سیسته‌مێ په‌روه‌ردێ بوویه‌ ته‌شیك د ده‌ستێ وه‌زیرێن وێ دا

سیسته‌مێ په‌روه‌ردێ بوویه‌ ته‌شیك د ده‌ستێ وه‌زیرێن وێ دا

كاوه‌ ئالیخان

هندی مه‌ گوهلێبووی خه‌لك ده‌ما به‌حسا ئاڤاكرنا ده‌وله‌تا خوه‌ دكه‌ت ئێكه‌م پێنگاڤ ژ په‌روه‌ردێ ده‌ستپێدكه‌ت، ب ره‌نگه‌كی كو سیسته‌مه‌كا ب رێك و پێك یا دیراسه‌تكری دهێت دانان، دا كو نڤشێن نوو ل سه‌ر بهێنه‌ په‌روه‌رده‌كرن و گه‌نجێن وێ بشێن پاشه‌رۆژه‌كێ بۆ خوه‌ و گه‌لێ خوه‌ دابین بكه‌ن، لێ یا دبینم ل هه‌رێما كوردستانێ سیسته‌ما په‌روه‌ردێ یا بوویه‌ ته‌شیك د ده‌ستێ وه‌زیرێن په‌روه‌ردێ دا.
ل ڤێره‌ من دڤێت ئاماژێ بده‌م دوماهیك بریارێن وه‌زیرێ په‌روه‌ردێ یێ حكومه‌تا هه‌رێما كوردستانێ ئه‌و ژی هه‌لوه‌شاندنا بریارا ب ئنگلیزیكرنا هه‌ردو بابه‌تێن بیركاری و زانستێن گشتی یێن قۆناغا بنه‌ره‌ته‌، كو ژ سالا 2015 – 2016 ده‌ستپێكری، پرسیار ئه‌وه‌ جارێ ئنگلیزیكرنا وان هه‌ردو بابه‌تان هاتبوو دیراسه‌تكرن یان نه، ئه‌رێ ل سه‌ر بنه‌مایه‌كێ دروست و د به‌رژه‌وه‌ندییا قوتابی و په‌روه‌رده‌یێ دابوو یان ژی نه، ئه‌رێ چه‌ند زیان و مفا گه‌هشتینه‌ قوتابی ب دانان یا راكرنا وێ‌‌، به‌ری كو مرۆڤ هه‌لسه‌نگاندنا بریارێ بكه‌ت وه‌ها دیار دبیت هه‌ر وه‌زیره‌ك ب كه‌یفا خوه‌ سه‌ره‌ده‌ریێ ل گه‌ل بریارێن چاره‌نڤیسازێن خواندنێ دكه‌ت، ژ به‌ركو گه‌ر سیسته‌مه‌كێ دروست هه‌با وه‌زیر نه‌دشییا ب بریاره‌كێ وی سیسته‌می ب گوهوریت و په‌رێ وه‌كی به‌رێ ب زڤرینیت.
ڤێجا ترسا مه‌زن ئه‌ڤه‌ نینه‌، گه‌لو ئه‌گه‌ر سحبه‌ت ل سه‌ر ڤی شێوه‌ی بیت و سیسته‌مه‌كێ دروست یێ خواندنێ ل هه‌رێمێ نه‌بیت، ئه‌رێ ده‌ما وه‌زیره‌كێ نوو بهێت بریارێن یێن پشتی خوه‌ نا هه‌لوه‌شینیت، تنێ بۆ هندێ شوون تبلێت خو دیاربكه‌ت بێی هزركرن یان دیراسه‌تكرن، ژبه‌ركو بریارێن وه‌زیرێ به‌ری نها ده‌ركرین، رامانا وێ ئه‌وه‌ كه‌س نه‌دشییا بێژیت ئه‌ڤه‌ پێنگاڤه‌كا شاشه،‌ یان ژى دبیت شاره‌زایێن په‌روه‌ردێ بۆ خوه‌شرینكرنێ پشته‌ڤانی ل بریارا هه‌لوه‌شاندنا هه‌ردو بابه‌تان كربیت.
له‌و ل ڤێره‌ دێ گازییا خوه‌ گه‌هینم هه‌رسێ سه‌رۆكاتییێن هه‌رێما كوردستانێ د هه‌وارا سیسته‌مێ په‌روه‌ردێ بچن و كه‌سێن شاره‌زا ده‌ستنیشان بكه‌ن بۆ دانانا سیسته‌مه‌كێ دروست، كو نه‌ هه‌ر وه‌زیره‌ك بهێت و بریارێن ب دلێ خوه‌ ده‌ربكه‌ت و دیسان پێداچوونه‌ك رژد ل گشت سێكته‌رێن په‌روه‌ردێ دا بهێت كرن بۆ وێ یه‌كێ ئه‌و سیسته‌م ژ میزاجێ وه‌زیران رزگارببیت.
دیسان هیڤیا من ئه‌وه‌ وه‌زاره‌تا په‌روه‌ردێ و شاره‌زایێن په‌روه‌ردێ پتر خه‌ما قوتابیێن خوه‌ بخوون، ژبه‌ركو دێ ل به‌ر وان قوتابیان ژى به‌رزه‌ بیت ب چ زمان بخوینن، دیسان پێدڤییه‌ وه‌زاره‌تا په‌روه‌ردێ به‌ری ده‌ركرنا هه‌ر بریاره‌كێ خواندنێ بۆ ره‌نگڤه‌دانا وێ بكه‌ت كا دێ ل پاشه‌رۆژێ چ رووده‌ت و جڤاته‌ك ژ شاره‌زایێن په‌روه‌ردێ بهێت پێكئینان و بێی وێ جڤاتێ چ بریار نه‌هێن ده‌ركرن، كو وه‌زیر ژى هه‌ر بریاره‌كا ده‌ربكه‌ت ب رێیا وێ جڤاتێ بیت.
لڤێره‌ ئه‌گه‌ر وه‌سان نه‌بیت، راستى سیسته‌م بوویه‌ ته‌شیك د ده‌ستێن وه‌زیرێن په‌روه‌ردێ دا هه‌ر ئێكێ هات سیسته‌مه‌ك ل گه‌ل خوه‌ ئینا و سیسته‌مێ وه‌زیرێ به‌ری خوه‌ هه‌لوه‌شینیت، ئانكو ئه‌و وه‌زیرێ به‌ری نها كارێ وی یێ شاش بوو و ئه‌گه‌ر راسته‌ شاشی كربیت پێدڤییه‌ لێپرسین ل گه‌ل بهێت كرن، ژبه‌ركو پاشه‌رۆژا گه‌لی ل سه‌ر مللێن قوتابییانه‌ و قوتابی ژى ب ره‌نگێ نها چ پاشه‌رۆژ نابن.

بابه‌تێن ب ڤێ مژارێ ڤه‌ گرێدای