خۆشتڤیێ من داعشە

خۆشتڤیێ من داعشە

رامين دهۆكى

ئەڤ پەرتووکە دەربارەى ژنەکێ یە ل وەلاتێ مسرێ کو دناڤ ژیانەکا بەختەوەر دا دژیت، بەلێ ئەڤ بەختەوەرییە گەلەک ناڤەکێشیت و دهێتە ڤەگوهاستن بۆ چەندین کارەساتێن دلتەزین، ئەڤ کارەساتە ژى ژ بەردانا وێ ژلایێ هەڤژینێ وێ ڤە دەستپێ دکەن بێى هیچ ئەگەرەک، ژنەکا پێگەهشتى و شارەزایەکا زۆر هەى د بوارێ وەرگێرانێ دا دبیتە مرۆڤەک کو دکەڤیتە بن میکرۆسکۆبێ ژلایێ جڤاکیڤە و لڤینێن وێ دهێنە وێنە کرن، دهێتە ڤەقەتیان ژ هەمى کەس و کاران، پشتى کو رێڤەبەرێ وێ کۆمپانیا ئەوێ لێ کاردکر دڤیایى خۆ نێزیک بکەت، بۆ ماوەیەکێ زۆر درێژ پەیوەندیێن خۆ دگەل دەوروبەرێن خۆ دبریت، هەر د ڤى دەمی دا ئێک ژ کارمەندێن کەڤنێن کۆمپانیا وێ لێ کاردکر پەیوەندییێ پێ دکەت، هەلبەت وێ بەرسڤا پەیوەندییێن چ کەسان نە ددا، بەلێ پەیوەندییا وێ ژنێ پسیار لدەڤ چێکرن ژبەرکو نە ئێک ژوان کەسان بوو پترییا دەمێ خۆ دگەل بۆرینیت، ب هەر رەنگەکێ هەى ئێک دبینن و ئەو ژنە باس ل رەوشا وێ یا نەباش دکەت، داخازا کارێ وەرگێرانێ ژێ دکەت، ل ناڤا دەولەتا ئیسلامى (داعش) بێ کو پێ ئاگەهـ بن کو ئەو چەندین ژنێن دى دهێنە خاپاندن ژلایێ کەسەکێ ڤە ئەو ژى دایکا سەلمانى و ل ڤێرێ چارەنڤیسێ چەندین ژن و کچان بەرزەدبیت.

رویدانێن دناڤ ڤێ پەرتووکێ دا د نە چاڤەرێکرینە، ب رەنگەکێ خاندەڤان توشى مەندەهوشیەکا زۆر دبیت، ئێک ژوان رویدانا ئەو عەشقا پەیدا دبیت دناڤبەرا لەیلا و عومەرێ داعش و چیرۆکا ژدەستدانا ژیانا عومەرى ژ ئەگەرێ جڤاکى و عەشقەکا بەرزەبووى دگەل کچەکا زانکۆیێ کو ژبەر بارێ ئابۆرى نەشیایى بدەستڤە بینیت و ئەو کچە ژى دبیتە لەیلا!

هەر وەسا رویدانا کوشتنا عومەرى ل بەر چاڤێن کچا وى یا بچویک و ئەو پلانا بۆ هاتیە دانان ژلایێ دایکا سەلمانى ڤە پشتى ئەو و لەیلا ژناڤ رێکخستنا تیرورستى رەڤین ژ ئەگەرێ خیانەتێ ل رێکخستنا داعش، هەروەسا رەڤاندنا زارۆکێن ئەیمەنێ برایێ لەیلایێ و گۆهەرینا وان دگەل کچا لەیلایێ! و رەڤاندنا وێ کچا بچویک بۆ ناڤ رێکخستنا تیرۆریستى.

