دەمیرتاشی خەلاتێ ئازاییا سیاسی بدەست خست

دەمیرتاشی خەلاتێ ئازاییا سیاسی بدەست خست

WAAR-دهۆك:

ھەڤسەرۆکێ زیندانکری یێ ھەدەپێ خەلاتێ ئازاییا سیاسی یێ سازییا ھەڤپەیمانییا پێشکەفتنخواز بدەست خست.
سازییا ھەڤپەیمانییا پێشکەفتنخواز د ئاھەنگا خوە یا پێشکێشکرنا خەلاتێ ئازاییا سیاسی دا کو ئەڤ سالە ل ستۆکھۆلما پایتەختا سویدێ رێکخستبوو، ئەو خەلاتە پێشکێشی سەلاحەددین دەمریتاش، ھەڤسەرۆکێ بەرێ و زیندانکری یێ پارتییا ھەرێمان یا دیمۆکراتیک، ھەدەپێ کر و ھەڤژینا وی باشاک دەمیرتاشێ خەلات وەرگرت.
باشاک دەمیرتاشێ د ئاھەنگا وەرگرتنا خەلاتی دا پەیڤا دەمریتاشی ل دۆر وەرگرتنا خەلاتی خواند کو د زیندانێ دا نڤیسییە و گۆتییە: ئەو دێ ب ھەموو ھێزا خوە ل سەر بەرھنگاربوونا زلمێ بەردەوام بن و زێدەباری ھەموو فشاران، دەستبەرداری پرەنسیپ و بھایێن خوە نابن و ئازاییا وان ژ گەلێ وان ھاتییە وەرگرتن.
دەمرتاشی گۆت ژی: ئەو وێ دیارییێ ل شوونا ھەڤرێیێن خوە یێن د زیندانێن تورکیا دا، وەردگریت و پێشکێشی گەلێن تورکیا دکەت، تایبەت گەلێ کورد.
سازییا ھەڤپەیمانییا پێشکەفتنخواز، ل سالا ٢٠١٣ێ ل سەر بنگەھا پرەنسیپێن دیمۆکراسییێ، یەکسانییا رەگەزی، دادپەروەری، مافێن مرۆڤی، ئاشتی و بەرھنگاربوونا گوھەرینێن سەقایی ل ئەلمانییا ھاتییە دامەزراندن و سەد و چار رێکخستنێن ل سەرانسەری جیھانێ ئەندامێن وێ نە، ژ وان ژی ھەدەپە ل باکۆرێ کوردستانێ و جەھەپێ ل تورکیا.

بابه‌تێن ب ڤێ مژارێ ڤه‌ گرێدای