تابلۆیێ من بناڤێ: مرۆڤ و ئاخ

تابلۆیێ من بناڤێ: مرۆڤ و ئاخ

فەهمی بالایی

هەلبەت گرێدانا مرۆڤی و هەر گیاندار و بوونەوەرەکی راستەوخوە ب ئاخێڤە هەیە. مرۆڤ ڤێ ئاخێ دکەتە چاڤکانییەکا گرنگ بۆ بەردەوامییا ژیانێ. ژبەرکو ئاخ د میتۆلۆژیان دا و ب دیتنا هندەک ئولان کو ئادەم بابێ مرۆڤان ژ ئاخێ چێبوویە و جارەک دی دێ بینە ئاخ ڤە، ئاخ بنگەهە بۆ ژیانێ و کشتوکال و ئاڤ و هەر تشتەکێ سروشتی ژ ئاخێ دەردکەڤیت. هوسا ئاخ وەک سومبۆلەکا پیرۆز هاتە ناسکرن. ل سەر دیارکرن و پاوانکرنا ئاخێ ژ پارچە زەڤیەکێ بەر ب وەلاتەکێ مەزن و بەر ب کێشوەران چوو. سەرا ڤێ ئاخێ مرۆڤ بوونە قوربان. ژبەرکو ئارامی و ژیان و ئازادییا مرۆڤی، گرێدای ئازادییا عەردییە. ژبۆ پاراستنا ڤێ ئاخێ و پیرۆزییا وێ. پشتی من دیتی گەلێ کورد ب هەموو چینێن خوەیین جڤاکی ڤە بێی جوداهییا ئایدیۆلۆژی، دین، مەزهەب و پارچە و عەشیران بوونە ئارمانجا داگیرکەران هەروەکی خانییێ نەمر دبێژیت:
ئەڤ ڕۆم و عەجەم ب وان حەسارن
كــرمانج هەمی ل چـار كــنارن
هەردو تەرەف قەبیلێ كـرمانج
بوو تیرێ قـەزا كـرینە ئارمـانـج
ئێدی کۆمکوژییێن ئێک لدووڤ ئێک، کۆچبەری، تالانکرن و سۆتنا مال و گوندان بوو کولتۆرێ دوژمنێن گەلێ کورد و گەلەک جاران کوردان ب خوە ژی پشکداری دڤان کۆمکوژیان دا کرییە. ئێدی نە پیرۆزیا مرۆڤان ما نە ژی یا ئاخێ. مرۆڤ و ئاخ بوونە ئێک پارچە ژ کۆمکوژییا گەلییێ زیلان، بارزان، ئەنفال، کوردێن فەیلی، هەلەبجە، ئێزدی، کرستیان، ئەرمەن و کۆمکوژییێن بەردەوام. ئەڤە هەموو بوونە هێڤێنێ تابلۆیەکا من کو تراژیدییا خەمێن گەلەکی داپوشی بوو، ئێدی رەنگ نەمان هەستیێن مرۆڤان و ئاخا سۆر یا د خوینێ وەربووی، ناهێلن ژیان ل ڤی وەلاتی گەش ببیت. گیا دار وبار و بوهار هەموویان خەملا خوە یا ئێخستی. ژبۆ ڤێ ئاخێ مرۆڤ دمریت و دبیتە قۆربان لێ ل وەلاتێ مە مرۆڤ و ئاخ دبن ئێک ئارمانج ئەو ژی جەبلکرنا تەقنێ یە، ب خوینا مرۆڤان. ئەڤ تابلۆیە ب خەمگینیا خوە ئاسمان تاری کریە، بیابان و ئاخ بێ کەسکاتی هێلایە و بتنێ ناڤونیشانێن ڤەشارتی دناڤا خوە دا هەمبێزکرینە. ئەو ژی گەلەک زەحمەتە زوی ب زوی کەسوکاران ژناڤ ئێک ڤاڤێریت و ناڤونیشانان ب سانەهی بزانن. دیسان هێشتا مە دەرێ ڤێ ئاحێ نەزانییە و ب ئەرزانترین بهای ل بازارێ داگیرکەران دفرۆشین.

بابه‌تێن ب ڤێ مژارێ ڤه‌ گرێدای