گەندەلی و وەلاتێ کۆرەیان

گەندەلی و وەلاتێ کۆرەیان
ژیوار عەبدولجەبار

ھێربێرت جۆرج وێلزێ نڤیسەرێ ئنگلیز، کورتە چیرۆکەک ھەیە ب ناڤێ “وەلاتێ کورەیان” چیرۆکا وی وەلاتی و وەلاتێ مە ب رەنگەکی نێزیکی ئێکە. جۆرج وێلز دبێژیت: د ناڤ چیایێن ئەندیز دا ل ئکوادۆرێ، ل جھەکێ گەلەک ئاسێ و مرۆڤ گەلەک بزەحمەت بگەھنێ، کۆمەکا مرۆڤان دژیان. ل سەردەمەکی نەخووشییەک ل ناڤ وان پەیدابوو، وێ نەخووشیێ مرۆڤ کورە دکرن و نەخووشی ژ نڤشەکی بۆ نڤشێن د دویڤ دا دما. پشتی دەربازبوونا 15 نڤشان، خەلکێ وی وەلاتی ھەموو کورە بوون، لێ وان ژیانا خۆ ھەموو رێکخستبوو و کورەیی بۆ وان ئاستەنگ نەبوو. نۆنیز چیاڤانەک بوو ل باژێرێ کیتۆ، رۆژەکێ بۆ رێبەرییا گرۆپەکی دچیتە چیایێن ئەندیز، لێ دکەڤیتە د نھالەکا کویر دا نەشێت دەربکەڤیت، ھەڤالێن وی ھزر دکەن مرییە و دھێلن. نۆنیز ب سەر وەلاتێ کورەیان ھەلدبیت و ژبەر کو رێیا ڤەگەڕیانێ نینە، بریارێ ددەت ل وێرێ بژیت. نۆنیز ھزر دکەت خەلکێ وی وەلاتی ھەموو کورەنە، ئەو بتنێ دشێت جیھانێ ببینیت و دشێت ب سانەھی ببیتە سەرۆکێ وێ کۆما کورەیان. رۆژانە بۆ وان بەحسێ جیھانێ دکەت کا ب چ رەنگی یە، لێ خەلکێ وەلاتێ کورەیان، وی ب کەسەکێ نەخوەش ناڤ دکەن و گۆتنێن وی ب درەو دزانن. ئەگەر کورتەچیرۆکا جۆرج وێلزی ھێژ کورتتر لێ بکەین، ل داوییا چیرۆکێ، نۆنیز پشتی چەندین بزاڤان دکەت، نەشێت ببیتە مەزنێ وەلاتێ کورەیان، ل کچا ئێک ژ مەزنێن وەلاتی عاشق دبیت، مەزنێن وەلاتی رازی نابن وێ بدەنێ. پشتی ئاقلدارێن وەلاتی دروینن و دانوستاندنێ ل سەر بابەتی دکەن، نۆژدارێ وەلاتی یێ ئاقلدار، چارەیەکێ دبینیت و بریار دھێتە دان “چاڤێن نۆنیزی بیننە دەر” ژبەر کو چاڤ ئەگەرێ تێکچوونا ئاقلێ وی نە. نۆنیز ل دەستپێکێ رازی دبیت، لێ دەمێ ژڤانێ نشتەرگەرییا وی نێزیک دبیت، دڕەڤیت و ل تەنشتا وەلاتێ کورەیان دمریت. جۆرج وێلزی بەحسێ وەلاتێ کورەیان کرییە، لێ وەلاتێ دشێین بێژینێ وەلاتێ گەندەلان. ل وەلاتێ مە پڕانییا ئێکجار مەزن گەندەلن، گەندەلی ژ نڤشەکی بۆ نڤشێ دی مایە و وەکی چاوا پشتی چەندین نڤشان ئاکنجیێن وەلاتێ کورەیان ب رەنگەکێ ئاسایی دژیان، وەسا ل ڤێرێ ژی پشتی دەربازبوونا ھندەک نڤشان، ئەم ھەموو ب رەنگەکەێ ئاسایی دگەل گەندەلیێ دژین و ل دەڤ مە بوویە کارەکێ ئاسایی و نە شەرم و نە عەیب. ل وەلاتێ مە، ژ کەسێ بێکار بگرە، تا دگەھییە خودانێن بلندترین پۆستان، گەندەلیێ دکەن، ڤێجا چ ھەست پێ بکەن کو گەندەلییە و چ ژی نە و تا گەھشتییە ئاستەکی کۆ دھێتە گۆتن: ئەو کەس گەندەلیێ ناکەن یێن بدەست نەکەڤیت و ھەرکەسێ بدەست بکەڤیت، دێ کەت! ل وەلاتێ مە، وەلاتێ گەندەلان، من باوەری ھەیە کۆ گەر نۆنیزەک بۆ مە ژ بلنداھییا چیایێن ئەندیز بھێتە خوار ژی، دێ وەک نۆنیزێ وەلاتێ کورەیان لێ کەین و گەر رازی نەبیت گەندەلیێ بکەت یان چاڤێن خۆ ل گەندەلان بنقینیت، دێ وەک نۆنیزی ل قولاچکەکا وەلاتێ مە بداوی ھێت!

بابه‌تێن ب ڤێ مژارێ ڤه‌ گرێدای