حه‌سه‌ن عه‌له‌وى ژى پارتیه‌!

كارزان فه‌قى

حه‌سه‌ن نورى عه‌لى عه‌له‌وى، رۆناكبیرێ ئیراقێ ب مه‌زهه‌ب شیعیى یه‌، ل سالا 1936 ل به‌غدایێ ژ دایكبوویه‌، ئه‌و به‌رى سالا 2003 كه‌سه‌كێ نزیكى سه‌دام بوویه‌ و هه‌موو ده‌مان ب هه‌لوێستێن خوه‌ یێن نامۆ و وێره‌كى ناڤێ خوه‌ ده‌رخستیه‌، بۆ نموونه‌ ئه‌و كه‌سه‌كێ شیعى یه‌ و گۆتنێن وى ده‌رباره‌ى ئیمام عه‌لى و ئیمام عومه‌ر، پتر نزیكى ئیمام عومه‌ره‌‌، ڤێ یه‌كێ ژى وه‌كریه‌ ل ده‌ف شیعه‌یان كه‌سه‌كێ خوه‌شتڤى نه‌بیت، هنده‌ك ژى ب كه‌سه‌كێ ده‌ركه‌فتى ژ شیعاتیێ ناڤ بكه‌ن، ب هه‌مان شێوه‌یێ شیعه‌یان، كوردستان پره‌ ژ وان نموونه‌یان كو ئه‌گه‌ر نڤێسه‌ره‌ك، یان سیاسیه‌ك یان په‌رله‌مانتاره‌ك، مسقاله‌كێ ژى بۆچوونه‌كا خوه‌ دژى پره‌نسیپێن حزبا خوه‌ بێژیت، هه‌تا ئه‌گه‌ر راست ژى بیت، ئه‌و دێ ژ حزبێ هێته‌ لادان و رێكارێن توند ل هه‌مبه‌ر دهێته‌ گرتن،  ژ به‌ر كو (حه‌سه‌ن عه‌له‌وى) گه‌له‌ك راستیێن شیعه‌یان دبێژیت، ئه‌و ژلایێ سیاسیێن شیعه ‌مه‌زهه‌ب كه‌سه‌كێ قه‌بولكرى نینه‌، ب هه‌مان شێوه‌ ژ به‌ركو (مه‌سعود حه‌یده‌ر)ێ په‌رله‌مانتارێ گۆران ل دۆر دۆزا كوردى ل به‌غدا بێ ده‌نگ نابیت، ژ لایێ جڤاتا نشتیمانییا بزاڤا گۆران دناڤ حزبێ دا هاته‌ دوورخستن، دده‌مه‌كى دا مه‌سعود حه‌یده‌ر‌ نه‌گۆتنه‌ك دژى گۆران كربوو و نه‌ رسته‌یه‌ك ژى ل به‌رژه‌وه‌ندا پارتى نڤێسی بوو‌، ئه‌وێ وى گوتى ئه‌وه‌ ل دیدارێن كه‌نالێن عه‌ره‌بى ل هه‌مبه‌رى سیاسێن شوڤێنیزمێن عه‌ره‌ب بێ ده‌نگ نه‌بوویه‌ و به‌رگرى ل كوردستان و قه‌واره‌یێ سیاسیێ هه‌رێمێ كریه‌. به‌ریا چه‌ند رۆژان ژى رۆناكبێرێ ئیراقێ (حه‌سه‌ن عه‌له‌وى) ده‌رباره‌ى سه‌رۆكێ حكومه‌تا هه‌رێما كوردستانێ د دیداره‌كا ته‌له‌ڤزیۆنى دا وه‌ها گۆت بوو: (نێچیرڤان بارزانى كه‌سه‌كێ پراگماتیكیه‌، كارامه‌ و لێهاتییه‌، كو ئه‌ڤه‌ ل ده‌ڤ كه‌سێن دى دا نینه‌، هه‌روه‌سا كه‌سه‌كێ واقعیه‌، ئه‌ز ڤێ یه‌كێ ب ئاگر ڤه‌مراندنێ ناڤ دكه‌م، هه‌رده‌ما ئاگر هه‌ل دبیت، ئه‌و وى ئاگرى د ڤه‌مرینیت، ئه‌و كه‌سه‌كێ نزیكى من نینه‌، چونكى جیلێ مه‌ نه‌بوویه‌ و ئه‌ز وى ناسناكم، من چ په‌یوه‌ندى ل گه‌ل وى نینن، لێ وه‌كو دیرۆكناسه‌ك ئه‌ز چاڤدێرییا سیاسه‌تێن وى دكه‌م،  وه‌كو چاڤدێره‌كێ دۆزا كوردى سه‌ركه‌فتنه‌كا مه‌زن ب ده‌ستڤه‌ ئینایه‌، ئه‌و بوویه‌ ئه‌گه‌ر تاكو نها هه‌رێما كوردستانێ ل سه‌ر پێن خوه‌ ب راوه‌ستیت،  نێچیرڤان بارزانى رۆله‌كێ مه‌زن د مان و به‌رده‌ومبوونا هه‌رێمێ دا هه‌یه‌) ڤان گۆتنێن حه‌سه‌ن عه‌له‌وى هند ژ بۆ هژماره‌كا حزبێن هه‌رێما كوردستانێ ته‌عل و نه‌خوه‌ش بوو، ب