گوهدار سه‌لاحه‌دین: رێڤه‌به‌رێن سازیێن هونه‌ری ل دهۆكێ‌ نه‌لگۆر پیڤه‌رێن هونه‌رینه‌ به‌لكو لگۆر میزاجێ‌ هنده‌ك كه‌سانه‌

گوهدار سه‌لاحه‌دین: رێڤه‌به‌رێن سازیێن هونه‌ری ل دهۆكێ‌ نه‌لگۆر پیڤه‌رێن هونه‌رینه‌ به‌لكو لگۆر میزاجێ‌ هنده‌ك كه‌سانه‌

Capture

وار – شێركۆ كورد :

گوهدار سه‌لاحه‌ددین ئێك ژ هونه‌رمه‌ندێن دهۆكێ‌ یه‌ د بوارێ‌ هونه‌رێ‌ شێوه‌كاری دا. د هه‌ردو ئالیێن گرفیك و دیزاین. وه‌كو وانه‌بێژ‌ ل په‌یمانگه‌ها هونه‌رێن جوان به‌شێ‌ شێوه‌كاری وانه‌یێن گرافیكێ دبێژیت‌. دیسان سه‌رپه‌رشتێ‌ پرۆژێ‌ كه‌لها نزاركێ‌ و دیزانیه‌رێ‌ چاپه‌مه‌نیێن فلمه‌ فه‌ستیڤالا دهۆكێ یه‌.

ل ده‌ستپێكێ‌ ده‌رباره‌ی په‌یوه‌ندییا مرۆڤی دگه‌ل هونه‌ری سه‌لاحه‌ددینی گۆت: مرۆڤ و هونه‌ر ته‌مامكه‌رێن هه‌ڤدو نه‌ و هه‌ردو ب هه‌ڤڕا ژیانێ‌ ته‌مام دكه‌ن. له‌وران ل ده‌مێ‌ ئاله‌سنگی دروست دبیت هینگێ‌ ئه‌م د ژیانێ‌ دا ‌هه‌ست ب كێماسیێ‌ دكه‌ین. وه‌كو نها ئه‌م دبینن مرۆڤێ‌ ب كێماسی مه‌ هه‌یه‌ ئه‌و ژی كێماسیا هونه‌ری یه.
وار: چ جیاوازی هه‌یه‌ دناڤبه‌را دیرۆكنڤیسه‌ك روودانه‌كێ‌ بنڤیسیت و هونه‌رمه‌نده‌ك روودانه‌كێ‌ وێنه ‌بكه‌ت؟
گوهدار: رۆژانه‌ ئه‌م گوه ل ده‌نگباسان دبین و دبیت سوبه‌هی ئه‌و ده‌نگوباس ببنه‌ روودانێن دیروكی. ئه‌ڤه‌ تشه‌كێ‌ خه‌به‌ری یه‌. لێ‌ ئه‌وا هونه‌رمه‌ند دكه‌ت ئه‌و ب هه‌ستێ‌ ڤه‌ گرێدای یه‌ و دبیت ئه‌و هه‌ستا وی یا راسته‌ قینه‌ بیت.
وار: تو وه‌كو كه‌سه‌ك ل ئۆرۆپا ژیای، هونه‌رمه‌ندێن وێرێ‌ چه‌وان روودانێن خۆ د هونه‌ری دا دیكیۆمێنت كرینه‌؟
گوهدار: گه‌له‌ك تابلۆێن هه‌ین و ل ده‌ستپێكێ‌، ل ده‌مێ‌ ژ بن تاریاتییا كه‌نیسێ‌ ده‌ركه‌ڤتین، وان تابلۆیان گه‌له‌ك كارتێكرن ل سه‌ر كریه‌. ل ده‌مێ‌ (گویا) هاتی و د تابلۆیێن خۆ دا و ب تایبه‌ت تابلۆیه‌كا وی یا دیاره‌ ئه‌وا ب ناڤێ‌ (كوشتارا شۆڕشگێران) به‌حسێ‌ زۆرداری و ده‌ستدرێژیا رۆژانه ‌كری، دیسان هه‌ر ڤی هونه‌رمه‌ندی د كاریكاتۆرێن خۆ دا گه‌له‌ك ره‌خنه‌ ل مه‌لكی، شه‌ركه‌ر و دادگه‌هێ‌ دگرتن. دیسان هه‌تا د قۆناغا دادائیزم و سوریالزمێ‌ ژی هونه‌رمه‌ندێن شێوه‌كار به‌رده‌وام ره‌خنه‌ ل كه‌سێن شه‌رخواز گرتییه‌. و ژ وان كارێن كو ل UN هاتییه‌ پاراستن كارێ‌ گورنیكایه‌ یێ‌ بیكاسۆى و گه‌له‌ك كارێن دی.
