هێنە گوتن یان ژی مافێ ژنێ بیتە جهێ ترانە پێکرنێ، یان دێ بێژن ما وە زێدەتر چدڤێت ئەڤەژی مافێ وانە ژ بەر وە پەیاما درست نەگەهاندیە. هەشتی مارس یاکو ئەڤ سازیە شانازیێ پێدبەن ب بوچوونا من خرابترین خالە، سازیێن ژنان خوە پێڤە گرێدای، باشە بوچی هین رازی دبن ب روژەکێ د سالێ دا ببیتە رۆژا ژنان؟ بوچی د ڤێ روژێ دا دێ بەژنا خوە ب جلێن کوردی نەخشینن و پێشانگەهێن وێنا ڤەکەن و رێژا بەژداربوویێن زەلام دێ پتر بیت ژ یا ژنان.نها ل هەرێمێ مە نڤیسینگەهێن بەرهەنگاربوونا توندوتیژیا دژی ژنان هەنە لێ پتریا رێڤەبەرێن وان زەلامن باشە دێ چەوا ئاریشا ژنێ ب درستی هێت چارەکرن، دێ ژنا خودان ئاریشە چەند یا ئارام بیت دەمێ باس ل کێشا خوە دکەت لێ  ل دەف رەگەزێ دی، بوچی تا نها هەوە چ پێنگاڤ نەهاڤێتینە ئەو سازی ژ لایێ ژنان ڤە بهێنە ب رێڤە برن و ئینکار ناهێتە کرن ژنێن هەری چالاک بو ڤی کاری دێ هەبن. خالا هەری گرنگ رێژا ژنێ یە د سازیێن حکومی و حزبی دا هێشتا رێژا ژنێ نەگەهشتیە ئاستێ پیدڤی، بوچی دناڤا مەکتەبێن سیاسی و سەرکرداتیێ یێن هەموو حزبان دا یان ژن نینە یان ئەگەر هەبیت گەلەکا کێمە.

ل دۆماهیێ من دڤێت بێژم بلا ئێدی داخازا مافان نەکەین و خوە بەس کێم بکەین و خو مەزلۆم ببینین ل هەمبەر رەگەزێ دی، بەلکو کار بکەین ب شیانێن خوە و ب پشتبەستنا خوە بگەهین گوپیتکێ و بشێن جێوازیا جێندەری نەهێلین لێ نە ل سەر حسابا خراب بەحسکرنا رەگەزێ بەرامبەر یان تومەتبارکرنا وی، سازیێن ژنان بلا پەرستنا هەشتی مارسێ نەکەن مە ب دەهان ژنێن کورد هەبووینە دیروک شانازیێ پێدبەت بۆچی ئەم وان رۆژا ساخناکەین بوچی هین هەول نادەن ژنێن چالاک و نموونە د جڤاکی دا ب خەلاتێن بناڤێن ژنێن کورد خەلات بکەن، پێکۆل بهێنە کرن سازیێن ژنان پێکڤە کاربکەن دا ئێدی هەموو تەخ و چینێن کومەلگەهێ رێزێ ل بەرنامێن وە بگرن و ژن بشێن پشتبەستێ ل سەر هەوە بکەت.

 

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.