WAAR-دهۆك:
كۆمبوونێن پێكئینا حكومه‌تا نوو یا هه‌رێما كوردستانێ به‌رده‌وامن و ئه‌ڤرۆ، شاندا پارتی دیمۆكراتی كوردستانێ دگه‌ل هه‌ر یه‌ك ژ حزبا سۆسیالیست و كۆمه‌لا ئیسلامی كۆم دبیت.
ل گۆری ئاگاھیێن ئەرشەد شوانی، پەیامنێرێ وار ل ھەولێرێ، ئەڤرۆ ل سه‌عه‌ت ده‌هی سپێدێ شاندا پارتی دێ دگه‌ل حزبا سۆسیالستا دیمۆکراتا کوردستانێ کۆم بیت و پێکئینانا كابینه‌یا نه‌هێ یا حكومه‌تا ھەرێمێ گۆتوبێژ کەن، هه‌روه‌ها ل سه‌عه‌ت دوازده‌ی نیڤرۆ ژی، شاندەکا بلند یا کۆمەلا ئیسلامی دێ سەرەدانا مەکتەبا سیاسی یا پارتی کەت.
پەیامنێرێ وار ئاماژە کر؛ کۆمبوونا پارتی و کۆمەلێ پشتی سەرەدانا دوماھیێ یا پارتی بۆ کۆمەلا ئیسلامی دھێت کو تێدا دوپاتی ل ئاساییکرنا پەیوەندییان هاتبوو كرن.
هه‌روه‌ها گۆت: د وێ سەرەدانێ دا شاندا کۆمەلێ دێ بەرسڤا دوماھیێ ل دۆر پشکدارییا خوە د روونشتنا ھەژدەی ڤێ مەھێ یا پەرلەمانێ کوردستانێ و ئۆپۆزسیۆنبوون یان ئۆپۆزسیۆننەبوونا خوە د حکومەتێ دا دەتە پارتی.
شوان رابەر، بریاردەرێ جڤاتا سەرکرداتییا کۆمەلا ئیسلامی یا کوردستانێ ژ ئالییێ خوە ڤە کۆمبوونا ھەردو ئالییان بۆ وار دوپات کر.
