مەزنترین کێشەیێن کوردان بێ تفاقی و بێ بەرهەمی و لۆبیگەرایی یە

مەزنترین کێشەیێن کوردان بێ تفاقی و بێ بەرهەمی و لۆبیگەرایی یە

دیار عەبدولعەزیز

کوردان دناڤا خوە دا هند ئەو جانێ هەڤرکییا ساخلەم نەبوویە هندی دژایەتی و هەڤدو رەتکرنێ ل هەمبەر هەڤ بکار دئینن! هند هزر د بەرهەم ئینان و خوە تەکوینکرنێ دا نەکرییە هندی بالا وی ل خوەشگۆزەرانی و بەرخۆرییێ! یاکۆ جهێ مەترسییێ ئەوە، ژ مێژ وەرە کوردستان یا معارزە بۆ هەر هێرش و وێرانکارییەکا ژ لایێ تالانچیێن دەردۆر ڤە، هەڤدەم کوردان هەم وەک گرۆپێن هەڤدژ و هەم وەک کۆم ژی ئەو شیانە نینن کۆ بکارن خوە ل هەمبەر هێز و هێرش و ژناڤبرنا دەردۆر و بەربەری و سەردەستێن خوە بگرن.

گەر ب هووری لێ بنێرین ژ ئالییەکی ڤە ئەو ب خوە بووینە ئاگر و ب جانێ خوە کەفتینە، ژ ئالییەک دن ڤە مومکین نینە بکارن مافێن خوە بستینن یان هەتا خوە هەمبەر ئاتاف و فەرهۆدچییان بپارێزن ژی، گەر هێشتا وێڤەتر بچین، ژ ئالیێ پەیوەندی و جیهانا ژ دەرڤە و لۆبی ڤە، نە بتنێ کوردان دۆست و هەڤپەیمانێن جدی نینن، بەلکۆ نەکارینە لۆبییەکێ جیهانی و بەرفرەهـ پەیدا بکەن. د هەستیارترین کاودان دا ئەوێن ئەم ب دۆست دزانین مە ژبیر دکەن، د بەرتەنگترین دەراڤ دا یێن مە ب هۆگر دیتن پشتا خوە دایە مە. دبیت ئەڤە ژی فاکتەرەك بیت کۆ یێن بەری مە پتر فۆکسا وان ل ژین و ژیارا وان بیت و دیتنا وان ژ بەر پێیێن وان دەرباز نەببیت. بۆ نموونە باپیرێن مە یێن جۆتیار ل هەمبەر زڤتستانێ ماتمایی دمان و ژ کەدا چاندنێ خوە تەسلیمی بەفر و سەقەمێ دکرن. یان ژی بەلکۆ نەبوونا تفاق و بەرهەمێ کۆمێ (تیم وۆرک) بوو کۆ مە گەلەک گۆتن هەبن، ئەو گۆتنە نەبوونا باوەرییێ دناڤبەرا هەڤال و کۆمان دا بسەلمینن، هەر وەکی ڤان گۆتنان؛ (سڤۆرە و بەر و ملێن خوە، پەز و پێپکا خوە، رەشۆ ب دەستێن خوە هەکە ئاڤێ تو بری، ئێشا ل هەڤالی و تیرا ل کەندالی..) راستە گەلەک جاران خوە ئاڤاکرن و پشتبەستنا ل سەر خوە ب تنێ گرنگییا خوە هەیە و گەلەک فەیلەسۆف و زانایان ژی تەکەز ل وێ یەکێ کرییە. لێ دەما مللەتەك مینا مە بندەست و بێ ژێرخانە و بێ کەس و هۆگر بیت، گەرەکە پتر هەڤگرتن و تفاق هەبیت.. کورتر رهـ و ریشالێن خوە د دیرۆک و کەلتوورێ خوە دا ببەنە خوار.. بەروڤاژی ڤێ یەکێ مە دیرۆکا خوە یا پری تراژیدییا و جینۆساید و شکەستن و قەیران ژ بیر کرن و مە چ پەند و سەربۆر ژێ وەرنگرتن! ل جهێ ئەم ژی موساهەمەیێ د ئابۆر و سیاسەت و کەلتوورێ جیهانی دا بکەین، مە ئابۆرا خوە سۆت و بووینە بەرخۆرێن خەلکی! مە ژ بێ تفاقی وەلاتێ خوە پەرتاند و هەر پرتەك ب دەست هۆڤەکی ڤە بەردا! ل جهێ ببینە پرەك دگەل جیهانێ، مە خوە ل دەرییێ کەنالەکی چکلاند، کۆ ب بێی پشکدارییا مە، ب تەنێ بریار و بوویەر وەکی وان دڤێن بەر ب مە ڤە دهێن، بێی مە بەرهەمدان و بریار و پشکدارییا خوە هەبیت! کەنالەکە لەهییێن وان بەر ب مە دڤێن و پەترۆلا مە بەر ب وان.