وار: ڤان كارێن هونه‌رمه‌ندێن رۆژئاڤای چ كارتێكرن ل ژیانا وان یا رۆژانه‌ كریه؟‌
گوهدار: گه‌له‌ك كارتێكرن كریه،‌ بۆ نموونه‌ كه‌سایه‌تیۆا (فریدا كالو) كو تابلۆیا وێ‌ ل سه‌ر دراڤێ‌ مه‌كسیكی هاتییه‌ چێكرن. ئه‌و كچه‌كا گه‌له‌كا راستگۆ بوو، لێ‌ هه‌ڤژینێ‌ وێ‌ نیگاركێشێ‌ ده‌وله‌تێ‌ بوو و بتنێ‌ بۆ هزرا وان سیاسه‌تمه‌داران كار دكر. هه‌تا نها ل مه‌كسیكۆ، ئه‌ڤ ئێش و ئازارێن ل وى سه‌رده‌مێ ئه‌ڤ هونه‌رمه‌ندا كچ تێدا ژیایى، بووینه‌ جهێ ڤه‌كۆلینێ.
وار: مه‌ كێشا وه‌رگری هه‌یه‌ و هه‌تا نها وه‌رگرێ‌ مه‌ دكارێن هونه‌ری دا كێمن‌، كی دشێت وه‌رگێرى چێكه‌ت یان ب ئافرینت؟
گوهدار: ئه‌گه‌ر ده‌ستهه‌لات د ده‌ستێ‌ مه‌ دا بیت ئه‌م دشێن ب وێ‌ ده‌ستهه‌لاتێ‌ وه‌رگری ژی چێكه‌ین. چێكرنا وی نه‌ هاوكێشه‌یه‌كا بیركاریه‌، دێ‌ بێژی ئێك كۆمكرن ئێك دێ‌ بیته‌ دو. به‌لكو چێكرنا هۆشێ‌ مرۆڤی یه‌، دێ‌ چه‌وا شێن كه‌سه‌كێ‌ چێكه‌ى هزر بكه‌ت خودان عه‌قله‌. ژبه‌ركو ئه‌گه‌ر جڤاك هۆشیار بوو، دێ‌ هینگێ‌ وه‌رگرێ‌ هونه‌رێ‌ شێوه‌كاری ژی چێبت.
وار: تو بێژی ده‌ستهه‌لات ناخوازت وه‌رگر چێببیت؟
گوهدار: ئه‌ز باوه‌رناكه‌م وه‌سان بت. كه‌س نینه‌ حه‌ز نه‌كه‌ت ئه‌ڤ ره‌وشه‌ چێببیت، لێ‌ هه‌تا نها ئه‌و میكانزما پێدڤی نه‌بوویه‌.
وار: بوچی بۆ كه‌سایه‌تییه‌كا سیاسی دێ‌ هزار مرۆڤ هه‌بن ده‌ستان بۆ بقوتن، بوچی بۆ هونه‌رمه‌نده‌كێى سه‌د كه‌سن نابن كارێ‌ وی ببینن؟
گوهدار: هنده‌ك تشتێن هه‌ین ئێكسه‌رن و هنده‌ك نه‌ ئێكسه‌رن. وه‌ختێ‌ تو ب خۆ‌ پرتووكان بخوینی و خۆ‌ ره‌وشه‌نبیر بكه‌ی و بشێی خودان دیتنه‌كا تایبه‌ت بی، دێ‌ هینگێ‌ حه‌ز ژ كارێ‌ هونه‌ری كه‌ی. لێ‌ ئه‌گه‌ر ته‌ چ دیتنێن جودا نه‌بن دێ‌ هینگی چاڤه‌رێ‌ بی هه‌ما ئێك بۆ ته‌ باخڤت یان ل سه‌ر تێله‌ڤزیۆنێ‌ گوهداریا تشته‌كێ‌ بكه‌ی كو ئێكسه‌ر ته‌ تێبگه‌هینت. ئه‌گه‌ر به‌رێ‌ خۆ‌ ژی ب دینی، ل سه‌ر ده‌مێ‌ رژێما دكتاتۆر یا به‌عسیان، وانا تێله‌ڤزیۆن ل مالان به‌لاڤدكرن. داكو ئه‌و ئێكسه‌ر بۆ خه‌لكی باخڤن. هه‌تا كو شێوه‌كاره‌كێ‌ ئیراقی تابلۆیه‌ك چێكر د تابلۆیێ وی دا، تێله‌ڤزیون گه‌هشت بوو هنده‌ك جهان كو هێشتا كاره‌ب نه‌گه‌هشتبوویێ. ئه‌گه‌ر نها ژی به‌رێ‌ خۆ‌ بده‌یێ خه‌لكێ‌ مه‌ ئه‌و كارتێكرن یا ل سه‌ر مای و ب ئاریشه‌یێن خۆ یێن رۆژانه‌ هند یێ‌ مژووله‌ هه‌ما تێله‌ڤزیۆن چ بێژیت ئه‌و دێ‌ باوه‌ركه‌ن. ئه‌و ده‌م نینه‌ هزرا خۆ‌ د راستیا كاره‌كێ‌ هونه‌ری دا بكه‌ن.
