گوند وێرانبوون!

گوند وێرانبوون!

عیماد ئالیخان

چەندین سالە سنورێ باشورێ کوردستانێ بوویە مەیدانا شەر و ئالۆزیان و دھێتە تۆپبارانکرن ژلایێ سوپایێن ھەردو وەلاتێن تورکیا و ئیرانێ ڤە ب بھانەیا ھەبوونا پارتا کارکەرێن کوردستانێ (پ.ک.ک) ل وان دەڤەران و ئەنجام زەرەر و زیانێن بەردەوام ب ملک و مال و گیانی ھاولاتیێن سڤیل دکەڤیت و گەلەک ژ گوندێن سەر سنوران ھاتینە چولکرن و ئێدی ژیان تێدا نەمایە، و تا نوکە دووماھیەک بۆ ڤی شەری یێ کو ئەڤە چەندین سالە بەردەوام د ناڤبەرا وان دا نەھاتیە دانان، بەرۆڤاژی رۆژ بۆ رۆژ ئەڤ شەرە دژوارتر لێدھێت و زێدەتر زیان ب ھاولاتیێن سڤیل دکەڤیت ژ ھەموو لایەکی ڤە، تاکو گەھشتیە وی رادەی ئێدی ئالۆزیێن خوە ژ سەر سنوران ئیناینە دناڤا باژێر، کۆمەلگەھ و گۆندان دا و رەوشا دەڤەرێ ئالۆز بوویە!
لەوا دڤێت دەستھەلات و حکومەتا باشورێ کوردستانێ بێ دەنگ نەمینیت و رێ نەدەت زێدەتر رەوشا دەڤەرێ تێکبچیت و مەترسی بگەڤیتە لسەر گیانێ ھاولاتیێن سڤیل، و ئاخا باشورێ کوردستانێ ببیتە مەیدانا شەرێن وان، کو ئاکنجیێن وان دەڤەران نەشێن ب خوەشی و ئارامی قەستا جھ و وارێن خوە بکەن و ژیانێ لێ دەربازبکەن، ھەروەسا پێدڤی یە ھێزا پەکەکێ ژی خوە نێزیک گۆند و باژێر و کۆمەلگەھان نەکەت و وان جھان چولبکەت داکو سوپایێن ھەردو وەلاتان ب بھانەیا ھەبوونا وان بۆردومانێ راگریت!
پرانیا گوندان مەترسیا لسەر و ب تایبەت یێن سنوری و ھاتینە چولکرن، لێ ئەڤ مەترسیە گەھشتیە باژێر و کۆمەلگەھان ژی! ئەرێ چ جھەک مایە کو ئەم ب ئارامی ژیانێ لێ دەرباز بکەین؟ یان ژی مەرەم ژ ئینانا ئالوزیێن خوە ژ سەر سنوران بۆ ناڤا باژێر، کۆمەلگەھ و گوندان دا چیە؟ ئەرێ ما بەس نینە ھندەک دەڤەر ئەڤە چەندین سالە ھاتینە چولکرن و بەردان ژ بەر شەرێن وان یێن بەردەوام و بارۆدوخ ئالۆزبوویە؟ بۆچی بەردەوام ھاولاتیێن سڤیل ببنە قوربانیێن شەرێن د ناڤبەرا وان دا؟ کی بەرپرسە ژ چولکرنا دەڤەرێن سنوری؟ یان ژی کی بەرپرسە ژ ژدەستدانا گیانێ ھاولاتیێن سڤیل یێن ئاکنجیێن گوندان کو بەردەوام دھێنە تۆپبارانکرن و گیان، مال و ملکێ خوە ژ دەست ددەن؟ یان بۆچی پەکەکە ھێزا خوە یا لەشکەری نابەتە دناڤا ئاخا وەلاتێ تورکیا دا ئەگەر خوە ب کورد دنیاسن و ل وێرێ بەردەوامیێ بدەنە خەباتا خوە؟ یان ژی ئەگەر راست خوە ب کورد بنیاسن چاوا رازی دبن و شەرێن خوە دئیننە د ناڤا ھاولاتیێن سڤیل و گوندێن باشورێ کوردستانێ دا؟ بێ دەنگیا دەستھەلاتێ بەرامبەر رەوشا وان دەڤەران یێن کو بەردەوام دھێنە تۆپبارانکرن بۆ چ ڤەدگەریت؟ ئایا حەز ناکەت پەیوەندیێن خوە دگەل ھەردو ئالیان تێک بدەت و بکەڤیتە د شەری دا؟ یان ژی ھندەک ئەگەرێن دی یێن سیاسی، ئابووری و … ھتد ھەنە دناڤبەرا ھەرسێ ئالیان دا؟ لێ ب ڤی رەنگی دێ رەوشا دەڤەرێ رۆژ بۆ رۆژ ئالۆزتر لێھێت!
د راستی دا چ خەبات د ناڤا گوند و باژێران دا ناھێنە کرن، ھەروەسا چ ھێزەک ژی ناھێتە ژناڤبرن ب تۆپبارانکرنا گۆند و کۆمەلگەھان کو ھاولاتیێن سڤیل تێدا د ئاکنجی!
لەوا دڤێت پەکەکە بخوە ھێزا خوە یا لەشکەری ژ گوندان دوور بئێخیت بێی کو چ کەسەک یان لایەنەک داخوازێ ژێ بکەت دەڤەرێ ڤالا بکەن و داکو زێدەتر زیان ب ھاولاتیان سڤیل نەکەڤیت.
و باشترە ئێکەم پێنگاڤا دەستھەلات و حکومەتا نوو یا ھەرێما کوردستانێ بۆ خوەشکرنا ژیانا ھاولاتیان راوەستانا ڤی شەری بیت کو ئەڤە چەندین سالە یێ بەردەوام دناڤبەرا پەکەکێ و ھەردو وەلاتێن جیران دا ل سەر ئاخا ھەرێمێ و داخواز ژ پەکەکێ بھێتە کرن نەمینتە ل دەڤەرێ و ھێزا خوە یا لەشکەری نەھێلیت، داکو ئێمناھیا دەڤەرێ تێک نەچیت و زێدەتر زیان ب ھاولاتیێن سڤیل نەکەڤیت.

بابه‌تێن ب ڤێ مژارێ ڤه‌ گرێدای