100 ملیارێن خانه‌نشینان د چ گهورینه‌كێ كه‌ت؟

كارزان فه‌قى

پلانا به‌غدایێ ئه‌و نه‌بوو حكومه‌تا هه‌رێمێ هه‌تا ڤى ده‌مى بمینیت، واته‌ ئه‌و بریارا مالكى د سالا 2014 داى و هه‌موو مافێن دارایێ هه‌رێما كوردستانێ برین بۆ وێ یه‌كێ بوو ره‌وشه‌كا ئالۆز دناڤا هه‌رێمێ دروست دا بكه‌ت كو ئه‌ڤ حكومه‌تا هه‌ى ژى هه‌ر ب نه‌رازیبوونا وه‌لاتیێن وێ بهێته‌ هه‌رفاندن، كابینه‌یا عه‌بادى ژى هه‌ر ب هه‌مان نیه‌ت ده‌سته‌لاتا ئیراقێ گرته‌ ده‌ست و پشتى ب هێز كه‌تى وه‌كو ده‌سته‌لاتدارێن به‌رى خوه‌ هێرشى كوردان كر و گه‌له‌ك دۆرپیچ ل سه‌ر هه‌رێمێ دروست كرن، لێ نه‌ مالكى و نه‌ژ ى عه‌بادى ب ئه‌نجامێ پلانا خوه‌ نه‌گه‌شتن، ل داویێ ب درێژكرنا ده‌ستێ خوه‌ بۆ ناڤخوه‌یا هه‌رێمێ و سۆتنا باره‌گایێن حزبى و حكومى ب رێكا هنده‌ك خوه‌نیشانده‌ران و پشته‌ڤانیا هنده‌ك پارتێن سیاسى و سیاسه‌تڤانێن هه‌رێمێ ڤیان ده‌سته‌لاتدارێن هه‌رێمێ نه‌چارى خوه‌ راده‌ستكرن ب هه‌موو مه‌رج و داخوازیێن به‌غدایێ بكه‌ن، لێ ئه‌و ژى سه‌رنه‌گرت و بۆ ڤان هه‌موو پلانان كابینه‌یا نێچیرڤان بارزانى جاردن ب بهێزى رابووڤه‌ و وه‌كو ده‌ستپێكا دروستبوونا قه‌یرانێ هه‌ولا باشتركرنا ره‌وشا دارایێ هه‌رێمێ دده‌ت، داوى پێشهاتێن نها دهێته‌ باسكرن پرۆژه‌قانوونا چاكسازیێ یه‌ د مووچه‌ یێن خانه‌نشینان دا كو ل په‌رله‌مانێ كوردستانێ دهێته‌ گه‌نگه‌شه‌كرن و د 2 روونشنتنان دا 6 ماده‌یێن وێ پرۆژه‌ قانوونێ خواندن بۆ هاتییه‌ كرن و هاتییه‌ په‌سه‌ندكرن، ئه‌ڤ پرۆژه‌ قانوون ژلایێ جڤاتا وه‌زیرێن هه‌رێما كوردستانێ هاتییه‌ به‌رهه‌ڤكرن و ئارمانج ژێ ئه‌وه‌ دادپه‌روه‌ریێ دناڤا ته‌خێن خانه‌نشینان دا دروست بكه‌ت، واته‌ ل گۆرى هه‌ژیبوونێ كه‌سێن پێدڤى و ژ هه‌ژى ب تنێ دكارن مووچه‌یێن خانه‌نشینیێ وه‌ربگرن‌، ره‌نگه‌ د به‌رێ دا و ب بریارێن سیاسى و هه‌ره‌مه‌كى گه‌له‌ك كه‌سانێن نه‌ هه‌ژى ببن موچه‌ خۆر، لێ ئه‌ڤ پرۆژه‌ قانوون وان هه‌موو شاشیێن‌ دناڤا وى ته‌خى دا ب دووماهى دئینیت، دانانا سه‌قفه‌كێ زه‌مه‌نى ژى بۆ په‌سه‌ندكرنا وى پرۆژه‌ قانوونێ نیه‌تێن حكومه‌تا هه‌رێمێ ب باشى نیشان دده‌ت كو بزاڤا گهورین و چاكسازیان هه‌یه‌، ب په‌سه‌ندكرنا ڤى پرۆژه‌ قانوونى ئیدى مه‌ها‌نه‌ دێ 100 ملیار دینار ژ بۆ خه‌زینه‌یا حكومه‌تێ ڤه‌گه‌رن، لێ ئه‌ڤه‌ پشتى وێ یه‌كێ دهێته‌ په‌سه‌ندكرن كو ل 16ى ئۆكتۆبه‌ری و ب خیاناتا گرۆپه‌كا ناڤا ئێكه‌تییێ و راده‌ستكرنا كه‌ركووكێ ب حه‌شدا شه‌عبی؛ 50% داهاتێ حكومه‌تا هه‌رێمێ كێم بوو، له‌ورا ره‌نگه‌ ب ڤان 100 ملیاران حكومه‌ت بكاریت گهورینه‌كێ د سیسته‌كێ مووچه‌یێن خانه‌نشینان دا بكه‌ت، ئه‌گه‌ر‌ ل ئاستێ گهورینه‌كا مه‌زن ژى نه‌بیت، دێ بیته‌ هۆكاره‌كێ باش ژبۆى كو جاردن خزمه‌تگۆزارى و ئه‌و پرۆژه‌یێن كو هاتینه‌ راوه‌ستاندن لڤینه‌كێ دناڤدا دروست بكه‌ت و گازنده‌یێن به‌لێنده‌ران ژى كێم بكه‌ت، یان ژى ئه‌ڤ 100 ملیار بۆ ته‌خا مامۆستایان ببیته‌ هاریكار ژ بۆى مامۆستایێن نه‌رازى ل سنورێ سلێمانیێ جاردن به‌ره‌ف هۆلێن خواندێ بچن و ساله‌كا قوتابیێن وێ ده‌ڤه‌رێ ب هه‌روه‌ نه‌چیت، كه‌واته‌ هه‌روه‌كو چه‌وا پلانێن كابینه‌یا مالكى نه‌شیا چاكسازى و دابینكرنا مووچه‌ى ژلایێ نێچیرڤان بارزانى رابگریت كو ب سه‌ربه‌خوبوونا ئابوورێ كوردستانێ ده‌ست پێكربوو، ب هه‌مان شێوه‌ عه‌بادى و هه‌ڤسۆزێن وى یێن هه‌رێمێ ژى ب خوه‌نیشاندان و سۆتنا باره‌گایان نه‌شیان وێ كاروانا چاكسازیێ راوه‌ستینن.

 

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.