باغێ ئیرەم – طاها

تەحسین دۆسکی

(طاها) ناڤێ شاعره‌كێ دى یێ كلاسیكێ كورده‌، تشتێ ئه‌م ژێ دزانین ب تنێ ناڤێ وییه‌، و ئه‌ڤ شعرا وى یا ئێكانه‌، ئه‌وا د ده‌ستنڤیسا (ئیبراهیمێ كوڕێ سه‌یید ئه‌حمه‌دێ بێسكى) دا هاتى، ئه‌وا به‌رى پتر ژ سه‌د و پێنجى سالان هاتییه‌ نڤیسین، و ده‌مێ مرۆڤ ڤێ شعرا طاهایى دخوینت، د زانت كو ئه‌و د ڤه‌هاندنێ دا چاڤ ل دو شاعرێن دى یێن مه‌زن دكه‌ت، یان به‌لكى ئه‌و چاڤ ل وى دكه‌ن. ئه‌م نزانین! ئه‌و هه‌ردو: ماجن و مه‌لایێ باته‌یینه‌. ماجن و باته‌یى د سه‌دسالا هه‌ژدێ زایینى دا ژیاینه‌، و به‌لكى ئه‌و هه‌ردو هه‌ڤچاخێن ئێك بن، یان ماجن پیچه‌كێ به‌رى باته‌یى بت، ماجنى شعره‌ك هه‌یه‌ د ده‌ستپێكا وێ دا هاتییه‌:

جسۆرگولا غونچه‌ دهه‌ن

نازك نهالا كێ یى تو

مه‌هوه‌شا گول پیره‌هه‌ن

شۆخ و شه‌پالا كێ یى تو

گول روخا سیمین زه‌قه‌ن

فكر و خه‌یالا كێ یى تو

ئاهوا ده‌شتا خه‌ته‌ن

مسكینغه‌زالا كێ یى

تو نازكا سیما سه‌مه‌ن

قه‌نج و ده‌لالا كێ یى تو

ل سه‌ر شۆپا ماجنى مه‌لایێ باته‌یى ژى شعره‌ك ڤه‌هاندییه‌، د ده‌سپێكا وێ دا دبێژت:

صوبح و ئێڤارى شه‌ڤا تارى

شه‌مالا كێ یى تو

له‌یله‌تولقه‌در و به‌رائه‌ت

نوورا مالا كێ یى تو

غونچه‌یا باغێ ئیره‌م

شۆخ به‌ژن و بالا كێ یى تو

دێم كتێبه‌ زولف حاشى

شه‌رح و فالا كێ یى تو

ب خودی كى بێژه‌ من

كانێ شه‌پالا كێ یى تو

شاعرێ مه‌ یێ ڤی جارێ ژى شعره‌كا ب ڤى ڕه‌نگى نڤیسییه‌، و ژ دووماهییا شعرێ دئێته‌ زانین كو ناڤێ شاعرى (طاها)یه‌،  ژ به‌ر كو ئه‌م چو ژ دیرۆكا وى نزانین، ئه‌م نه‌شێین ل ڤێرێ ب پشتڕاستى بێژین: كانێ وى چاڤ ل ماجن و باته‌یى كرییه‌، یان به‌روڤاژى.. هه‌ر چاوا بت، طاها ژى هه‌ر ل سه‌ر ڕێكا پسیارێ گازییێ پێشكێشى دلبه‌را خۆ دكه‌ت، و و وه‌كى ماجن و باته‌یى دبێژتێ: 

 

لاله‌ ڕوویى دل روبایى

قه‌د شرینا كێ یى تو

مسك بوویى گول ڤه‌بوویى

نازه‌نینا كێ یى تو

جه‌عد موویى طاله‌ طوویى

حوور عینا كێ یى تو

خووب خوویى جان فه‌زایى

غه‌مڕه‌ڤینا كێ یى تو

ره‌وضه‌ كوویى قه‌لب جایى

میم و سینا كێ یى تو
ئه‌ى شه‌پالێ مه‌هـ جه‌مالێ

بێ مثالێ بێ نه‌ظیر

جه‌بهه‌ نارێ گولعوذارێ

زێڕ گوهارێ بوو عه‌بیر

سیم زه‌ندێ له‌عل قه‌ندێ

رووح به‌ندێ قه‌لب كه‌بیر

به‌ژن شۆخێ تازه‌ خۆخێ

مه‌شى دۆخێ طا حه‌ریر

ده‌ك رحانێ موو میانێ

گول جه‌بینا كێ یى تو
ئه‌و چ دێمه‌ به‌دره‌ نووره‌

ئه‌و چ ئه‌بروونه‌ چ نوون

ئه‌و چ هندۆنه‌ چ بسكن

ئه‌و چ ڕوونه‌ لاله‌گوون

ئه‌و چ ڕه‌شمارن د تارى

تێله‌ تێل و سه‌رنخوون

ئه‌و چ به‌ژنه‌ سه‌لوه‌ قامه‌ت

بر ژ جانێ من سوكوون

دل فه‌ریبه‌ پوڕ عه‌جیبه‌

جه‌بهه‌ مینا كێ یى تو
شۆخ و شه‌نگێ ماهـ ڕه‌نگێ

ڕه‌ش خه‌ده‌نگێ چاڤ به‌له‌ك

به‌رق ڕۆژێ حه‌رق دۆژێ

سینه‌ سۆژێ ڕوو مه‌له‌ك

گول خوناڤێ خوار گولاڤێ

طا به‌لاڤێ پوڕ هه‌له‌ك

تێله‌ قشتێ زه‌نده‌ رشتێ

هۆش مشتێ ئه‌ى چه‌له‌ك

فتنه‌ خیزێ قه‌ند بیزێ

زولف جڤینا كێ یى تو
ئه‌و چ گول سۆرن د شه‌نگن

ئه‌و چ ره‌یحانن ل دۆر

ئه‌و چ ڕه‌شتۆزن كه‌مانى

ئه‌و چ تیرن جه‌رح كوور

ئه‌و چ چاڤن تیژه‌ ئاور

ئه‌و چ ئه‌ندامن بلۆر

ئه‌و چ سینه‌ ئه‌و چ گه‌رده‌ن

ئه‌و چ چه‌شمن كو ب نوور

چه‌شمێ مه‌ستى مه‌ى په‌ره‌ستى

دل نشینا كێ یى تو
ئه‌و چ دوڕن پڕ جه‌واهر

ئه‌و چ لێڤن عشوه‌ گۆ

ئه‌و بناگۆشن چ سیمن

دل دزى بوو بر بو خۆ

ئه‌و چ یاقووتن چ له‌علن

ئه‌و چ طه‌ررارن گه‌لۆ

جاره‌كێ پاڤێ نقابێ

دا  ته‌جه‌للى بیت ڕوو

ما كو طاها بیت فدا ته‌

نازه‌نینا كێ یى تو

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.