گه‌نده‌لییا ل كوردستانێ‌، وێرانتره‌ ژڤۆلكانێن ژاپۆنێ‌

 

ئیشه‌ات نوری عه‌‌بدال :

لڤێ‌ داویێ‌ دڤه‌كۆلینه‌كا نوو یا زانستی دا, زانایان وه‌ها پێشبینی دكه‌ن كو ل سه‌د سالا بهێت, دێ‌ ب ئه‌گه‌را په‌قینه‌كا مه‌زنا ڤۆلكانی وه‌لاتێ‌ ژاپۆنێ‌ هێته‌ بنبڕكرن و ژیانا زێده‌تری 120 ملیۆن كه‌سان دێ‌ هێته‌ وێرانكرن.
بهه‌ر حال, ل په‌ره‌گرافا یه‌كێ‌ یێ‌ مانشێتێ‌ گۆتارێ‌ خوه‌یایه‌ كو گۆتارا مه‌, نه‌ گۆتاره‌كا زانستییه‌, نه‌ ژی ل سه‌ر وه‌لات و ڤۆلكانێن ژاپۆنێ‌ یه‌, به‌لكو مه‌به‌ستا مه‌ هه‌ڤبه‌ركرنه‌ك بوویه‌ ل سه‌ر وێرانكرنێن شه‌ڕ و بیڤه‌له‌رز و ڤۆلكانێن ل جیهانێ‌, كو بزانین وێرانیا وان چ جاره‌كێ‌ كێمتره‌ نه‌ بوویه‌, ژ وێرانی و ژناڤبرنا گه‌نده‌لیا ل كوردستانێ‌, ئه‌و گه‌نده‌لیا رۆژێ‌ سه‌د جار, مه‌ ب ره‌نگڤه‌دانێن ئازارێن ملله‌تی دا ئه‌شكه‌نجه‌ دده‌ت, له‌وا من ژی هه‌ولدایه‌ مینا گه‌له‌ك نڤیسه‌ران, بتنێ‌ بشێم هنه‌ك هه‌ستێن ده‌روونێ‌ خوه‌ ل سه‌ر ڤێ‌ یه‌كێ‌ ته‌نا بكه‌م, ئه‌گه‌ر نه‌, ئه‌م هه‌ر هه‌موو باش دزانین كو گه‌نده‌لیا ل هه‌رێما كوردستانێ‌, حه‌تا یا پێشبركیێ‌ دكه‌ت, دگه‌ل صومال و سودانێ‌, چۆنكو ئه‌ڤرۆ ل جیهانێ‌, به‌س صومال و سودانن كو ژ وه‌لاتێ‌ مه‌, ب كه‌نده‌ل ترن!
“دیارده‌یا گه‌نده‌لیێ‌ ژلایێ‌ پسپورانڤه‌, بكرمێ‌ سه‌رخۆرێ‌ وه‌لاتی دهێته‌ هه‌ژمارتن, ب ئه‌و كرمێ‌ كو هه‌موو داهاتی و به‌رهه‌مێ‌ وه‌لاتی دخۆت, و هێدی هێدی وه‌لاتی به‌ره‌ڤ كێم خۆینی و شێرپه‌نچا ئابۆری دبه‌ت.”
به‌لێ‌ دڤێت ئه‌م ژبیرنه‌كه‌ین, كوردان دكه‌ڤن دا یێ‌ گۆتی “ئاڤا شێلی ژ سه‌رۆكانیێ‌ یه‌” ئه‌ڤجا تاكو سه‌رۆكانی پاقژ نه‌بیت, چه‌ندی ئاڤا كو ل سه‌ری ژۆردا بهێت, دێ‌ جووك و ده‌راڤێن لبن دا, شێلی تربن, ئه‌ڤ یه‌كه‌ ژی به‌رۆڤاژیا وه‌لاتێن پێشكه‌فتی یه‌, ئه‌و وه‌لاتێن ب سه‌روكانیێن خوه‌ ڤه‌, دزه‌لال و پاقژكری, ئێدی ده‌ما جووك و ده‌راڤ جار ب جار شێلی ژی دبن, سه‌رۆكانی بهێزا پێلێن خوه‌ یێن زه‌لال, هه‌موویان جاردی پاقژ دكه‌ت.!