ئەڤ ژنە دناڤ رەوشەکا دەروونى یا گەلەک دژوار دا دژیت بوو ماوەیێ چەندین سالێن دوور و درێژ ل دەستپێکێ دایکا خۆ ژدەست ددەت پاشى عومەرى پاش بابێ خۆ هەروەسا پاش کچا خۆ، بەلێ ب هاریکاریا هەڤژینێ وێ یێ کەڤن و کەسەکێ ب ناڤێ محمد ئێک ژ سەربازێن جەبهە ئەلنەسر یێ سوورى کو لدەمێ کەفتیە زیندانا داعش ب هاریکارییا عومەرى هاتبوو رەڤاندن، کار دکەن بۆ ڤەگەراندنا کچا بچووک، ئەڤ پلانە تا راددەیەکێ سەرکەفتنێ دئینیت بەلێ ب ئازادکرنا دایکا سەلمانى یا داعش ڤە و ڤەگەراندنا وێ بوو وەلاتێ مسرێ، لەیلا دەست ب ژیانەکا دى دکەت و چەندین سالا ل وەلاتێن ئەورۆپى دهێتە ڤەگۆهاستن و درەڤیت بێى کۆ کچا بچویک ئەگەرەکێ بزانیت بۆچى ئەڤ ترس و رەڤینە.. و چەندین پسیارێن دى.

پشتى مرنا لەیلایێ کچا وێ ڤەدگەریت و بەرسڤێن پسیارێن خۆ هەمیا دبینیت، تا وى ئاستى ل بەر سنگێ کۆمەکا مرۆڤان دبێژیت (ئەز لسەر داعشا د ئاخڤم یان رێکخستنا خەلیفا ئیسلامى.. ئەوا ل بەرامبەر وە راوەستیایى کچا داعشە، ژ دایک و بابێن داعشە…)

دبینم یا پێدڤییە هەر تاکەک ژ سنێلە تا پێگەهشتیان ڤێ پەرتووکێ بخوینیت، ژبەرکو ل هندەک دەمان کاودانێن ژیانێ مرۆڤى تا وى ئاستى بێچارە دکەن ب رەڤیت بۆ هەر جهەکێ هەى، بێى بریاردان و هزرکرن، ئەڤ کاودانە رێ خوشکەرن بۆ وان کەسان یێن دەست دگەل رێکخراوێن تیرۆریستى هەى وەکى داعش، و بۆ خۆ ب دەرفەت دبینن، چوونا لەیلایێ و وان ژنێنن دى هەر ژبەر ڤان کاودانێنن دژوار بوو، گڤاشتنا لسەر لەیلایێ ژلایێ بابێ وێڤە داکو هەڤژینیێ دگەل برازایێ وى پێک بینیت، هەروەسا گۆتنێن جڤاکى و دەربرینێن خەلەت، وەلێ کر ئەو برەڤیت تا هاتییە خاپاندن! هەلبەت دناڤ هەر جڤاکەکێ دا و دگەل هەر کەسەکێ ئاریشێن جوراوجور هەنە، ژبەر هندێ ب فەر دبینم ئەف پەرتووکە بهێتە خواندن دا کو هەر تاکەک دناڤ جڤاکێ مە دا یێ پاراستى بیت ژ هەر پلانەکا بوو دهێتە دانان ژلایێ کەسێن دەست هەى دگەل ڤان جورە رێکخراوان.

دەربارەى ناڤێ پەرتووکێ چەندین رەخنە هاتنە ئاراستەکرن کو نابیت ناڤێ وێ بڤى رەنگى با ژبەرکو رێکخراوەکا تیروریستى یە، ژبەر ڤێ چەندێ دبێژم ئەو کەسێ ئاماژە پێ هاتییە دان ژلایێ ئەکتەرا سەرەکى ڤە بناڤێ لەیلایێ کارەساتێن دل ئێش ل پشت هەنە هەتا ل سەر داعشبوونا وى، کەسەکێ خوە ژدەست دایە. د خواندنا رومانێ دا هەر تشت ب رۆهنى بۆ مرۆڤى دیار دبیت.

پەرتووک: خۆشتڤیێ من داعشە

نڤیسین: هاجەر عەبدولسەمەد

وەرگێران: زینە شاکر

ژ چاپ و وەشانێن پەرتووکخانەیا خانى.

بابه‌تێن ب ڤێ مژارێ ڤه‌ گرێدای