باکۆرێ کوردستانێ.. ھەڤشارەدارێن ئامەد، وان و مێردینێ ھاتن دوورخستن

باکۆرێ کوردستانێ.. ھەڤشارەدارێن ئامەد، وان و مێردینێ ھاتن دوورخستن

WAAR- دهوك:

حکومەتا تورکیا ھەڤشارەدارێن ئامەد، وان و مێردینێ ل باکۆرێ کوردستانێ دوبارە ژ کارێن وان دوورخستن و پارێزگەرێن وان پارێزگەھان وەک قەیووم ل شوونا وان دانان.
وەزارەتا ناڤخوە یا تورکیا داخویانییەکا نڤیسکی بەلاڤ کر و راگەھاند: عەدنان سەلجۆق مزراکلی، شارەدارێ شارەدارییا مەزن یا ئامەدێ، ئەحمەد تورک، شارەدارێ شارەدارییا مەزن یا مێردینێ و بەدیعە ئۆزگۆکچە، شارەدارا شارەدارییا مەزن یا وانێ، ژ بەر کو سکالا ل سەر ھاتییە ڤەکرن و ژ بۆ لێپرسینێ ھاتینە داخوازکرن، ژ کارێن وان ھاتن دوورخستن.
وەزارەتا ناڤخوە یا تورکیا ئاشکەرا ژی کر؛ پشتی دوورخستنا ھەڤشارەدارێن ئامەد، وان و مێردینێ، حەسەن بەسری گوزەلئۆغلو، پارێزگەرێ ئامەدێ وەک قەیووم ل شوونا عەدنان سەلجۆق مزراکی، مستەفا یەمان، پارێزگەرێ مێردینێ ل شوونا ئەحمەد تورکی و ئەمین بیلمەز، پارێزگەرێ وانێ ل شوونا بەدیعە ئۆزگۆکچەیێ دەستبکار بوون.
وەزارەتا ناڤخوە یا تورکیا شارەدارێن وان سێ مەزنە شارەدارییان ب سووچا پشکداریێ د تازیێن گەریلایێن پەکەکێ دا ژ کارێن وان دوورخستینە.
حکومەتا تورکیا ھەڤدەمی دوورخستنا ھەڤشارەداران و دانانا قەیوومان ل شوونا وان، شارەدارییێن ئامەد، وان و مێردینێ دۆرپێچ کرن و ب دەھان بەرپرس و ئەندامێن ھەدەپێ و جڤاتێن شارەدارییان دەستەسەر کرن.
بریارا دانانا قەیوومان ل شوونا ھەڤشارەدارێن باکۆرێ کوردستانێ پشتی نێزیکی پێنج مەھان ژ ھەلبژارتنێن شارەدارییان و دوبارەسەرکەفتنا بەربژارێن پارتییا دیمۆکراتیک یا گەلان، ھەدەپێ ل وان پارێزگەھان دھێت.

بابه‌تێن ب ڤێ مژارێ ڤه‌ گرێدای