بنێرن, ئه‌م دبینین كو هێزێن مه‌ یێن سیاسی به‌حسا تێگه‌هێ‌ دیمۆكراسیێ‌ دكه‌ن, به‌حسا سه‌روه‌ریا یاسایێ‌ دكه‌ن, به‌س مخابن كو تا نها ژی ب پراكتیك دخزمه‌تدا نه‌ بووینه‌, له‌ورا ژی لژێر ده‌ستهه‌لاتا گه‌نده‌لیا ل كوردستانێ‌, نه‌ یاسا هه‌بوویه‌, و نه‌ژی دیمۆكراسی! خوه‌ ئه‌گه‌ر بێژین هه‌بوویه‌ ژی به‌س ب تیۆری بوویه‌, یان ژی دناڤ كاڤلانه‌كێ‌ دۆرپیچكری, و لژێر به‌رژه‌وه‌ندیا پارت و كه‌سێن ده‌ستهه‌لاتداریێ‌ ڤه‌ بوویه‌, چۆنكی نه‌ك یاسا ب میزان و یه‌كسانیا خوه‌, هاتیه‌ بجئینان! نه‌ ژی دیمۆكراسی جاره‌كێ‌ ب درۆشمێن ئازادیێ‌ ل سه‌ر مه‌, هاتیه‌ هه‌لدێران! له‌ورا به‌رپرس و پله‌دارێن له‌شكه‌ری, ب ئاشكه‌رایی گه‌نده‌لیێ‌ دكه‌ن, و مینا ئه‌و كرمێن دو سه‌ر یێ‌ كوردستانا مه‌ به‌ره‌ڤ وێرانی و شێرپه‌نچه‌یا مرنێ‌ دبه‌ن, و درووشمێن دیمۆكراسیا ڤی وه‌لاتی, یێ‌ دگه‌ل رۆژێن بێ‌ ئازادیێ‌ دا وه‌غه‌ر دكه‌ن, لێ‌ مخابن كو هێشتا ژی مه‌ جاره‌كێ‌ نه‌دیتیه‌, ل دوویڤ رێنومایێن یاسایی, كرمه‌ك ژڤان هزاره‌ها كرمێن دو سه‌رێن وه‌لاتی هاتبیته‌ دادگه‌هكرن.!
ل داویێ‌ یێ‌ دبێژن: خزمه‌تكار و رۆژنامه‌نڤیسێ‌ هه‌نێ‌, ل سه‌ر ئه‌زمان درێژاهیا ده‌ڤێ‌ خوه‌, ژلایێ‌ چه‌ند فریشتێن ل ئه‌سمانێ‌ كوردستانێ‌, شه‌ڤا بۆری ب چه‌ند كۆله‌ها یێ‌ هاتیه‌ تیرۆركرن, ژنا هه‌نێ‌ ژبه‌ر گونه‌ها نه‌ هه‌مبێزكرنا مێرێ‌ خوه‌, هه‌مان فریشتا ب ئاگرێ‌ جه‌هنه‌مێ‌ سووت, و هه‌ر چه‌ند جارا ساله‌كێ‌, چه‌ند سه‌د ملیۆنێن دولارا, یێن دهێنه‌ ونداكرن و تا داوییا سه‌رێ‌ بیست و سێ‌ سالایه‌, ئه‌ڤ سیناریۆیه‌ ب ده‌ڤۆكێن جۆدا جۆدا دهێنه‌ گۆتن, ئێدی به‌سه‌.! وه‌رن دا بهه‌ڤرا لڤێ‌ هه‌ڤكێشا ئاشۆپی دووربكه‌ڤین, به‌ر ب كه‌تۆارێ‌ بێكاریا, ب سه‌ده‌ها هزار كورێن شه‌هیدێن خوه‌ بێژین: كانێ‌ یاسا و دیمۆكراسی.؟!

بابه‌تێن ب ڤێ مژارێ ڤه‌ گرێدای