ژنا كورد د شۆڕشێن كوردیدا

وافیدا چه‌لكى :

شۆڕش ئاگره‌كه‌ دناڤا ملله‌ته‌كێ‌ بنده‌ستدا دهێته‌ هه‌لكرن، ئه‌و ئاگره‌ یێ كو ب خوینا هزاران جه‌نگاوه‌رێن وی ملله‌تی دهێته‌ هه‌لكرن، ئه‌و ڤۆلكانه‌ یاكو ب درێژاهییا سه‌دان سالان دناڤخوه‌دا دسوژیت، رۆژه‌ك دهێت ئه‌و ڤۆلكان دته‌قیت و دبیته‌ رویباره‌كێ‌ ئاگری كو هه‌می كه‌سان ڤه‌دگریت، ئه‌و ڤۆلكان رۆژ بۆ رۆژێ‌ خورتر لێدهێت، هه‌تا ملله‌تی هه‌میێ ڤه‌دگریت، دناڤا ڤێ‌ ڤۆلكانێدا كه‌سانێن ئاگرین هه‌نه‌، كا چاوا ئاگر ژ ڤۆلكانێ‌ ده‌ردچیت، وه‌سا ئاگرێ‌ شۆڕشێ‌ ژ جه‌رگێ‌ وان دچیت، چونكه‌ ب درێژاهییا مێژوویێ‌ زولم لێ هاتییه‌كرن.
شۆڕشا گولانێ‌ ژی ئێكه‌ ژ وان شۆڕشێن هه‌ره‌مه‌زن، تمامكه‌را شۆڕشه‌كا مه‌زنبوو، ئه‌وژی شۆڕشا ئیلونێ بوو، وه‌ختێ شۆڕشا ئیلونێ بداوی هاتى، ملله‌تێ كورد هه‌ست ب ئێشانا وژدانێ‌ كر، چونكه‌ رژێما دكتاتۆر ب هه‌می شیانێن خوه‌ هه‌ولدان داكو ملله‌تێ كورد قڕبكه‌ت، لێ‌ ب وێ‌ باوه‌رییا كوردان هه‌یى و هه‌ول و تێكوشینا شۆڕشگێران، شۆڕش لدووڤ شۆڕشێ‌ هاتییه‌ داگیرسان ب سه‌ركردایه‌تییا كه‌سانێن دلسۆز و وه‌فادار، مینا مه‌لا مسته‌فا بارزانی كو سه‌ركرده‌یه‌كێ‌ قاره‌مان بوو، هه‌روه‌سا سه‌رۆك مه‌سعود بارزانى، ئه‌وێ‌ هه‌تا ئه‌ڤرۆ به‌رده‌وامی دایه‌ وێ‌ خه‌باتا پیرۆز، هه‌تا كو شیایی وێ‌ گه‌مییا مه‌زن یاكو به‌رهه‌مێن وان شۆڕشێن ئێك لدووڤ ئێك بگه‌هینیته‌ كه‌نارێ‌ ده‌ریایی كو هێشا ب دروستی نه‌هاتییه‌ سه‌قامگیركرن، چونكه‌ هێشتا خه‌بات به‌رده‌وامه. قاره‌مانیێن ملله‌تێ كورد كو قوربانیێ‌ دده‌ت داكو گه‌مییا وی به‌رهه‌مێ چه‌ندین شۆڕشان ل كه‌ناره‌كێ‌ ئارام رابگریت، لێ‌ چو شۆڕش بێی خه‌بات و قوربانی ناهێنه‌كرن.
د شۆڕشا گولانێدا، جه‌نگاوه‌رێن ملله‌تێ‌ كورد، ب تڤنگ و چانتكا خوه‌ خه‌بات دكر، ل ڤی چیایی بۆ ڤی چیایی، ل ڤێ‌ ده‌شت و نه‌هالێ‌ بۆ یادیتر، ل ڤی گوندی بۆ گوندێ‌ دیتر، ژ ڤی لایێ‌ دژمنی هه‌تا لایێ‌ دیتر دقادا خه‌بات و خوه‌گۆریكرنێدا بوون.
