رۆژئاڤا پێدڤی ب چ جۆرە پشتەڤانی یە؟

رۆژئاڤا پێدڤی ب چ جۆرە پشتەڤانی یە؟

 کاوار نێروەیی

“هەمی دەمان بەرگرییا لەشکەری نە هەلویستەکێ ئەرێنی یە”!

پشتی کێشەیا کوردی، ژ سنورێن وەڵاتێن ئەقلیمی دەربازی مێزا گفتۆگۆیا نیڤدەولەتی بوویی، ب هەمی شێوەیەکێ وەڵاتێن کوردستان ل سەر هاتیە دابەشکرن، هەمی هەول و بزاڤان دکەن ڤی بابەتی پاشڤە بزڤرینن، داکو هیچ دەرئەنجامەک نەبیتن. چونکی ئەو وەڵات باش دزانن رۆژهەلاتا ناڤین  بەر ب پێلەکا گۆهەرینکارییان ڤە دچیت و گۆهەرینکارییەکا جیۆسیاسی یا د دەڤەرێ دا رووی بدەت نە د بەرژەژەندییا واندایە، بەلکۆ دێ د زەرەرمەندبن. لەوما پشتی رێفراندۆما سەرخوەبوونا هەرێما کوردستانێ هاتییە ئەنجام دان، ب هەمی رەنگەکێ لەشکەری سیاسی، ئابۆری، دبلۆماسی، دەستووری، هاتن هەرێما کوردستانێ ژناڤ ببەن، لێ ب کارێزمایا سەرۆک بارزانی و سەرکردایەتییا سیاسی یا کوردستانی و قەهرەمانییا پێشمەرگەی، هەرێما کوردستانێ شیا خوە رابگڕیت و دوبارە ڤەژاندنێ بدەتە پرۆسا خوەیا سیاسی. لێ ئەڤ دژایەتیکرنە نە راوەستیایە و ناراوەستیتن ژی. ئەوا ئەڤرۆ ل رۆژئاڤایێ کوردستانێ ژی دهێتە ئەنجام دان، درێژە پێدەرا هەمان سیاسەتا دژایەتیکرن و ژناڤبرن و لاوازکرنا کیانێ سیاسی یێ کوردی یە ژلایێ وەڵاتێن ئەقلیمی ڤە، ئەڤجا بۆ خوەپاراستن و بەرگریکرن ژ دەستکەفتێن خوە، هەمی دەمان بەرسینگ گرتن و راگەهاندنا شەری نینە دگەل دوژمنی، شەر مەبەستا من پێ شەرێ (فیزیکی) ب تایبەتی دەما پێشوەخت بزانی دوژمنێ تە ژ لایەنێ سەربازی ڤە گەلەک ژتە بهێزترە، کەواتە گەلەک گرنگە پەنایێ بۆ کەناڵێن جودا ببەی، داکو بەرگریێ ژ خوە بکەی و بشێی خوە رابگری و بپارێزی. ب چ شێوە پشتەڤانێن رۆژئاڤا بین؟ گرنگە ئەڤرۆ سەرکردێن سیاسی یێن کوردێن هەرچوار پارچێن کوردستانی و پارتێن سیاسی ئێک هەلویسیتییا خوە یا مەبدەئی بدەنە دیارکرن ژبۆپشتەڤانیکرنا کوردێن رۆژئاڤا و تایبەتی باشوورێ کوردستانێ پەیوەندیێن خوە یێن دبلۆماسی ژی بکاربینیت ژبۆ گۆهەرینا هەلویستێ وەلاتێن رۆژئاڤا و ئەمریکا بهێتەکرن دەربارەیی رۆژئاڤایێ کوردسانێ. میکانیزما کارکرنا وان ب رێیا هێزا نەرم بیتن، وەکو دهێتە دیتن پشتی بریاردان و دەستپێکرنا هێرشا لەشکەرییا تورکیا ل سەر رۆژ ئاڤایێ کوردستانێ، رایەکا نەرازیبوونا گشتی یا جیهانی ب رێیا راگەهاندن و سۆشیال میدیایێ دروست بوویە، ئەڤە ژی دەلیڤەیەکە بۆ کوردان کار ل سەر بکەن هەم ل سەر ئاستێ ناڤخوەیی یا پارچێن کوردستانی و هەم ل سەر ئاستێ دەرڤە ب رێیا رەڤەندا کورد ل  سەرانسەری دونیایێ. ب رێ یێن جودا جودا خرڤەبوون و مەشێن نەرازیبوونێ ئەنجام بدەن و تێدا نەخشە و ئالایێ کوردستانێ بلند بکەن و داخوازا پاراستنا کوردان و راگرتنا هێرشێن لەشکەرێ تورکیا بکەن ل سەر رۆژئاڤایێ کوردستانێ. چونکە بۆ دونیا دەرڤە ژی مەرەما راستی یا تورکیا دیاربوویە، دژایەتییا کیانێ کوردیێ پەکەکێ نینە، بەلکو ئارمانج ژناڤبرنا نەتەوا کوردە. دڤێت کارل سەر ڤێ چەندێ بهێتەکرن، بۆ ڤێ چەندێ گرنگە مفایی ژ سەربۆرا وان وەڵاتێن دونیایێ یێن کو هەمان دەردێ مە هەبووین وەربگرین، یێن کو دشیاین ب رێیا هێزا نەرم دونیایێ بیننە سەرخەت و ب رێیا وان بەرەڤانیێ ژ خوە بکەن مینا گەلێ جووهی، کا چەوا ل سالێن 1939 – 1947 – 1967 کارل سەر رایا گشتی یا جیهانی کر و هەتا ئەڤرۆ ژی وەڵاتێن دونیایێ هەست و دلینییەک دگەل دا هەیە وەکو کەمینەیەک د رۆژهەڵاتا ناڤین دا و بەردەوام دهێنە پاراستن.

ژبیرنەکەین تورکیا د قوناغا خوەیا لاواز دایە، بەلگە ژی ل سەر ڤێ چەندێ هەردەما دەولەتێ پەنا برە بەر هێزا رەق نیشانا لاوازییا وێ یە. لەوما باشترین بژاردە دڤێ قوناغێ دا بکارئینانا هێزا نەرمە هەم ل سەر ئاستێ ئەقلیمی خوە نێزیکی سعودی و مسرێ بکەین و ل سەر ئاستێ هەردو بلۆکێن ئەمریکی و رووسی، ب رێیێن مەدەنی و دبلۆماسی کۆدەنگیەکێ دروست بکەین. لەوما پێشبینی دکەم، ئەگەر ئاسمانێ سووریا ژڵایێ تورکیا ڤە نەهێتە بکارئینان ئەڤ شەرە نێزیکی 6 مەهان ڤەکێشیتن، ئەڤە ژی وەختەکێ درێژە ئەگەر ب نیمچە ئێکگرتی و دبلۆماسی کار بهێتە کرن، دێ دەرئەنجامەک ئەرێنی بدەست مە ڤە هێتن. چونکە ئەگەر هات و کیانێ سیاسی یێ رۆژئاڤا ژناڤ چوو، سەرەرای هەبوونا سەدان تێبینی و گلەو رەخنە لسەر شێواز و پرۆسا سیاسی یا وان، لێ دەرئەنجام دێ بیتە حەندقاندنا باشورێ کوردستانێ. هەردەما تورکیا و ئیراقێ بڤێت هەر گەماروویەکا سیاسی، ئابۆری دێ لسەر مە سەپینن و دێ ڤەگەرینە چوار گوشا خویا دەستپێکی.

بابه‌تێن ب ڤێ مژارێ ڤه‌ گرێدای