ده‌رگه‌هێ به‌غدا دێ مه‌ گه‌هینته‌ كیڤه‌؟

فاضل عمر

ل رۆژهه‌لاتا ناڤین، چونكى مرۆڤ ب هه‌مى تشتان كار دكه‌ت ژبلى هۆشى، و مرۆڤ ل هه‌مى سه‌رده‌مان دژیت ژبلى ئیرۆ، و مرۆڤ بۆ كۆمێ هندى دژیت خوه‌ ژبیركریه‌.. ئه‌ڤجا هه‌مى تشت نه‌ مه‌نتقینه‌ و نابت ئه‌م هزر بكه‌ین دێ تشته‌كێ مه‌نتقى هه‌بت. ئه‌ڤه‌ كولتۆرێ برائه‌ره‌بانه‌ و مه‌ ژێ كڕیه‌!

من دڤێت بێژم؛ وه‌ختێ مه‌نتق ل وه‌لاته‌كى نه‌بت، گه‌له‌ك زه‌همه‌ته‌ پلان هه‌بت، گه‌له‌ك زه‌همه‌ته‌ تێگه‌هشتن هه‌بت، گه‌له‌ك زه‌همه‌ته‌ خواندنه‌كا دروست بۆ پاشه‌ڕۆژێ هه‌بت و هه‌كه‌ر مرۆڤ بزاڤه‌كێ بكه‌ت، ره‌نگه‌ قوماره‌كه‌كا هزریه‌.. چونكى ژ فه‌رته‌نه‌یێ به‌س فه‌رته‌نه‌ دهێته‌ دیتن و خواندن.

چاوا بت،ئه‌ز تاكو راده‌یه‌كێ دشێم ره‌وشا ده‌ڤه‌رێ بخوینم؛ ئه‌ز دشێم تێبگه‌هم كو هه‌ڤڕكیه‌كا ئه‌به‌دى ل ناڤبه‌را تركیا و ئیرانێ هه‌یه‌ كانێ كى دێ هه‌یمه‌نێ لسه‌ر ده‌ڤه‌رێ كه‌ت و ئه‌ڤه‌ ب دو جۆران دهێته‌كرن؛ لاوازكرنا هه‌ڤالێن هه‌ڤدو و چێكرنا تاگیرێن نوو، دگه‌ل شه‌ڕێ ئابۆرى و كولتۆرى. ئه‌ز دشێم تێبگه‌هم بۆچى ئیراقا شیعه‌ ده‌ستهه‌لاتدار نه‌شێت هه‌ڤالا ئیرانێ نه‌بت. ئه‌ز دشێم تێبگه‌هم بۆچى په‌كه‌كه‌ دۆستا ئیرانێ و سۆریێیه‌. ئه‌ز دشێم تێبگه‌هم بۆچى داعش په‌یدابوویه‌ و بۆچى نابت بمینت. ئه‌ز تێدگه‌هم بۆچى بازاڕێ مه‌زن ل سۆریێیه‌.. به‌س تشتێ ئه‌ز ئێكجار تێنه‌گه‌هم دو تشتن:

ئێك: رۆژاڤا و گه‌له‌ك ده‌وله‌تێن دى هاری هه‌رێما كوردستانێ و رۆژاڤا دكه‌ن داكو داعشێ چارچۆڤه‌ بكه‌ین و بشكێنین.. هندى گرێدایى هه‌رێما كوردستانێ، ئه‌وێن شه‌ڕى دكه‌ن و خه‌لكێ ل پشت وان، ئه‌ڤه‌ چار پێنج مه‌هن مووچه‌ وه‌رنه‌گرتینه‌، ئه‌رێ چاوا كه‌سه‌ك دێ شێت به‌رده‌وام شه‌ڕى بكه‌ت هه‌كه‌ر بزانت خێزانا وى د ره‌وشه‌كا ته‌نگ دا دژیت؟

ئه‌ڤجا وه‌ختێ پشته‌ڤانیا شه‌ڕى بكه‌ن و یا ژیارێ نه‌كه‌ن، هه‌ڤدژیه‌كا سه‌یر په‌یدا دبت؛ ئه‌رێ مه‌ برسى دكه‌ن دا وه‌كو داعشیان تالانان بكه‌ین یان دبێژن؛ به‌رپرسى دو پارچه‌یه‌، شه‌ڕ یێ مه‌یه‌ و ژیار یا هه‌وه‌ یه‌! یان دڤێن حوكمه‌تا هه‌رێمێ د ته‌نگاڤیه‌كا به‌رده‌وام دا بت داكو نه‌شێت هیچ بڕیاره‌كا ئازادانه‌ بده‌ت؟

دو: هه‌رێما كوردستانێ پتریا رێیا ده‌وله‌تبوونێ بڕیه‌، به‌س بڕیار و دانپێدان ماینه‌، لێ هێزێن كوردى هزر دكه‌ن پاشه‌ڕۆژ د به‌غدا را دبۆرت! پرسیار ئه‌وه‌؛ چ ل به‌غدایه‌؟ فه‌نه‌ركێ ئه‌لائه‌ددینى یان داگێڕان و ڤه‌گه‌ڕان بۆ سفرێ؟ ب گۆتنه‌كا دى، كوردستانیان چ ژ به‌غدا دڤێت و به‌غدا چ هه‌یه‌ بده‌تێ؟

هندى ئه‌ز تێدگه‌م؛ گه‌نده‌لیا وه‌زاره‌ته‌كا به‌غدا هندى یا هه‌مى هه‌رێما كوردستانێیه‌، پاوانكرنا ده‌ستهه‌لاتێ گه‌له‌ك ئاشكرایه‌ و كورد و سونه‌یێن ئه‌ره‌ب به‌س ب قالب ل به‌غدانه‌، ئیراقێ یه‌ده‌كێ خوه‌ژى خه‌رجكریه‌ و پشتى ئادارا ئیسال ئه‌و ژى نه‌شێت مه‌هانه‌ مووچه‌یان بده‌ت، ئیراقێ له‌شكه‌ر نه‌مایه‌ و سیسته‌مێ گێله‌شۆكا گه‌لێرى (حه‌شدا شه‌عبی) بوویه‌ سیسته‌مێ خوه‌پاراستنێ و به‌رگریێ، ل باشترین وه‌ختان و باشترین هه‌ڤبه‌ندیێن هه‌رێمێ و به‌غدا، به‌غدا چو جاران نه‌ به‌هرا هه‌رێمێ ژ داهاتیێ ئیراقێ هنارتیه‌ نه‌ ئاڕێشه‌ و ئالۆزیێن هه‌ڤپشك چاره‌كرینه‌ یان بزاڤ كرینه‌ چاره‌ بكه‌ت… هه‌تا دوماهیێ ژ هه‌ڤبه‌ندیێن تاریك ل ناڤبه‌را هه‌رێمێ و به‌غدا. ئه‌ڤجا پرسیار ئه‌وه‌؛ چ ل به‌غدا هه‌یه‌ ئه‌م دچینێ؟

به‌هرا خوه‌، ئه‌ز نزانم! به‌س دبت هنده‌ك كلێ سوبحانى بۆ چاڤێن شریكان! به‌لكو تێبگه‌هن، رێكا به‌غدایێ دێ مه‌ گه‌هینته‌ بیابانێ.

بابه‌تێن ب ڤێ مژارێ ڤه‌ گرێدای