وار: ل سه‌رده‌مێ‌ دستهه‌لاتێن دكتاتۆر رۆلێ‌ هونه‌رمه‌ندی دبیته‌ چ؟
گوهدار: دبیته‌ سفر
وار :دێ‌ چه‌وا شێت وێ‌ سفرێ‌ كه‌ته‌ ژماره‌؟
گوهدار: ئه‌و لدووڤ به‌رخو‌دان و هه‌لوه‌ستێ‌ هونه‌رمه‌ندان دمینت كا ئه‌و چه‌ند دێ‌ شێن خه‌باتێ‌ بكه‌ن و ل سه‌ر به‌رخودانا خۆ‌ یا هونه‌ری به‌رده‌وام مینن. ژبه‌ركو هونه‌رمه‌ند نه‌ بتنێ‌ ئه‌و كه‌سه‌ یێ‌ د ستۆدیۆیا خء‌ دا كاری هونه‌ری دكه‌ت. به‌لكو‌ هه‌لوه‌ستێ و ره‌فتارێن وی ژی به‌شه‌كه‌ن ژ هونه‌رمه‌ندیا وی.
وار: ئێك ژ كێشێن مه‌ هه‌ین د هونه‌ری دا نه‌بوونا ره‌خنه‌گرییه‌. ل دهۆكێ‌ مه‌ ره‌خنه‌گرێن هونه‌ری هه‌نه؟
گوهدار: مه‌ ده‌ستپێك یا هه‌ی وه‌كو ئه‌زموون. لێ‌ دڤێت ئه‌م رێزێ‌ ل ڤێ‌ ده‌ستپێكێ‌ بگرین و د ئاڤاكرنا وێ‌ دا هاریكار بین. ل وه‌لاتێن رۆژئاڤای گه‌له‌ك جاران ره‌خنه‌گر لدووڤ كاران ناگه‌ریت، به‌لكو هونه‌رمه‌ند لدووڤ ره‌خنه‌گران دگه‌ریت، ژێ‌ دخوازیت ل سه‌ر كارێن وی بنڤیسیت. دڤێت ئه‌م ژی خۆ‌ هه‌وجه‌ی ڤان كه‌سان بكه‌ین و ژێ‌ بخوازین ل سه‌ر كارێن هونه‌ری پتر بنڤیسن، ژبه‌ركو ره‌خنه‌گر ‌گرێدانه‌كه‌ دناڤبه‌را هونه‌رمه‌ند و خه‌لكی دا. هه‌رچه‌ند گه‌له‌ك كێم كه‌س هه‌نه‌ ئه‌وێن دنڤیسین، ره‌نگه‌ ل سه‌ر كارێن هه‌ڤالێن خۆ ژی بنڤیسن، لێ‌ ئه‌ز ڤێ‌ چه‌ندێ‌ ب نێگه‌تیف نابیم به‌لكو پێنگاڤێن باشن و هێژای ریزگرتنێ‌ نه‌.
وار: گه‌له‌ریا دهۆك چه‌ند شیایه‌ كارێن شێوه‌كاران دیكیۆمێنت بكه‌ت؟
گوهدار: گه‌له‌ریا دهۆك د دیكیۆمێنتكرنا كارێن هونه‌ری دا گه‌له‌ك سه‌ركه‌ڤتی بوویه‌. ئه‌گه‌ر به‌رێ‌ خۆ‌ بده‌ینێ‌ هه‌تا كو كارێن ئه‌و كه‌سێن نه‌ماین ژی د ڤێ‌ گه‌له‌ریێ‌ دا ب جوانی هاتینه‌ پاراستن. وه‌كو كارێن هونه‌رمه‌ند شه‌هید سه‌لمان. دیسان هونه‌رمه‌ندێ‌ ره‌حمه‌تی سه‌عده‌ددینى كو ئه‌م هه‌موو پێ داخبار بووینه‌.
