ئیراق ژ هەرێما کوردستانێ دیمۆکراسیترە!

ژیوار عەبدولجەبار

دەمێ چەند رۆژانە گەلەک کەس ل سۆشیال میدیایێ و کەنالێن هندەک ئالیێن سیاسی دەربارەی رادەستکرنا دەستهەلاتێ هەڤبەرییا هەرێما کوردستانێ و ئیراقێ دکەن. راست دبێژن، ل ئیراقێ ژ سالا دوهزار و چارێ تا نوکە، سەرۆکوەزیرێ پێنجێ یە دهێتە سەر دەستهەلاتێ و ل هەرێمێ، هەر ئێک کەسە، تنێ دو سال نەبن کو ئێکەتیێ ئەو پۆست وەرگرتبوو.

رەخنەکرن و هەڤبەرکرنا هەرێما کوردستانێ ب ئیراقێ یان هەر جهەکێ دی بیت، گەلەک باشە ئەگەر رەخنە و هەڤبەرکرنەکا لۆژیکی بیت، لەورا ئەم دشێین بێژین، ئیراق وەک روویێ تیۆری بۆ بابەتێ گوهۆرینا سەرکێ وەزیران، ژ هەرێما کوردستانێ دیمۆکراسیترە، لێ ئەگەر ئەم ل گەل خۆ دراست بین، پێدڤییە ئەم نەبتنێ وەک تیۆری هەڤبەرکرنێ بکەین، بەلکو وەک پراکتیک، کا حکوومەتێن هەرێما کوردستانێ چ کرییە؟ و حکوومەتێن ئیراقێ چ؟

هەرچەندە بەری سالا دوهزار و سێیێ، پێشکەفتن و ئاڤەدانی یا ل بەغدا و باژێرێن دی یێن ئیراقێ هەیی، ب تایبەت باژێڕێن سوننی، گەلەک ژ یا هەرێما کوردستانێ زێدەتر بوو. ئەگەر وێ هەموویێ حساب نەکەین و وەسا دابنین کو ل سالا دوهزار و سێیێ هەرێما کوردستانێ و باژێڕێن ناڤەراست و باشۆرێ ئیراقێ، ژ خالا سفڕ دەستپێ کرییە و بۆ دەمێ پازدە سالان حکوومەتا ئیراقێ چ کرییە و حکوومەتا هەرێما کوردستانێ چ کرییە؟ ئەنجام دێ چ بیت؟

حکوومەتا ئیراقێ، ئەو حکوومەتا بودجەیا وێ یا سالانە نێزیکی سەد ملیار دۆلاران چ کرییە؟

حکوومەتا ئیراقێ شیایە ژ د پازدە سالێن بووری دا ب رەنگەکێ گەلەک جان بودجەیا خۆ د ژناڤبرن و وێرانکرنا باژێڕێن ئاڤا و ئاڤەدان دا ب مەزێخیت. بەغدا ئەو باژێرێ هەموو عەرەبان خەون پێڤە ددیتن، نوکە بوویە باژێڕەک کو دەمێ کابووس دهێتە ئێکی دبینیت یێ ل بەغدا. بەغدا ئەو باژێڕێ جهێن گەشتیاری و کەیف و سەما و بووراندنا دەمێن خووش، نوکە بوویە مەزنترین نموونەیا هەبوونا تیرۆر و کوشتن و وێرانکرن و تالانکرن و هەژاری و دەردەسەریێ.  بەغدا ئەو باژێڕێ ل سەردەمێ هارۆن رەشیدی ب پایتەختێ خواندن و زانینێ دهاتە نیاسین، نها بوویە باژێڕەک کو خواندەڤان و زانایێن وێ نەوێرن لێ بژین و قەستا هەرێما کوردستانێ و دەڤەرێن ئارام دکەن. ئەو بەغدایا پێشتر ب جادەیێن موتەنەبی و ئەبی نٶاس و پر و رێیێن خۆ یێن جوان بەرنیاس، نوکە هەر جادەیا تێڕا دەرباز ببی، دێ ب دەهان زالگەهـ کەڤنە رێیا تە و دوور نینە ل داوییا رێ، دیوارەکێ کلبستۆنان ل بەر سینگێ خۆ ببینی و نەشێی دەرباز ببی.

دبینم پێدڤی ناکەت بەحسێ هەولێرێ بکەین کو زێدەباری گەندەلی و کێم و کاسیێن هەین، ژ چ بوویە چ و نابێژم کا بەری پازدە سالان ب چ رەنگی بوو و نوکە چاوایە؟بەحسێ فشارێن سیاسی یێن حکوومەتێن ئیراقێ ئەوێن دەستهەلاتێ ئاشتیانە رادەست دکەن، یێن ل سەر هەرێما کوردستانێ ژی ناکەم.

ئەگەر رادەستکرنا دەستهەلاتێ دێ مە گەهینیتە وێ یا ئیراق گەهشتیێ، ئەز بێژم مە پێدڤی ب وی جۆرێ دیمۆکراسیێ نینە. تنێ ئەم پێدڤی نە چاکسازییان ل هەرێما خۆ بکەین، گەندەلی و هەژاریێ نەهێلین. هەڤڕکیێن خۆ یێن سیاسی ل سەر ئاستێ ناڤخۆ بکەین و ل سەر ئاستێ دەرڤە هەڤڕکیێ ب شکاندنا ئێک دو و بنپێکرنا پیرۆزیێن کوردستانێ نەکەین.

 

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.