بلا ژبیر نه‌كه‌ین رۆلێ‌ وێ‌ ژنا دبن چه‌ل و چیایان ملبملێ زه‌لامیڤه‌، ب هه‌می شیانێن خوه‌ خه‌بات دكر، هنده‌ك ژن ئه‌وبوون یێن كو دگه‌ل پێشمه‌رگه‌یێن قاره‌مان ل ده‌ڤه‌رێن ئازادكری دگه‌ل زارۆیێن خوه‌ ب نان و زك هاریكار و پشته‌ڤانێن پێشمه‌رگه‌یێن قاره‌مان، ئانكو وان ژنان ب تنێ ب نان و زك دقه‌تاند كو لژێر هه‌می ره‌نگێن توپ و ته‌یارێن دژمنی بوون، شه‌ڤ و رۆژ تێكه‌ل دكرن، داكو نانه‌كی بۆ خیزانا خوه‌ چێبكه‌ن، دڤییا چانتكا زه‌لامێ‌ خوه‌ یێ پێشمه‌رگه‌ ژی پڕی نان بكه‌ن، پێدڤی بوو ب شه‌ڤێ‌ نه‌نڤستبان، داكو ئه‌و نان ئاماده‌كربا و سپێدێ زوو خوه‌ ژبه‌ر فرۆكه‌یێن دژمنان پاراستبا. یان ده‌مێ‌ پێشمه‌رگه‌یێن قاره‌مان ل وێ‌ هیڤیێ‌ بان داكو داستانه‌كێ‌ تومار بكه‌ن، هه‌می ل گونده‌كى كۆمڤه‌دبوون، دبیت خوارنا وان هه‌می پێشمه‌رگه‌یان ژنان ئاماده‌كربایه‌، داكو ئه‌و شیابان بچن وێ‌ داستانێ‌ تومار بكه‌ن.
گه‌له‌ك جاران پێشمه‌رگه‌ پێدڤیبوویه‌ كو خوارن و فیشه‌ك بۆ بچنه‌ به‌رۆكێن به‌رخوه‌دانێ‌، ژنێ‌ پارزینكێ‌ خوه‌ پڕی ئه‌و پێدڤییاتى كرییه‌ و گه‌هاندییه‌ وی جهێ‌ پێشمه‌رگه‌ لێ‌ ئاسێبووین، له‌و ژ مرنێ‌ قورتال دبوون. ئانكو شه‌ڤ و رۆژێن وێ‌ ژنێ‌ ئێكبوون، وێ ب قاره‌مانى خه‌بات دكر، پالپشتبوو بۆ پیشمه‌رگه‌ى، سه‌ره‌رایی وێ‌ ژیانا پڕی ده‌رد و مه‌ینه‌تێن وی سه‌رده‌می، لێ دڤییا ل وه‌رزێ هاڤینێ‌ ژی به‌رهه‌مه‌كێ‌ باشێ ده‌خلودانى هه‌بایه‌، داكو شیابا زڤستانا خوه‌ پێ‌ ببۆرینن، ئه‌ڤ كاره‌ ژى هه‌می دكه‌ڤته‌ سه‌رملێن وێ‌ ژنێ، لێ ئه‌و هه‌ر یا رازیبوو ب هه‌می خوه‌شی و نه‌خوه‌شیێن وی زه‌لامی، داكو ئه‌و زه‌لام ده‌ستان ژ دۆزا خوه‌ به‌رنه‌ده‌ت.
