ده‌مارگيرى و بێده‌را رێفراندؤمێ

ته‌حسين ناڤشكى

پرانييا زانايێن ده‌روونناسى وه‌ها دبينن كو ژێبوونا كۆره‌ بۆ هه‌ر گرۆپه‌كى جڤاكى دبته‌ ئه‌گه‌رێ په‌يدابوونا هاريكارييا كۆره‌ د ناڤ هه‌يكه‌لێ وێ كۆمبه‌ندێ دا. هه‌كه‌ ئه‌م بهێن و ڤێ ديتنێ لسه‌ر جه‌ماوه‌رێ پالپشتييه‌كا ب هێز بۆ وان حزبێن كوردستانێ دكر ئه‌وێن ده‌ستهه‌لاتا وان ب هێز و پرۆژه‌يێ ئه‌نجامدانا ريفراندۆمێ بۆ سه‌رخوه‌بۆنا كوردستانێ په‌يروه‌كرى، پرانييا ان ئه‌و جه‌ماوه‌ر بوو يێ كو ژێبوونا وان لسه‌ر بناغه‌يێ ژێبوونه‌كا كۆره‌يا ڤى لايى و لايێ دى هه‌يى ب ئارمانجا حه‌زژێكرنا نه‌ته‌وه‌يا خوه‌ هه‌تا سه‌رهه‌ستى هه‌يى. هه‌كه‌ ئه‌م بهێن و پێناسييه‌كا كورت گۆره‌ى ديتنا ده‌روونناسان ب ده‌ينه تێگه‌هێ‌ ده‌مارگيريێ، دێ هۆسا خويابت: ده‌مارگيرى دۆخه‌كه‌ كو هه‌لچۆن كۆنترۆلێ لسه‌ر لۆژيكێ ئه‌قلى دكه‌ت و ئه‌نجامێن وێ پرانيا جاران ريسك و خوه‌ هاڤێژتنا مرنێيه‌ (مغامره‌)! هه‌چيێ نێزيكى ژيوارى و خواندنا وى بۆ پرۆژه‌يێ ريفراندۆمێ و كارتێكرنا فاكته‌رێن ده‌رانى و خۆيانى لسه‌ر ئه‌نجامێن وێ پێشبينى دكر كو ئه‌ڤ شه‌رمزارى و شكه‌ستنا نها ب سه‌رێ هه‌رێما كوردستانێ دهێت دێ نێزيك ب سه‌رى هێت. لێ ئاريشه‌ ئه‌و بوو، راسته‌ ئه‌ڤ رێژه‌يه‌ دبت پتر بت ژ رێژه‌يا كه‌سانێن گيانێ ده‌مارگيريێ گرتين، لێ هنده‌كا ژ وان ژ به‌ر به‌رژه‌وه‌نديێن خوه‌ يێن به‌رته‌نگ، تايبه‌ت ته‌خه‌يا ره‌وشه‌نبيران و خودان شيانێن جۆراوجۆر، باشترین هه‌لوه‌ست، بێده‌نگى دپاراست و هه‌لوه‌ستێ گه‌له‌كا ژ وان هه‌تا نها ژى كێمترين باوه‌ردارييه‌.. ئه‌ڤێن دئاخڤن ژى تايبه‌ت ل ده‌ڤه‌را زه‌ر گه‌له‌ك جاران ئه‌و ژى دگه‌هشتنه‌ سينۆره‌كى و د دولدبوون كو وێڤه‌تر بچن، ژ به‌ر كو ئاليێ ده‌مارگيرى ب وه‌رقه‌يا ناسيۆنالزمێ دخۆرين و هه‌ر كه‌سێ لۆژيكى و ب ئه‌قلى ئاخاڤتبا ب خيانه‌تێ و ده‌سكيسيا دژمنێن ملله‌تى ل قه‌له‌مدا و د وێ گاڤێ دا نۆرمال بوو گرۆپه‌ك ژ وان گه‌نجێن ب هێڤێنێ ده‌وله‌تێ هاتينه‌ په‌روه‌رده‌كرن، ژيانا كه‌سێ راستگۆ بێخته‌ د خه‌ته‌ره‌كا سۆر دا؛ هینگێ گه‌له‌ك ژ پشته‌ڤانێن وان دا بۆ ده‌ستان قوتن كو خائین ب مافێ گه‌ل را گه‌هشتن! هۆسا رۆژاهاتن و هه‌يڤ بۆهرين و سه‌ره‌رايى نه‌رازيبوونا ته‌ڤ دۆست و نه‌ياران كو ئه‌ڤ ريفراندۆمه‌ د به‌رژه‌وه‌ندييا ملله‌تێ كورد دا نينه‌ نها بهێت ئه‌نجامدان، لێ ئه‌و كه‌سێن ده‌ست بۆ ليژنا ريفراندۆمێ د قوتان و ب هه‌ر ره‌نگێ هه‌يى ياريگه‌هێن ته‌پانێ تژى مرۆڤ دكرن و بێ مه‌ى سه‌رمه‌ست دبوون، وه‌ ل ده‌سته‌يا ريفراندۆمێ كر كو هه‌لچۆن پرانييا ئه‌قلێ وان بگرت و ل ژێر سيهوانا ئازراندنا باده‌كا نه‌ته‌وه‌يى رژدبن كو چ بقه‌مت، ئه‌و