چیڕۆكا فیلى و كۆره‌یان

وه‌رگێڕان و به‌رهه‌ڤكرن: فاضل عمر.
هه‌بوو نه‌بوو، كه‌س ژ مرۆڤان خوه‌هر و ڤیچتر نه‌بوو.
ل گونده‌كێ هندستانێ شه‌ش كۆره‌ هه‌بوون، پێكڤه‌ دژییان. 
كۆره‌یان ب ده‌هان چیڕۆكێن فیلان بهیست بوون، لێ هند به‌ختسپى نه‌بوون، ژ نێزیك ده‌ست بكه‌نه‌ فیله‌كى و بناسن. وه‌كو هوون دزانن، كۆره‌ ب ده‌ستكرنێ وێنه‌یه‌كێ هزرى بۆ خوه‌ چێدكه‌ن و تشتان وه‌سا دبینن و دناسن.
بۆ هه‌ر شه‌ش كۆره‌یان مه‌ره‌ق بوو، فیلى بناسن.
رۆژ هاتن رۆژ چوون، رۆژه‌كێ گوندیان ب كه‌نیڤه‌ ل كۆره‌یان كره‌ گازى، كو فیلێ راجاى هاتىیه‌ گوندى و وه‌رن لێ بنێڕن. هه‌لبه‌ت، بۆ كۆره‌یان، ئه‌ڤه‌ مزگینییه‌كا مه‌زن بوو. كۆره‌یان نه‌زانى دێ چاوا خوه‌ گه‌هیننه‌ مه‌یدانا گوندى و بالاكه‌نه‌ فیلى.


هه‌ر كۆره‌یه‌ك به‌زى گۆپالێ خوه،‌ و كه‌ڤته‌ رێ… یالى بابێ وى زوو بگه‌هت. ئێكه‌مین كۆره‌یێ گه‌هشتى، گۆت: كانێ فیل؟ كه‌سه‌كى ده‌ستێ وى گرت و ب لنگێ فیلى ڤه‌نا. دووه‌م كۆره‌ گه‌هشت و هه‌مان داخوازى كر، كه‌سه‌كى كورىیا فیلى دا ده‌ست، هۆسا كۆره‌یه‌كى له‌مبووس گرت، و یێ دى لامتۆر، و یێ دى گوهـ… شه‌شه‌م كۆره‌ى ژى، زكێ فیلى ب به‌ر ده‌ستێ وى كه‌ڤت.
گه‌له‌ك پێڤه‌ نه‌چوو، راجاى و یاوه‌رێن خوه‌ شۆلێ خوه‌ ل گوندى خلاسكر و هاتن. راجا ل فیلێ خوه‌، سوار بوو و چۆن.
خه‌لك ڤه‌ره‌ڤین و كۆره‌ به‌ره‌ڤ مالێ چۆن.
ب رێڤه‌، كۆره‌یێ كورى گرتى، گۆت: من نه‌دزانى فیل وه‌كو وه‌ریسىیه‌!
یێ لنگ گرتى گۆتێ: چى!؟ وه‌ریسێ چى، فیل وه‌كو ستوونێیه‌. 
یێ زك ده‌ستكرى، گۆت: هوون خه‌له‌تن! فیل وه‌كو دیواره‌كىیه‌.
هینگێ، یێ بالاكرىیه‌ گوهى، گۆت: ئه‌ڤه‌ هوون چ دبێژن! فیل وه‌كو باوه‌شینكه‌كا مه‌زنه‌.
یێ ده‌ستكرىیه‌ له‌مبووسان، گۆت: براینۆ! هوون خه‌له‌تن، ژ من وه‌ره‌؛ فیل وه‌كو تیرێیه‌.
كۆره‌یێ بالاكرىیه‌ لامتۆرێ (خوه‌ردم) فیلى، گۆت: كا راوه‌ستن، فیل وه‌كو هیچ تشته‌كێ وه‌ گۆتى نینه‌. فیل وه‌كو ماره‌كێ ئه‌ژده‌هایه‌.
هۆسا، هه‌ر كۆره‌یه‌كى شه‌ڕ بۆ دیتنا خوه‌ كر و یێن دى خه‌له‌تكرن… تاكو گه‌نگه‌شه‌ بوویه‌ قه‌رقه‌شه‌، و چو نه‌ماى ب گۆپالان راهێلنه‌ هه‌ڤدو. هینگێ، پیره‌مێره‌ك د به‌ر وان را بۆرى، و كۆره‌ د ئه‌وێ ره‌وشێ دا دیتن.
پیره‌مێر راوه‌ستا، و ژ كۆره‌یان پرسى: وه‌ خێره‌؟ قه‌رقه‌شه‌یا وه‌ لسه‌ر چىیه‌؟
كۆره‌یه‌كى گۆت: فیلێ راجاى هات بوو گوندى. مه‌ فیل نه‌دیت بوو، ئه‌م چۆنه‌ پێش، دا ببینین. به‌س هه‌ر ئێك ژ مه‌ دبێژت فیل وه‌كو تشته‌كییه‌. ئه‌م نه‌شێن لسه‌ر گۆتنه‌كێ ئێكدل بین، كانێ فیل وه‌كو چییه‌. ئو هه‌رئێكى ب گۆره‌ى دیتنا خوه،‌ كانێ فیل چاوایه‌، بۆ پیره‌مێرى گۆت.
وه‌ختێ پیره‌مێرى گۆتنێن كۆره‌یان بهیستین، پشكوڕى و گۆتێ: (هوون هه‌مى راستن. ئه‌گه‌رێ ئێكنه‌گرتنا وه‌ ئه‌وه‌، هه‌رئێك ژ وه‌، ده‌ستكرییه‌ جهه‌كێ جودا ژ فیلى. هه‌كه‌ر وه‌ راستى دڤێت، فیل وه‌كو ئه‌و هه‌مى تشتێن‌ وه‌ گۆتینه‌. دیتنێن وه‌ هه‌میان دبنه‌ فیل).
هه‌ر كۆره‌یه‌كى گۆت؛ هه‌ها!… من به‌س ئه‌ندامه‌كێ فیلى ده‌ستكرییه‌، من ئه‌ڤه‌ نه‌دزانى.
هۆسا، كۆره‌یان قه‌رقه‌شه‌ كوتاهكر، و پێكڤه‌ ڤه‌گه‌ڕانه‌ مالێ… و دگۆتن: مه‌ هه‌میان پێكڤه‌ فیل دیت.
ژێده‌ر:
ئه‌ڤ سه‌رهاتییه‌ ژ ئه‌ڤى ژێده‌رى هاتییه‌ به‌رهه‌ڤكرن:

ELEPHANT AND THE BLIND MEN
https://www.jainworld.com/literature/story25.htm

 

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.