وى ره‌نگى عه‌ره‌ب و سیاسه‌تڤانێن به‌غدایێ تووره‌ نه‌كرن، كه‌واته‌ هه‌تا ئه‌م تیرۆرا فكرى بنیاسین پێدڤى ناكه‌ت شاخ ب تیرۆرێڤه‌ بهێت، به‌لكو ژ نیشانێن وێ تێرۆرێ گه‌له‌كن، سه‌رۆكێ حكومه‌تێ شیا هه‌رێما كوردستانێ ژ لێڤێن كه‌فتن و ژناڤچوونێ رزگاربكه‌ت، نه‌ ب گۆتنا من، به‌لكو ب گۆتنان دژه‌ حكومه‌تێ بخوه‌، لێ ژبه‌ركو زاتێ سه‌رۆكى حكومه‌تێ بخوه‌ پارتیه‌، هه‌موو بزاڤێن وى -زه‌ربی سفر- بكه‌ین؟ حكومه‌ته‌ك ده‌ما مووچه‌ نه‌بیت، ژ لایێ پارتێن دى بكه‌ڤیته‌ به‌رهێرشێ كو مافێ خه‌لكى دخۆت، د هه‌مان ده‌م دا كو ل گه‌ل به‌غدایێ رێكبكه‌ڤیت و مووچه‌یێ خه‌لكى دابین بكه‌ت، جاردن حكومه‌تێ ب ده‌ست تێكهه‌لكرن ل گه‌ل دوژمنى تاوانبار بكه‌ین، ئیدى دوو روویى هه‌تا كیژان راده‌ى؟ ل سنورێ تیرۆرا فكرى هه‌موو تشته‌ك ل به‌ر خه‌لكى هاتیه‌ به‌رزه‌كرن، ل وێ ده‌ڤه‌رێ ب زه‌حمه‌ته‌ كه‌سه‌ك بكاریت سیاسیێن باش و ده‌سته‌لاتدارێ به‌ره‌یێ خه‌لكى بنیاسیت، هه‌تا تو وێ یه‌كێ ب سه‌لمینى كو ل به‌ره‌یێ هه‌ژاران داى، مه‌رج نینه‌ تو ل گه‌ل هه‌ژاران هاریكار بی، به‌لكو دڤێت هه‌تا سه‌رهه‌ستى تو دژه‌ پارتى و دژه‌ حكومه‌تێ بى، واته‌ په‌روه‌رده‌یه‌كا وه‌ها هاتیه‌ به‌لاڤكرن كو شیانێن سیاسه‌تڤانى ب ته‌نێ د ئێك حاله‌ت دا دیا دبیت، ئه‌و ژى د دیجارێن خوه‌ دا چه‌ند دشێت گۆتنێن كرێت دژى حكومه‌ت و پیرۆزیێن به‌شه‌كا زۆر یا خه‌لكێ هه‌رێمێ بكه‌ت كو پارتینه‌. یان ژى هه‌تا ب سه‌لمینى حزبه‌كى ب هه‌موو ره‌نگان ل گه‌ل مافێ كرێكارانى، مه‌رج نینه‌ مافێ كرێكارن ب ده‌ستڤه‌ بینى و به‌رگریێ ژێ بكه‌ى، به‌لكو دڤێت تو مارى ب ده‌ستێ كریكاران بده‌یه‌ كوشتن و ب ده‌ستێ كرێكاران باره‌گه‌هێن حزبێن دى و سازیێن حكومه‌تێ بسوژى، ئه‌ها ب ڤێ یه‌كێ دبێژن تیرۆرا فكرى. ل سه‌رده‌مێ سه‌دامێ دكتاتۆر، دیرۆكنڤێس حه‌سه‌ن عه‌له‌وى هه‌تا سه‌ر هه‌ستیكێن خوه‌ دژه كورد بوویه‌، ‌ لێ ژبلى سیاسه‌تى ئه‌و نڤێسه‌ره‌كێ مه‌زنه‌ و ب رۆناكبێره‌كێ ئیراقێ دهێته‌ نیاسین، ره‌نگه‌ سیاسیه‌كى دانپێدان ب سه‌ركه‌فتنا دوژمنێ خوه‌ ب كێماسى و شه‌رمزارى بۆ خوه‌ بدانیت، لێ نڤێسه‌ر و رۆناكبیر نكارن سه‌ركه‌فتنا دوژمنێ خوه‌ ڤه‌شێرن، له‌ورا داوى هه‌لوێستا حه‌سه‌ن عه‌له‌وى ده‌رباره‌ى سه‌رۆكێ حكومه‌تا هه‌رێمێ به‌لگه‌یێ سه‌ركه‌فتنا هه‌رێما كوردستانێ یه‌ ل دژى هه‌موو گه‌فێن به‌غدایێ سه‌ر هه‌رێمێ، لێ ژ به‌ر كو په‌سنا سه‌رۆكێ حكومه‌تا هه‌رێمێ كریه‌ پشت راستم نها ئه‌و پارتێن كو دژه‌ حكومه‌ت و دژه‌ پارتینه‌، دبێژن: حه‌سه‌ن عه‌له‌وى ژى پارتیه‌.

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.