ڤێ خه‌ونا نه‌ته‌وه‌يى بجهبينن و ئه‌و به‌رهه‌ڤبن پاشى باجا وێ بده‌ن! ((سلاڤ ل سفرا حازره‌)) يا چۆيى چۆ، من گرتى خه‌لكه‌ك هاته‌ خاپاندن يان ته‌خمينێن وان دروستده‌رنه‌كه‌تن يان دژمنان وه‌ك هه‌ر جار خيانه‌ته‌ كر…. هتد. ب هه‌ر ره‌نگێ بت، ريفراندۆم هاته‌ كرن و هه‌ر ئالييه‌كى باجا وێ دا تايبه‌ت خه‌لكێ دلسۆزێ نه‌ته‌وه‌يا خوه‌ و ره‌وشا دانا باجێ هێشتا به‌رده‌وامه‌… راسته‌ د هه‌ر يارييه‌كێ دا پهتر ئالييه‌ك سه‌ركه‌ڤتييه‌ و ئاليێ دن دۆراندييه‌. من گرتى كورد ڤێ جارێ ژى هاتينه‌ دۆراندن، لێ رامان ژێ ئه‌و نينه‌ خوه‌ راده‌ستى قه‌ده‌را مرنێ بكه‌ن؛ ژ به‌ر كو ئه‌ڤه‌ نه‌جارا ئێكێ يه‌ د درێژيا ديرۆكێ دا ئه‌ڤه‌ ب سه‌رێ ملله‌تێ كورد دهێت. پرسيارێن دهێن: ئه‌رێ‌ ئه‌م نها چ بكه‌ين. راده‌ستى ديفاكتۆيى ببين و د دستوور و په‌رله‌مانێن ئيراقێ دا ل دووڤ مه‌رجێن ئيراقێ دانوستاندنان بكه‌ين. يان ئێكرێزيێ مكوم بكه‌ين و شه‌ڕێ خوه‌ بكه‌ين و چ لێدهێت بلا وه‌لێ بهێت، مه‌ هه‌ر يا كرى. يان بهێلين هه‌رێم ب كريار دو پارچه‌ و سێ پارچه‌ ببت و ئه‌و بۆياغا هنده‌ ساله‌ ب ناڤێ هه‌رێما هه‌ڤگرتى ژ سه‌ر راكه‌ين. واته‌ ئه‌ڤا هه‌تا نها هاتييه‌ سه‌رێ مه‌ ئه‌نجامێ وێ ده‌مارگيرييه‌ خوه‌ ب سه‌ر ئه‌قلى و لۆژيكى داديه‌ و ره‌نگه‌ هێشتا سه‌رێ گه‌له‌ك خه‌لكێ مه‌ تايبه‌ت سه‌ركێش و رێبه‌رێن ڤى ملله‌تى به‌رنه‌دابت. ئه‌ز وه‌سا دبينم، هه‌كه‌ هات و ئه‌ڤ ره‌وشه‌ به‌رده‌وام بوو، تنێ وه‌لاتێن زلهێز نيڤه‌كا دارى گرت و و سه‌ركرداتييێن هه‌رێمێ ژى هه‌ر ئێكى وه‌ ك خوه‌ كر، بێده‌را ره‌هه‌ند و (ته‌داعياتێن) كاره‌ساتا ژ 16-10-2017 ده‌ستپێكرى دێ به‌رفره‌هتر لێ هێن و باجه‌ دێ هێشتا مه‌زنتر بت و دوماهيێ دێ هه‌ر زڤرنه‌ وى ديفاكتۆيێ ئيمام خومه‌ينى ل سالا 1988 ده‌رباره‌ى ره‌وشا راوه‌ستيانا شه‌ڕێ هه‌شت سالى دگه‌ل ئيراقێ گۆتى: ((راوه‌ستاندنا شه‌ڕى وه‌ك ڤه‌خوارنا فنجانه‌كا ژه‌هرێيه‌))! هه‌ر وه‌سا ده‌مێ پشتى هينگێ ب سێ سالان ((سه‌ددام))ى ژى د جه‌نگا كه‌نداڤى يا دووێ دا شكه‌ستن هيناى، ل بن چادرا ناڤدارا باژێركێ ((سه‌فوانێ)) ل ناڤبه‌را سينۆرێ ئيراقێ و كوێتێ، رێكه‌ڤتنا راوه‌ستاندنا شه‌ڕى لسه‌ر كاغه‌زا سپى دگه‌ل هه‌ڤپه‌يمانان ب سه‌رۆكاتييا ئه‌مريكا ئيمزا كر. ئه‌ڤجا دڤێت هندى زووتره‌ باشتره‌ ده‌ستهه‌لاتا هه‌رێمێ ژى هه‌كه‌ چو ئالترناتيڤێن باشتر نه‌بن، هه‌لوه‌سته‌ك هۆسا وه‌ربگرن و سه‌ر ژ نوو به‌رده‌واميێ ب گيانه‌كێ نوو ب كاروانێ بزاڤا رزگاريخوازييا كوردى بده‌ن؛ هه‌كه‌ نه‌ء، دوور نينه‌ ره‌وش به‌ره‌ڤ ئاقاره‌كى مژدار بچت و ئه‌ڤا هه‌يى ژى نه‌مينت!

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.