گۆتارا دو چه‌ق

ته‌حسین ناڤشكى

 

به‌ریا ریفراندۆمێ و پشتى ریفراندۆمێ، گۆتاره‌كا دوچق ژ ئالیێن سیاسى یێن به‌شدارى د پرۆسیسا نه‌خریا ملله‌تێ كورد دا كرى بۆ رایا گشتى دهێته‌ ئاراسته‌كرن. چه‌قێ ئێكێ گۆتاره‌كا چاڤلێكه‌ر و گه‌له‌ك سۆزانه‌یه‌ (عاتفیه‌)، به‌هرا بهتر ناڤه‌رۆكا وێ باسێ كاره‌ساتێن به‌رى نها ب ده‌هان چه‌رخان ب سه‌رێ ملله‌تێ كورد هاتین سه‌د باره‌ دكه‌ن‌. یادووێ قه‌پخوازتنا ب هزره‌كا گوتره‌ و ریسكانه (مغامر)یه‌! واته‌‌ چ لێدهێت بلا وه‌لێبهێت و ئه‌وا دژمن همبه‌ر ریفراندۆما مه دكه‌ن‌، هه‌ر ژ فلان كاره‌ساتێ خرابتر نابت و ژ فیسان كاره‌ساتێ كامباختر نابت… هتد. ئه‌ز ب خوه‌ نابینم لسه‌ر ده‌مێ بلندبوونا پاراستنا به‌رژه‌وه‌ندییان و كزبوونا بازارێ ده‌وله‌تا نه‌ته‌وه‌یى ئه‌ڤ جۆره‌ گۆتاره‌ نها خزمه‌تا كێشه‌یا كوردى بكه‌ت.. لاڤه‌لاڤ و راكێشانا سۆزا خه‌لكه‌كى همبه‌ر كێشه‌یه‌ك سیاسى ده‌ركارێن وێ وه‌ك سیاسه‌تڤانێن مه‌ دخوازن ره‌نگه‌ د به‌رژه‌وه‌ندییا ملله‌تێ كورد دا نه‌بن. د درێژییا دیرۆكێ دا، كوردان ب رێژه‌یه‌ك گه‌له‌ك كێم مفا ژ ڤى جۆرێ گۆتارێ وه‌رگرتییه‌؛ ژ به‌ر كو ژبلى به‌رژه‌وه‌ندییان چو ئه‌خلافیات د سیاسه‌تێ دانینن‌. جڤاكێ نێڤده‌وله‌تى د درێژیا دیرۆكێ دا ئه‌ڤ هه‌لوه‌سته‌ همبه‌ر ملله‌تێ كورد دیاركرییه‌؛ هه‌تا نها چو بریارێن سیاسى كو رایه‌كا گشتى یا ده‌ولى لسه‌ر هه‌بت د خزمه‌تا ملله‌تێ كورد دا ده‌رنه‌كرینه‌. بریارا ئێكانه‌ نه‌ته‌وه‌یێن هه‌ڤگرتى د خزمه‌تا ملله‌تێ كورد دا ده‌رێخستى بریار 988 بوویه‌ ل بهار سالا1991 وه‌ك بڕیاره‌ك ئینسانى ده‌رێخستییه‌ ژ بوو پاراستنا كوردان د هێلا 36 دا پشتى ژ به‌ر سته‌ما (رژێما به‌عس) كۆچا ملیۆنى به‌ره‌ڤ سینۆران كرى! ئه‌ڤجا ئه‌ڤ گۆتارا ئالیێن مه‌ یێن سیاسى ئاره‌سته‌ دكه‌ن، ژبلى خوه‌ كێمدیتن و لاوازیێ همبه‌ر داگیركه‌ران و خه‌لكێ دى ئه‌ز نابینم چو به‌رهه‌مێن دى هه‌بن. كه‌واته‌ راسته‌ به‌رییا ریفراندۆم بهێتكرن، پرانییا سه‌ركرداتیێن هه‌رێمێ یێن سیاسى رژدبوون لسه‌ر بریارا خوه‌ كو ب هه‌ر بهایێ هه‌یى، دڤێت ئه‌و ریفراندۆمێ بكه‌ن و چ لێدهێت بلا وه‌لێبهێت و كارتێن ئه‌نفالبوون و كیمیابارن و قركڕنێن ب كۆمى… هتد دكرنه‌ كارتێن به‌رگیریێ بۆ خوه‌ كو مافێ وانه‌ به‌رامبه‌ر ڤان