گرنگییا خێزانێ‌ د ئاڤاكرنا جڤاكه‌كێ‌ شارستانى دا

گرنگییا خێزانێ‌ د ئاڤاكرنا جڤاكه‌كێ‌ شارستانى دا

Capture

وار – حكمه‌ت خابوور :

خێزان مه‌زنترین ده‌زگه‌هه‌ د جیهانێ‌ دا, ئه‌و لبنه‌یه‌كه‌ د ئاڤاكرنا دیوارێ‌ جڤاكی دا, چو جڤاك ب ئاوا‌یه‌كێ‌ موكم ناهێنه‌ ئاڤاكرن و چو ده‌زگه‌هـ نه‌شێن ڕۆلێ‌ خوه‌ یێ‌ كاریگه‌ر ببینن, هه‌كه‌ خێزان یا ئێكگرتی نه‌بیت. ئاڤاكرنا شارستانییه‌تێ‌ د ناڤا هه‌ر جڤاكه‌كى دا, پێدڤی ب هنده‌ك بنه‌مایێن پڕی گرنگی هه‌یه‌، داكو بگه‌هیته‌ ئارمانجێن خوه‌, ڤی كاری پێدڤی ب هزركرنێن گرنگ هه‌یه‌، داكو ئه‌ڤ كاره‌ ببیته‌ ئه‌ركه‌كێ‌ پیرۆز د ژیانا گه‌ل و ملله‌تان دا, له‌و فه‌ره‌ هه‌موو شیان بهێنه‌ مه‌زاختن، داكو بگه‌هینه‌ ئارمانج و مه‌ره‌مێن خوه‌. ژبه‌ركو خێزان ده‌زگه‌هه‌كێ‌ جڤاكییه‌ و كاكلكا جڤاكییه‌ و لبنه‌یه‌كا سه‌ره‌كییه‌ د ئاڤاكرنا وى دا, له‌و ئه‌ڤ ده‌زگه‌هه‌ گه‌له‌كێ گرنگه‌ د پرۆژه‌یێن ئاڤاكرنا شارستانییه‌تا مرۆڤ و جڤاكى دا, چه‌ند هه‌ستێ‌ تاكی د خێزانێ دا بلندببیت، ئه‌ركێ‌ وی د جڤاكی دا پتر لێ دهێت و به‌پرسایه‌تیێن وی یێن هه‌مه‌جۆر ژی پتر لێ دهێن, ژبه‌ر هه‌بوونا ره‌وشه‌نبیریێن جودا د ناڤا خێزانێ‌ دا و زانینا وان بۆ لایه‌نێن ساخله‌مى‌ و ئابووری و جڤاكی ئه‌وێن كارتێكرنێ‌ ل تاكی و خێزانێ‌ دكه‌ن ژلایێ‌ پێشكه‌ڤتنێ‌ ڤه‌, ئه‌ڤه‌ ژی ب ئاویه‌كێ‌ ئه‌رێنی به‌روڤاژی دبیته‌ لسه‌ر ژیانا جڤاكی و پێشكه‌ڤتن و شارستانییه‌تا وی. ژبه‌ركو خێزان ئه‌و جڤاكێ‌ بچووكه‌ ئه‌وێ‌ د ناڤا چارچۆڤه‌یێ دا زاڕۆ په‌روه‌رده‌دبیت و فێری ره‌وشت و سه‌ره‌ده‌ریكرنێن دروست دبیت. پێكهاتنا خێزانێ‌ وه‌كو یا دیار دایباب و زاڕۆیێن وان, ئه‌ڤه‌ ب خوینێ‌ پێكڤه‌ دهێنه‌ گرێدان و دبیت هنده‌ك جاران ل ڤی سنوورى‌ ده‌رباز ژی ببیت و بگه‌هیته‌ باپیر، داپیر، مام، مه‌ت، خال و خاله‌تان, هه‌ر چه‌ند هه‌ژمارا خێزانێ‌ پتر بلند ژی ببیت, ئه‌و هه‌ر دێ‌ مینیت ڤێكرا گرێدانه‌كا جڤاكی یا گرنگ و هه‌ستا جڤاكی و ره‌وشه‌نبیری و ساخله‌می و ئابووری؛ گرنگی و كارتێكرنا خوه‌ یا فه‌ر هه‌یه‌ د وێ‌ خێزانێ دا. ئاڤاكرنا جڤاكێن شارستانی ب ئاوایه‌كێ‌ سه‌ره‌كی پشتبه‌ستنێ‌ لسه‌ر هوشیاری و هه‌ستا خێزانێ‌ و ئێكگرتنا وان دكه‌ت ژلایێ‌ مرۆڤایه‌تیێ ڤه‌, پێشكه‌ڤتنا جڤاكی د كارێن رۆژانه‌ دا و لایه‌نێ‌ سیاسی و ره‌وشه‌نبیری و ئابووری و جڤاكی یا گرێدایه‌ ب هوشیاریێ‌ ڤه‌ د ناڤا چارچۆڤه‌یێ‌ جڤاكی دا. خێزانێ‌ ڕۆله‌كێ‌ مه‌زن هه‌یه‌ د گه‌شه‌كرنا به‌هره‌ و هێزا ئافراندنێ دا لجه‌م زاڕۆی و په‌یداكرنا سه‌قایه‌كێ‌ ئارام بۆ وی, وه‌كو جهێ‌ ئاكنجیبوون، ساخله‌مى، په‌روه‌رده‌ و فێركرنێ‌. ئاڤاكرنا تاكی د ناڤ خێزانێ‌ دا واته‌ هه‌ستكرنا وی ب گرێدانا وی ب وێ‌ خێزانێ‌ ڤه‌, ئه‌ڤه‌ باوه‌رییا وی ب كه‌سایه‌تیا وی بلندتر لێدكه‌ت. ژ گرنگترین ئه‌و كارێن تاك پێ‌ مفادار دبیت د ناڤا خێزانێ‌ دا, پێگه‌هاندنا وی ژلایێ‌ جڤاكی و باوه‌ریێ‌ ڤه‌, واته‌ فێربوونا وی بۆ رێیێن دروست یێن سه‌ره‌ده‌ریكرنێ‌ دگه‌ل جڤاكی. چه‌ند چه‌كێ‌ پێگه‌هاندنێ‌ بهێز و ساخله‌م بیت, واته‌ ئه‌و جڤاك دێ‌ پتر یێ‌ شارستانی بیت. خێزانا سه‌ركه‌ڤتی ئه‌وه‌ یا رێزێ‌ ل زانستی و ره‌وشه‌نبیریێ‌ دگریت, ژبه‌ركو ئه‌و هه‌ردو ئه‌و بنه‌مانه‌ یێن جڤاكێن شارستانی لسه‌ر دهێته‌ ئاڤاكرن د بوارێن ره‌وشه‌نبیری و ئابووری و ساخله‌میێ دا‌, چو جڤاكێن نه‌خوانده‌وار یان هه‌ژار ژلایێ‌ ئابووری ڤه‌ یان ژی نه‌ دساخله‌م ژلایێ‌ ساخله‌میێ ڤه‌ نه‌شێن پێشبكه‌ڤن د وارێن شارستانى دا, ژبه‌ركو هه‌موو كارتێكرنان ڕۆله‌كێ‌ مه‌زن هه‌یه‌ د ئاڤاكرنا شارستانیه‌تێ‌ دا بۆ هه‌ر جڤاكه‌كی.

بابه‌تێن ب ڤێ مژارێ ڤه‌ گرێدای