ئه‌ڤا لسه‌رى لسه‌ر ژیانا وێ‌ ژنا لناڤ شۆڕشێ بوو. لێ رۆلێ‌ وێ‌ ژنا ل گوندێن دكه‌ڤتنه‌ د ناڤبه‌را پێشمه‌رگه‌ و رژێما گۆڕبه‌گۆڕدا، رژێمێ‌ ده‌ستهه‌لات لێ‌ دكر، له‌و رۆلێ‌ وێ نه‌كێمه‌، چونكه‌ ئه‌وێ‌ ژی یا پێدڤی لسه‌ر ملێن خوه‌ ب ترس و له‌رز، ب شه‌ڤ و رۆژ تێكه‌ل دكرن، داكو خزمه‌تا پێشمه‌رگه‌ی بكه‌ت، و خوه‌ ژ دژمنی ژی بپارێزیت. ده‌مێ‌ پێشمه‌رگه‌ دهاته‌ سینۆرێن وان گوندان بۆ دووڤچوون یان توماركرنا داستانه‌كێ، ئه‌ركێ خوارن، شویشتنا جلوبه‌رگێن پێشمه‌رگه‌ی دكه‌ڤته‌ ستۆیێ‌ ژنێ، وان ژی ب هه‌می هه‌ست و دلسۆزى و كوردپه‌روه‌رییا خوه‌، شه‌ڤ و رۆژ دكرنه‌ ئیك داكو خزمه‌تا وان بكه‌ن، خوارن ب شه‌ڤێن نیڤ شه‌ڤان حازردكر، هه‌رسێ دان بۆ پێشمه‌رگه‌یان ره‌وانه‌دكرن، هنده‌ك جاران ژى ب پشتا خوه‌ هه‌می بدزیڤه‌ دگه‌هانده‌ دۆل و شكه‌فتێن چیایان، داكو دژمن چو گۆمانان ژێ نه‌به‌ن.
ژنێ ئه‌ڤ كاره‌ هه‌می كرینه‌، هنده‌ك جاران دناڤ دژمنیدا گولـله‌ گه‌هاندینه‌ پیشمه‌رگه‌ى، ب هێجه‌تا كرنا گلوگیاى، وان گیانێ خوه‌ دانایه‌ سه‌رده‌ستێ خوه‌، داكو بشێن خزمه‌تا ملله‌تێ‌ خوه‌ بكه‌ن، یان زه‌لامێ‌ وێ‌ شۆڕشگێربوویه‌، ئه‌و نه‌شیایه‌ ژبه‌ر كاودانێن خوه‌، خوه‌ بگه‌هینیته‌ جهێن ئازادكری، له‌و ب ده‌هان سالان هاتییه‌ زیندانكرن، ئه‌شكه‌نجه‌دان، داكو زه‌لامێ‌ وێ‌ به‌رده‌وامیێ ب شۆڕش و خه‌باتێ‌ بده‌ت، ئانكو ژنێن سه‌رده‌مێ شۆڕشان خوه‌ڕاگربووینه‌، په‌یام لدووڤ په‌یامێ بۆ زه‌لامێن‌ خوه‌ شاندینه‌، داكو ده‌ستان ژ خه‌باتێ‌ به‌رنه‌ده‌ن، چونكه‌ ددیت ئازادییا وان د لوولیێن تڤه‌نگێن واندایه‌، له‌و دئه‌نجامدا ب سه‌دان ژن بوویه‌ قوربان هه‌تا شۆڕشه‌ك هاتییه‌كرن، چونكه‌ ئه‌و ڤه‌شارتی نه‌بوون ژ توپ و ته‌یاره‌ و كیمیاباران و ئه‌نفال و ره‌ڤاندنێ.
ئه‌رێ كێمه‌ یاكو ژنا كورد كری؟ میناكین ڤێ‌ ژنێ‌ ل هه‌مى دونیایێ‌ دكێمن، چونكه‌ قاره‌مانه‌، دلسۆزه‌، وه‌فاداره‌، كوردپه‌روه‌ره‌، خه‌باتكه‌ره‌ و ده‌ست ژ خه‌باتێ‌ به‌رنه‌دایه‌، هه‌تا ڤێ چركێ‌ ژى، نوكه‌ ژی ملبملێ هه‌می زه‌لامێن كوردپه‌روه‌رڤه‌ خه‌باتێ‌ دكه‌ت بۆ گه‌هشتنا وێ‌ ئارمانجا پیرۆزا شۆڕش لدووڤ شۆڕشێ بۆ هاتییه‌كرن، ئه‌وژی ده‌وله‌تبوونا كوردستانێیه‌.

بابه‌تێن ب ڤێ مژارێ ڤه‌ گرێدای