یەکبوون: جڤاکا مە گوهدارییا دەنگێ ژنێ دکەت لێ ناهێلیت کچێن مە ببنە سترانبێژ

یەکبوون: جڤاکا مە گوهدارییا دەنگێ ژنێ دکەت لێ ناهێلیت کچێن مە ببنە سترانبێژ

WAAR-دهۆک:

یەکبوون هونەرمەندەکا ژن یا خوەدان شێوازەکێ تایبەت و جوادیە، یەکبوون ئەو خانما سترانا رەسەنا کوردی تێکهەلی موزیکێن سەردەم یێن جیهانی کرین، هند جاران دناڤ ستران و کلیپێن خوە دا ئەکتەرییێ ژی دکەت.. هند جاران بۆ دەمێن درێژ بێدەنگ دمینیت.. وار میدیا ژبۆ پتر ئاشنابوون ب هونەر و ستایل و دیتن و داخوازی یێن یەکبوونێ هەڤپەیڤینەکا تایبەت دگەل دا کرییە.

* هونەرێ یەکبوونێ هوونەرەکە تا رادەیەکێ مەزن خوەدی شێواز و تایبەتیا خوەیە؟ هەبوونا ستایلەکێ تایبەت ب هونەرمەندی ڤە تا چ رادە گرنگە و چاوا هونەرمەند دێ بیتە خوەدی ستایلێ خوە یێ تایبەت؟

-ستایلێ تایبەت ب هونەرمەندی ڤە ناسنامەیەکە و گرنگیا وێ ل گۆر کەسان تێ گوھەرتن. ھەگەر مرۆڤ بخوازیت تەنێ پارەیان قازانج بکەت، وی دەمی نە پێوستە ستایلەکی هەلبژێریت یان بئافرینیت، لێ ئەگەر کەسەک هونەرمەند بیت و مەرەمێن هونەری هەبن وی دەمی ستایل گەلەکێ گرنگە.

ب جەرباندنان و گوھداریکرنا ستایلێن جودا مرۆڤ دکاریت بیتە خوەدان ستایلێ خوە یێ تایبەت.

* یەکبوون د سترانێن خوە دا موزیک و فولکلۆرا کوردی تەڤلی موزیکێن رۆژئاڤا یێن مینا جاز و راک دکەت، سەدەمێن ڤێ یەکێ چنە تو فولکلۆرێ کوردی تەڤلی موزیکێن سەردەم یێن رۆژئاڤا دکی؟

-مرۆڤ کو ل باژاری مەزن ببیت دبیتە کەسەکێ پێگەهشتی و ئاڤا، گوھداریکرنا سترانان ژ پەروەردە و ھەڤال و ھۆگرێن خوە ب دەستڤە دئینیت. ئەو بوو سەدەم کو من ئەڤ جۆرە هونەرە ھلبژارت و ئەز پتر خوە نێزی ڤان جۆرە ستایلان دبینم.

* یەکبوون ژ بۆ کێ سترانان دبێژیت؟ تو دخوازی زێدەتر کی گۆھدارییا سترانێن تە بکەن؟

-ئەز ب راستی زووبزوو سترانان نابێژم. کێفا من پتر ب گرۆپێن موزکێ و دەرکەتنا ل سەر ستێجی دهێت.

ھەتا نھا گەلەک جارا ئەز ب رێخکستییێن حزبان یان کۆمپانییان دەرکەتمە سەر ستێجێ ئاهەنگان و جەماوەرێ بەرهەڤ بووی ئەو کەس نەبوون یێن تەنێ ژ بەر من هاتین ئانکو حەژێکەر و گوهدارێن من یێن تایبەت نەبوون. ئەز دخوازم کەسێن ب ھشمەند و ئەوێن تەنێ ژبەر دهێن ئاهەنگان گوھدارییا من بکەن.

 

* چەند یا گرنگە هونەرمەند ب تایبەتی دەنگبێژ خوەدی کارەکتەرەک رەوشەنبیر بیت، دیرۆک و فولکلۆرا مللەتێ خوە و یێن جیهانی باش بزانە و سەردەرییا وی دگەل موزیکێ ل سەر ئاستەکا زانستی و ئەکادمی بە؟

-بەرسڤ د ناڤ پرسیارێ دایە. ئەرێ.. پێدڤییە ھونەرمەند خوەدان کەسایەتییەکا رەوشەنبیر و زانا بیت. گرنگە کو دیرۆک و فۆلکلۆرا مللەتێ خوە و یێن جیھانی باش بزانیت لێ ھونەر ژ دایکبوونێ پەیدە دبیت، ژ بۆ هندەکان پێدڤی ناکەت ئاکادامیک بن یان نا.

* ژنێن سترانبێژ د قادا هونەرا کوردی دا کێم خوەیا دکن، ئەگەر چنە د هونەرا کوردی دا ژنێن هونەرمەند  د کێمن و  گەرهەبن ژی بەرهەمێن وان دکێمن، تو وەک خانمەکا هونەرمەند مینا هەڤالێن خوە یێن سترانبێژ بێدەنگ و وندایی! سەدەمێن ڤێ بێدەنگی و بەرزەبوونێ چنە؟

-د ناڤ جڤاتا مە کوردان دە ھینا “فەۆدالی” ب شێوەیەکێ بھێز باندۆرا خوە ھەیە. ئەم حەز دکن کو ھونەرمەندێن ژن گوھدار بکەین لێ ناخوازین کەچێن مە ببنە سترانبێژ. ئەڤە ژی هەڤدژییە و ناکۆکییەکێ دەردخە ھۆلێ. ئەز ب خوە گەلەک دبیھیسم ژبۆ ھەڤالێن من یێن سترانبێژ ھەگەر گەلەک بێن ناسکرن و ب ناڤودەنگ ببن گۆتنێن نەخوەش ل سەر وان دهێنە گۆتن. ئانکو وەکو ژن نکارن ب کەدا خوە ب دلسۆزییا خوە د ناڤ ھونەرا کوردان دا جهـ بگرن. ب ڤی ئاوایی ب مخابنی ڤە مالباتا وان ناھێلە یان سترانبێژ نەوێرە ب رەحەتی کارێ خوە بکە…

* ؟یەکبوون د کلیپێن خوە دا ئەکتەرییێ ژی دکەت، ئەرێ مەرجە هونەرمەند ژبلی دەنگبێژییێ د وارەکێ دن یێ هونەری دا شارەزا بیت؟ سەدەم چنە کلیپێن ژنێن سترانبێژ د کێمن و ئەو ب خوە ئەکتەرییێ د کلیپێن خوە دا ناکەن

-من بەری نھا باھسا ھنەک زەحمەتی و ئاستەنگان کربوو. ئەگەر زەحمەتییا سترانبێژان قاتەک بیت، ئەکتەرییا ژنان 5 قات زەحمەتترە. لێ دیسا ژی ل گۆر شەرت و شورتا کوردان گەلەک سترانبێژ و ئەکتەرێن باش دەرکەتن. هێشتا مە پێدڤی ب گەلەک دەمی هەیە…

بابه‌تێن ب ڤێ مژارێ ڤه‌ گرێدای

1 Comment

  1. التنبيهات: یەکبوون: جڤاکا مە گوهدارییا دەنگێ ژنێ دکەت لێ ناهێلیت کچێن مە ببنە سترانبێژ – كوردى پۆست

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.