نێچیرڤان بارزانى: بزاڤێن مه ‌بۆ راگرتنا شه‌ڕى به‌رده‌وامن

نێچیرڤان بارزانى: بزاڤێن مه ‌بۆ راگرتنا شه‌ڕى به‌رده‌وامن

WAAR-دهۆك:

سه‌رۆكێ هه‌رێما كوردستانێ دلگرانیا خوه ‌ژ هێرشا سه‌ر رۆژئاڤایێ كوردستانێ نیشاندا و راگه‌هاند: بزاڤێن وى بۆ راگرتنا شه‌ڕى به‌رده‌وامن و بۆ هه‌ر ناڤبه‌ینكاریه‌كێ ئاماده ‌یه‌.
نێچیرڤان بارزانى، سه‌رۆكێ هه‌رێما كوردستانێ راگه‌هاندنه‌ك ل دۆر ره‌وشا رۆژئاڤایێ كوردستانێ به‌لاڤ كر و دیار كر، هێرشا توركیا یا سه‌ر رۆژئاڤایێ كوردستانێ جهێ دلگرانیه‌كا مه‌زنه‌، ب تایبه‌ت كو گرۆپێن تۆندره‌و یێن ئۆپزسیۆنا سووریێ د هێرشێ دا پشكدارن و ئه‌ڤه‌ ژى دێ ده‌رگه‌هێ كوشتن و ده‌ربده‌رى و ئاواره‌بوونا خه‌لكێ سڤیل ڤه‌كه‌ت.
دا زانین ژى: هێرشا توركیا دێ ئاساییشا هه‌موو ده‌ڤه‌رێ تێكده‌ت و گه‌فا سه‌رهلدانا داعشێ رژدتر كه‌ت، له‌و شه‌ڕ د به‌رژه‌وه‌ندییا چ ئالییان دا نینه‌ و دێ ده‌ستكه‌فتێن پشتى تێكشكاندنا تیرۆرێ ژناڤ به‌ت.
نێچیرڤان بارزانى دوپات ژى كر، كو بزاڤێن وى بۆ راگرتنا شه‌ڕى به‌رده‌وامن و بۆ هه‌ر ناڤبه‌ینكاریه‌كێ ئاماده‌یه‌ و داخواز ژ جڤاكا نێڤده‌وله‌تى و جڤاتا ئاساییشێ ژى كر، چاره‌یه‌كا دادپه‌روه‌رانه ‌بۆ ره‌وشا سووریێ ببینیت، كو مافێ هه‌موو پێكهاته‌یان تێدا پاراستیبیت و رێ ل ئاواره‌بوونا خه‌لكێ سڤیل بگریت.
ل دوماهییا راگه‌هاندنێ ژى، سه‌رۆك نێچیرڤان بارزانى دا یه‌ زانین: هه‌رێما كوردستانێ قۆربانییێن مه‌زن د شه‌ڕێ دژى داعشێ دا داینه‌ و باش د مه‌ترسیا شه‌ڕى دگه‌هیت.

بابه‌تێن ب ڤێ مژارێ ڤه‌ گرێدای