ھەڤپەیمانییا نێڤدەولەتی دێ ل دۆر رۆژئاڤایێ کوردستانێ کۆم بیت

ھەڤپەیمانییا نێڤدەولەتی دێ ل دۆر رۆژئاڤایێ کوردستانێ کۆم بیت

WAAR-دهۆك:

ل گۆری ژێدەرێن نووچەیان، ئەندام و پشتەڤانێن ھەڤپەیمانییا نێڤدەولەتی ئەڤرۆ دێ ل دۆر رەوشا رۆژئاڤایێ کوردستانێ و ھێرشێن تورکیا و لڤینێن رژێم و رۆسیا، کۆم بن.
ل گۆری ئاژانسا تاس یا رۆسی، بەرپرسەکێ پلەبلند یێ وەزارەتا دەرڤە یا ئەمریکا دیار کر؛ ئەڤرۆ دێ زێدەتری سیھـ و پێنج دەولەت و رێکخسنێن پشکداری ھەڤپەیمانییا نێڤدەولەتی یا دژی داعشێ و یێن ب رێیێن سڤیل پشتەڤانییا ھەڤپەیمانییا نێڤدەولەتی كری، ل واشنتۆنێ کۆم بن و بوویەر و پێشھاتێن داوییێ گۆتوبێژ کەن، ژ وان ژی ھێرشا تورکیا ل سەر باکۆرێ رۆژھەلاتێ سوورییێ، دەستوەردانێن رۆسیا و رژێما سوورییێ ل وێ دەڤەرێ، ھەلوەستا ھەڤپەیمانێن وان یێن ھێزێن سووریایا دیمۆکراتیک، ھەسەدێ و گاڤێن د دەمێن بھێن دا یێن ئەمریکا و ھەبوونا ھێزێن وێ ل وێ دەڤەرێ.
وی بەرپرسێ وەزارەتا دەرڤە یا ئەمریکا ئاشکەرا ژی کر؛ دێ د دەما بھێت دا کۆمبوونەکا دی یا کۆما بچووککری ژی کو ژ بریتانیا، ئەلمانیا، مسر، ئوردن، سعوودییە، ئەمریکا و فرەنسا پێک دھێت، ل دۆر سوورییێ ھێت کرن و دێ رەوشا سوورییێ ژ ئالییێ لەشکەری و ئێمناھی پرۆسەیا سیاسی گۆتوبێژ کەت و رەوشا باکۆرێ رۆژھەلاتێ سوورییێ ژی ئێک ژ مژارێن کۆمبوونێ بیت.

بابه‌تێن ب ڤێ مژارێ ڤه‌ گرێدای