قوربانى دان و كاره‌ساتان ئه‌و بگه‌هنه‌ مافێ خوه‌ یێ كو به‌ریا بهتر ژ سه‌د سالان ل دووڤ رێكڤتنا (سایكس – پیكۆ)ى هاتییه‌ ژ ده‌سات دان. وه‌سا دیاره‌ به‌رپرسێن مه‌ وێ ژ بیردكه‌ن هه‌مان ئه‌ڤ ده‌وله‌تێن زلهێزبووینه‌ هینگێ ژى یان ب هاریكارییا وان یان لبه‌ر چاڤێن وان ئه‌ڤ كاره‌ساته‌ ب سه‌رێ ملله‌تێ كورد هاتنه‌ و به‌رژه‌وه‌ندییان چاڤێن وان گرتنه‌ و هینگێ (ڤیتۆ)یێ خوه‌ دیاركرییه‌ ده‌مێ نه‌یاره‌كێ ملله‌تێ كورد به‌رژه‌وه‌ندییێن وان زلهێزان تێكداین. نموومه‌: ئه‌رێ ما نه‌ هه‌ر ئه‌و (سه‌دام حسێن) بوویه‌ وان وه‌لاتان چه‌كێ ژه‌هراوى و قه‌ده‌غه‌ دایێ و دژى ملله‌تێ كورد ب كارهیناى و وان خوه‌ خوه‌ بێده‌نگكرى و پاشى ل سالا 1991 پشتى سه‌ددامى به‌رژه‌وه‌ندیێن وان تێكداین ژنوو هاتین و ئه‌و كرى یا كرى؛ هه‌تا نها ژى هه‌ر ئه‌و هه‌ڤیره‌ ئاڤێ ڤه‌دخۆت؟! واته‌ ئه‌ڤ گۆتارا ره‌زیل و ئێكسپایرا سه‌ركرداتیا كوردى ئاره‌سته‌ى رایا گشتى دكه‌ت، تنێ ژ بهایێ وان دهینته‌ خوار، ژ به‌ر كو كێمیاباران و ئه‌نفال جاره‌كا دى تاوانباریا وان زلهێزان لبیرێ دهینت و بۆ وان خویا دبت كو راسته‌ دنیا هاتییه‌ گوهه‌رتن ده‌وله‌تسه‌رێ شۆرشا ته‌كنۆ‌لۆژى؛ لێ هیشتا سه‌ركرداتیێن كوردان هه‌مان ئه‌قلیه‌تا به‌رییا 40-50 سالانه‌ و نزانن تنێ به‌رژه‌وه‌ندى دئاخڤن وبازارێ سۆزێ ولاڤه‌لاڤێ گه‌له‌ك كزبوویه‌! . ئه‌ز دبێژم هه‌كه‌ سه‌ركرداتییا هه‌رێما كوردستانێ د ڤان 26 سالێن ده‌ربازبووین دا، بۆ خوه‌ مفا ژ ده‌رفه‌تا زێرین دیتبا، ژێرخانه‌یه‌كا ئابۆرى یا ب هێز، دگه‌ل سوپایه‌كێ هه‌ڤگرتى، خورتكرنا سازیێن بنه‌مایێن ده‌مۆكراسیێ، ب هێزكرنا لۆبیه‌كێ ب هێز مینا لۆبیێ ئسرائیلێ؛ زێده‌بارى رێكخستنا ناڤمالیا كوردى و دادپه‌روه‌ریا جڤاكى به‌رده‌ستكربان، نها دا هه‌لوه‌ستێ جڤاكێ نیڤده‌وله‌تى و دژمنان ژى گه‌له‌ك ب هێزتر بت كو وه‌لاتێن زلهێز بهتر گرنگیێ بده‌نێ و دانپێدانێ ب ریفراندۆما هه‌رێمێ بكه‌ن، لێ مخابن ئه‌ڤه‌ هه‌مى نه‌هاته‌ كرن، تنێ قه‌پخوازتن و خوه‌كێمكرن بوو نه‌ ده‌ستهه‌لاتێن هه‌لوه‌ستی دمه‌یدانێ دا.

بابه‌تێن ب ڤێ مژارێ ڤه‌ گرێدای

كومێنته‌كا نوی دانه‌

لن يتم نشر عنوان بريدك الإلكتروني. الحقول الإلزامية مشار إليها بـ *

Time limit is exhausted. Please reload CAPTCHA.