گۆتار خواندن و نڤیسین 1

گۆتار خواندن و نڤیسین 1

عادل حەسەن

هه‌ر كه‌س دكاریت باخڤیت یێن كه‌رستێن ئاخفتنێ هه‌بن، كه‌رستێن ئاخفتنێ ژى پێكدهێت ژ هه‌وای و بۆریا هه‌واى و پێكهاتا ناڤ ده‌ڤێ مرۆڤى. بارپترى مرۆڤان ئه‌ڤ پێكهاته‌ هه‌نه‌، ژبه‌رهندێ بارا پترى مرۆڤان شیانێن ئاخفتنێ هه‌نه‌. لێ ئاخفتن و گۆتار خواندن یان نڤێسین ل هنده‌ك تشان د هه‌ڤپشكن و لێ ل ئارمانجێ دبیت دویریاتییه‌ك د ناڤبه‌را وان دا ب شێوه‌یه‌ك رێژه‌یهه‌یه‌. ئاخفتن زێده‌تر دهێته‌ بكارئینان ژبۆ پێدڤیێن رۆژانه‌ یێن مرۆڤى دگه‌ل گه‌هاندنا هنده‌ك هزرێن سه‌ره‌تایى یێن مرۆڤى ژبۆ كه‌سێ به‌رانبه‌ر، لێ گۆتاربێژى یان گۆتار نڤیسین زێده‌تر گرێداى هزرا مرۆڤییه‌‌ بۆ كه‌سێ به‌رانبه‌ر، هزرا مرۆڤى گرێداى پاشخانەیا زانین و هشا مرۆڤییه‌. واته‌ ئاخفتن هند ناهێته‌ پیڤان ژبۆ پاشخانەیا هزر یان هشا مرۆڤى، ئه‌گه‌ر پیڤانه‌ك هه‌بیت ژى گه‌له‌ك یا دژوار نابیت ل سه‌ر پێناسەیا كه‌ساتییا مرۆڤى. لێ گۆتار نڤیسین یان گۆتار خواندن ب شێویه‌كێ زۆر به‌رفره‌هـ دبیته‌ پێڤه‌رێ پاشخانەیا هزر و هشا مرۆڤى، مرۆڤ دشێت و ماف ژى هه‌یه‌ د شرۆڤه‌كرنا گۆتارێ دا ئارمانجا مرۆڤى و سنجێ مرۆڤ به‌رچاڤ بكه‌ت و بكه‌ته‌ پیڤه‌رێ هه‌ره‌ سه‌رەكى ژبۆ پێناسه‌كرنا مرۆڤى، ئه‌ڤه‌ بوویه‌ ئه‌گه‌ر كو د سیاسه‌تێ دا زۆر پێوسته‌ مرۆڤێ سیاسى ئاگه‌هـ ژ هه‌لبژارتنا په‌یڤان و چه‌وانییا به‌رچاڤكرنا په‌یڤان هه‌بیت، د سیاسه‌تێ دا هه‌ڤركى ل هه‌لبژارتنا په‌یڤان ده‌ستپێدكه‌ت، ئه‌ڤرۆ هه‌لبژارتنا په‌یڤان بوویه‌ مه‌زنترین قوتابخانەیا سیاسه‌تمه‌داران، ژبه‌رهندێ د سیاسه‌تێ دا ئیدیەمه‌ك بۆ بكارئینا په‌یڤان هه‌لبژارتییه‌ دبێژنێ دبلۆماسیه‌ت یان هنده‌ك دبێژنێ ئه‌ته‌كێتێن ئاخفتنێ د سیاسه‌تێ. واته‌ ب كورتى گه‌ر هه‌ر مرۆڤه‌ك بخوازیت سیاسه‌تا حزبه‌كێ بزانیت دێ به‌ره‌ڤ شرۆڤه‌كرنا گۆتارێن وێ حزبێ یان كه‌سێن سیاسێن ئاست بلندێن وێ حزبێ چیت، شرۆڤه‌كارێ گۆتارێن سیاسی ب هیچ شێوه‌یەکی خوە گرێناده‌ت ب یه‌ك گۆتار بتنێ به‌لكو دێ چه‌ندین گۆتارێن وێ حزبێ و كه‌سێن وێ حزبێ بۆ ده‌مه‌كێ دیاركرى ده‌ست نیشان كه‌ت و خواندنێ بۆ كه‌ت و گرێدانا وان گۆتارا ب هه‌ڤرا دێ گه‌هیته‌ ئه‌نجامه‌كێ ده‌ستنیشانكرى، دبیت پرس بهێته‌كرن، چما ئه‌ڤ پێكڤه‌ گرێدانه‌؟ ئه‌ز دبێژم حزبا سیاسى مینا تاكه‌ مرۆڤییه‌، چاوا شێوەیێ مرۆڤى دهێته‌ دیاركرن ب شێوەیێ پێكڤه‌ گرێدانا بربرەیا پشتێ (العمود الفقري) و ده‌مار و گوشتێ مرۆڤى و ره‌فتارا مرۆڤى، وه‌سا حزبێن سیاسی ژى شێوەیێ وێ راسته‌قینه‌ دهێته‌ دیاركرن ب چه‌وانییا پێكڤه‌ گرێدانا لق و پۆپ و كه‌سێن دناڤا وان حزبان دا و گۆتارێن وان و ره‌فتارێن وان، ب پێكڤه‌ گرێدانا وان لق و پۆپ و گۆتار و ره‌فتارێن وان، دێ یه‌ك مرۆڤێ ژ كۆمه‌كێ چێبووی دیاردبیت، ژبه‌ر هندێ ئه‌ز حزبا سیاسی پێناسه‌ دكه‌م: ب مرۆڤێ ژكۆما مرۆڤایه‌، نیاسینا پارتێن سیاسى دێ ب شرۆڤه‌كارنا گۆتارێن وان و هه‌لسوكه‌تێ وان نیاسی.

بابه‌تێن ب ڤێ مژارێ ڤه‌ گرێدای