ئەو کت و ماتێن ئەم ب دۆست و هەڤپەیمان دبینین پتر د رووکەشن، هندە جاران هەلوەست و بێ دەنگی و خوە خشیمکرنا وان وێ گومانێ بۆ مە چێ دکەن کۆ دۆستێن مە ژ چارچووڤەیێ پەیوەندییێن بزنس و بازرگانییێ دەرنەکەفتینە. کەواتە هێشتا مە ئەو قەناعەت بۆ وەلاتێن پێشکەفتی و زلهێزان پەیدا نەکرییە کۆ ئەم ژی خوەدی ماف و ئەرکین، لەورا گەلەک جاران د بوویەر و پێشهاتێن هەرێمی دا، نە ب تەنێ کورد ل بەرچاڤ ناهێنە وەرگرتن، بەلکۆ هەر د چ حیساباتان ژی دا نینن! ئەم دوور ناچین و باس ل بوویەر و کێشەیێن دیرۆکی ناکەین.

نە ژ مێژە بوو کۆمارا مهابادێ د ناڤبەرا چاڤ و بریان دا هەلوەشیایی، دهی بوو گۆرگان ل بەر چاڤێن دنیایێ ئاگر بەردا زەیتوونێن عەفرینێ و کەسەکی ژ ژ زلهێز و بەرژەوەندخوازێن ب ناڤ رزگارکەرێن جیهانی خوە مییەك ژ خوە شاش نەکر. ل ڤێ پارچا ئازاد، ئەو پرتا ب قیبەلەیا کوردان دهێت ناڤکرن کۆ هەرێما کوردستانێ یە، پشتی برس و وەستیان و کریز و جەنگێ تێرۆرێ، مە دەست ب چێکرنا ئاڤاهییەکی کر چەندین سال بوو تەڤ کوردان ل هەر دەرێ خەون پێڤە ددیتن، ل بن چەترا ریفراندۆمێ یەکەم جار بوو پترییا کوردان ب یەک دل و یەک هەلوەست، وەکی پەقینا کانییان و چوونا جۆباران رووبارێ سەرخوەبوونێ چێکر، پاشی سەرێ مە ب سکرەکێ ئازادیکوژ کەفت و رووبارێ مە هاتە سڕکرن! ژبەرکۆ هەموو جیهانێ نەهێلا خەونا خوەیا سەرخوەبوونێ د ئاڤاهیێ هەڤگرتن و ئێکرێزیێ دا ئاکنجی بکەین، رێفراندۆم ب تەجاوز و مەترسی هاتە ل قەلەم دان. ل ئالییێ دی، نها رۆژئاڤا یا ل سەر دەرازینکا بوهژینێ، ل سلال، ئەڤرۆ سێ باژارێن باکۆر ژی (ئامەد، وان و مێردین) ب زرتەکی هاتنە دوورپێچکرن بەرهەم و کەدا خەلکێ وێرێ هاتە خوارن و مافێن وان هاتنە تێکدان. ل ڤان بوویەر و کاودانێن نەخۆش، کورد مادەم هەڤ نەگرن پیدڤییە هەما هەر ئێك د هزر و دلێ خوە دا ڤان پرسیاران بکەت؛ کا هێز و ئیرادەیا کوردان؟ کا یەکگرتن و تفاق؟ ئەم دێ ب چ تشتی پشتبەستنێ ل سەر خوە بکەین؟ کا دۆست و هەڤال و هەڤپەیمان؟!
بلا ئەم ژبیر نەکەین کۆ نها مە هەرێمەكا ئازاد هەیە، لێ گەر بەرژەوەندی بخوازن و کوردان بەرهەڤی و هێزا خوە یا تایبەت نەبیت، چ ئەڤ هێزە یا ناڤخوە و ب ئێکرێزی بیت یان هێزەکا جیهانی یا هەڤال بیت، ب هەبوونا ڤی ئابوورێ رەیعی و موبالەغەیا مە د بەرخۆرییێ دا، دیسان ب نەبوونا بەرهەمەکێ ناڤخوە و نەبوونا چ پلانێن ستراتیژی یێن بەرهەمدار، نە یا دوورە هەرێما مە ژی ب دەردێ خوشکێن خوە ئامەد، مهاباد و عەفرینێ بچیت.

بابه‌تێن ب ڤێ مژارێ ڤه‌ گرێدای