تورکیا ھنگافتنا 43 گەریلایان ل ھەرێم و باکۆرێ کوردستانێ راگەھاند

تورکیا ھنگافتنا 43 گەریلایان ل ھەرێم و باکۆرێ کوردستانێ راگەھاند

WAAR-دهۆك:

حکومەتا تورکیا ھنگاڤتنا چل و سێ گەریلایان و کوشتنا سێ سەربازێن خوە دوھی و ئەڤرۆ ل ھەرێم و باکۆرێ کوردستانێ راگەھاند.
وەزارەتا ناڤخوەیا تورکیا د بەیانەکێ دا راگەھاند: یەکەیێن فەرماندارییا جەندرمێن تورکیا ئۆپەراسیۆنەکا ل دژی گەریلایێن پارتییا کارکەرێن کوردستانێ، پەکەکێ ل گوندەوارێن باژارۆکێ ھاوێلێ یێ سەر ب پارێزگەھا سێرتێ یا باکۆرێ کوردستانێ ڤە کر و دو گەریلا ھنگافتن.
ھەروەسا دیار کر؛ سوپا و پۆلیسێن تورکیا د ئۆپەراسیۆنەکا ھەڤپشک دا ب پشتەڤانییا ھێزێن ئاسمانی ل شەمزینانا سەر ب پارێزگەھا جۆلەمێرگێ ڤە، ھەشت گەریلایێن پەکەکێ ھنگافتن، سێ سەربازێن سوپایێ تورکیا ژی ھاتن کوشتن.
ژ ئالییێ خوەڤە وەزارەتا بەرگرییا تورکیا ژی ئەڤرۆ د داخویانییەکێ دا راگەھاند؛ فرۆکەیێن وان یێن شەرکەر ئەڤرۆ سپێدێ چەندین جھێن پەکەکێ ل دەڤەرا حەفتەنینێ یا ھەرێما کوردستانێ بۆمبەباران کرن و نەھـ گەریلا کوشتن.
وەزارەتا بەرگرییا تورکیا ئاشکەرا ژی کر؛ فرۆکەیێن وان یێن شەرکەر د ئۆپەراسیۆنێن ئاسمانی یێن دوھی ژی دا، بیست و چار گەریلا ھنگافتن کو یازدە ژێ ل باکۆرێ کوردستانێ و سێزدە ژی ل ناڤا سنۆرێ ھەرێما کوردستانێ بوون.

بابه‌تێن ب ڤێ مژارێ ڤه‌ گرێدای