سۆیلو: ل ھەمبەر تیرۆرێ نەرم نابین

سۆیلو: ل ھەمبەر تیرۆرێ نەرم نابین

WAAR-دهوك:

وەزیرێ ناڤخوە یێ تورکیا دیار کر کو ھەڤشارەدارێن ھەدەپێ یێن دوورخستی پشتەڤانییا تیرۆرێ دکر و ئەو ل ھەمبەر وێ یەکێ بێدەنگ و نەرم نابن.
سلێمان سۆیلو، وەزیرێ ناڤخوە یێ تورکیا ل دۆر بریارا وەزارەتا خوە یا دوورخستنا ھەڤشارەدارێن ئامەد، وان و مێردینێ و دانانا قەیوومان ل شوونا وان، راگەھاند: ب رێیا شارەدارییان ھەول ھات دان یاسا و دیمۆکراسی ژ کار بھێت خستن یان ب مفاوەرگرتنێ ژ دیمۆکراسییا تورکیا و دەنگێن حەلال یێن گەلی، رکمانییا دەولەتێ بھێت کرن و تورکیا ببیت ناڤەندا تیرۆرێ، لێ دەستووری و یاسایێن شارەدارییان بەرسڤا وان ھەولان دا.
سۆیلویی گۆت ژی: ئالییێن دخوازن ژی دیمۆکراسی و ھەلبژارتنان بێخنە د خزمەتا لێبوورینا تیرۆرێ دا و رێرەوەکێ شەرعی د ناڤبەرا تیرۆر و دیمۆکراسییێ دا ڤەبکەن، ب پشتراستی شاشییەکا مەزن و کارەکێ نەبەرپرسیارانە دکەن.
وەزیرێ ناڤخوە یێ تورکیا ھەروەسا ئاماژە دا کو ئەوێن بزاڤێ دکەن دەولەت د گەل تیرۆرێ دا نەرم ژی بیت، گەلەک شاشن، ژ بەر کو ئەو رێ نادەن ھەلبژارتن و دەستوور د خزمەتا تیرۆرێ دا بن و گرنگترین ئەرکێ یاسا و دیمۆکراسییێ دەنگێن پاک یێن خەلکی نەکەڤن بن رکێفا تیرۆرێ.

بابه‌تێن ب ڤێ مژارێ ڤه‌ گرێدای