وار: ل دهۆكێ‌ كارێن په‌یكه‌ری د كێمن. ب دیتنا ته‌ بۆ دهۆكێ‌ په‌یكه‌ر چه‌ند گرنگه‌؟
گوهدار: ئه‌ز دبینم گه‌له‌ك یا گرنگه.‌ ئه‌ڤ خه‌مساریا هه‌ی یا رێڤه‌به‌ریا باژێرڤانییا دهۆكێ‌ یه‌. ژبه‌ركو ئه‌و د خه‌مسارن د رێكوپێككرنا باژێرێ‌ دهۆكێ‌ دا ب تایبه‌ت بۆ دروستكرنا جهێن گۆنجای بۆ په‌یكه‌ران.
وار : تو سه‌رپه‌رشتێ‌ كه‌لها نزاركێی، ئه‌ڤ پروژه‌یه‌ چه‌وان برێڤه‌ دچیت؟
گوهدار: ئه‌ڤه‌ دو ساله‌ ئه‌ڤ پرۆژه‌یه‌‌ راوه‌ستیایه‌. ئه‌و ژی ژ به‌ر ئه‌گه‌رێن دارایی و نه‌بوونا بودجێ‌. كه‌لها نزاركێ‌ بۆ دیكیۆمێنتكرنا روودانێن ئه‌نفالان، جهه‌كێ‌ گرنگه.‌ دیسان ئه‌ڤ پرۆژه‌یه‌ دێ‌ گه‌له‌ك كارێن هونه‌ری و دیكیۆمێنتی دا ناڤ خۆ‌ دا پارێزیت. و وه‌كو مۆزه‌خانه‌یه‌ك دێ‌ خه‌لك شێت سه‌ره‌دانێ‌ وێ بكه‌ت. بودجا ڤی جهێ‌ ژلایێ‌ ئه‌ندازیاره‌كێ‌ ئه‌لمان و ئێكێ‌ كورد ڤه‌ هاتیه‌ پێشبینی كرن، ئه‌وژی ژ دوازده‌ هه‌تا سێزده‌ ملیۆن دۆلارانه‌. هه‌تا نها نێزیكێ‌ دو ملیار دینارا هاتییه‌ مه‌زاختن. ئه‌و ژی ژلایێ‌ پارێزگه‌ها دهۆكێ‌ ڤه یه‌.‌ ژبه‌ركو ئه‌و جهێ‌ جێبه‌جێكارێ‌ پروژه‌ی بوو.
وار: به‌رپرسێن هونه‌ری ل دهۆكێ‌ لگۆر چ پیڤه‌ر جهێ‌ به‌رپرسیاره‌تێ‌ وه‌ردگرن؟
گوهدار: ئه‌ڤ پرسیاره‌ یا تێئێخستنێ‌ یه‌… لگۆر چ پیڤه‌رێن هونه‌ری نینن. به‌لكو‌ هه‌ما میزاجێ‌ هنده‌ك كه‌سایه‌.
وار: تو وه‌كو دیزانیه‌رێ‌ چاپه‌مه‌نییا فلمه‌ فیسته‌ڤالا دهۆكێ، هه‌وه‌ بوو ئه‌ڤ ساله،‌ بۆ ڤێ‌ فه‌ستیڤالا مه‌زن چ به‌رهه‌ڤی هه‌نه‌؟
گوهدار: نزانم ب تنێ‌ ئیمێله‌ك یێ‌ بۆ من هاتی كو تێدا ئاماژه‌ ب هندێ‌ كریه‌ كو ژ 1 تا 8 ی دیسه‌‌مبه‌رێ‌ فه‌ستیڤاله.‌‌
وار: سه‌ندیكا هونه‌مه‌ندان لقێ‌ دهۆك بڕیار دایه‌ په‌یكه‌ره‌كى بۆ دو پێشمه‌رگه‌یان، ئه‌و ژی قاسم شه‌شۆ و سمێ‌ بوسه‌لی چێبكه‌ت تو ڤێ‌ چه‌ندێ‌ چه‌وا دبینی؟
گوهدار: نو كۆمێنت..

بابه‌تێن ب ڤێ مژارێ ڤه‌ گرێدای