گاره‌ دێ پشكداریێ د خول و كاسا ئیراقێ دا كه‌ت

گاره‌ دێ پشكداریێ د خول و كاسا ئیراقێ دا كه‌ت

وار – دهۆک :

كارگێرییا یانه‌یا گاره‌ بڕیاردا پشكداریێ د خول و كاسا ئیراقێ دا بكه‌ت، بۆ ڤێ چه‌ندێ ژى چوار یاریكه‌رێن نوو ئیناینه‌ دناڤ رێزێن تیما خۆدا و نۆكه‌ ژى به‌رهه‌ڤیێن خۆ بۆ خولێن هه‌رێمێ و ئیراقێ دكه‌ت و ل ڤان رۆژێن بهێت دى گه‌مپه‌كێ ناڤ و ئێكێ ده‌رڤه‌ بۆ تیمێ دانیت، بۆ پتر رۆنكرن لسه‌ر پشكدارییا یانه‌یا گاره‌ دخول و كاسا ئیراقێ دا شێروان به‌شار سه‌رۆكێ یانه‌یا ناڤبرى د داخۆیانییه‌كێ دا بۆ رۆژنامه‌یا وار دبێژیت، پشتى ل وه‌رزێ بۆرى تیما مه‌ شیا بگه‌هیته‌ ئاستێ تیمێن بهێز و ناسناڤێ خولا پلا ئێكێ یا هه‌رێمێ ب ده‌ستخۆڤه‌ برى و ده‌ربازبووینه‌ پلا نایاب، پێ نه‌ڤێت ئه‌ڤه‌ بۆ وێ هاریكارى و پشته‌ڤانییا به‌رێز كاوه‌ عه‌بدولا جونه‌ید رێكانى دزڤریت و هه‌تا نۆكه‌ یێ به‌رده‌وامه‌ لسه‌ر هاریكارییا یانه‌یێ و لڤێ دوماهیێ سۆز دایه‌ ئه‌گه‌ر مه‌ شیانێن خولا ئیراقێ هه‌بن پشته‌ڤانیێ ل تیمێ بكه‌ت، له‌وا مه‌ ژى بڕیاردا پشكداریێ د خول و كاسا ئیراقێ دا بكه‌ین.
د به‌رده‌وامییا گۆتنێن خۆدا سه‌رۆكێ یانه‌یا گاره‌ دبێژیت، بۆ وه‌رزێ ئه‌ڤ ساله‌ مه‌ نڤیساره‌ك به‌رهه‌ڤكریه‌ و ئه‌ڤرۆ دێ گه‌هیننه‌ سه‌رۆكێ ئێكه‌تییا ته‌پاپێى یا ئیراقێ داكو ره‌زامه‌ندیێ لسه‌ر پشكدارییا مه‌ بكه‌ن و هه‌ر چه‌نده‌ مه‌ پێش وه‌خت ئاگه‌هدار كرینه‌ و رازینه‌ پشكداریێ د خولا پلا ئێكێ و كاسا ئیراقێ دا بكه‌ین، بۆ ڤێ چه‌ندێ ژى مه‌ ئه‌ڤ چه‌نده‌ ب گرنگى زانى و نۆكه‌ یێ به‌رهه‌ڤیێن خۆ دكه‌ین، دیسان شێروانى دیاركر ژى كو مه‌ سێ یاریكه‌ر و گۆلچییه‌ك ئیناینه‌ د ناڤ رێزێن تیما خۆدا هه‌ڤبه‌ست دگه‌ل گرێدایه‌، ئه‌وژى یاریكه‌رێن یانه‌یا هه‌لۆ و كورێن باژێرێ ئاكرێ عه‌لى نورى و هۆزڤان عه‌بدولا ل هێلا به‌رگریێ یاریێ دكه‌ن و یاریكه‌ر بێدار محه‌مه‌د سالح ل هێلا ناڤین یاریێ دكه‌ت، گۆلچیێ یانه‌یا كه‌یوان رێباز یوونس، ئه‌وێ بناسناڤێ باشترین گۆلچى د خولا پلا ئێكێ هاتیه‌ خه‌لاتكرن، زێده‌بارى دانانا نۆشداره‌كا تایبه‌ت بۆ تیمێ ئه‌وژى عه‌بدولله‌تیف محه‌مه‌ده‌، ناڤبرى دیاركر ژى كو تیما وان پێدڤى ب یاریكه‌ره‌كێ هێرشبرن و ئه‌گه‌ر پیشه‌كاره‌كێ باش بده‌ستمه‌ كه‌ڤت دێ ئیننه‌ دناڤ رێزێن تیمێ دا و ئه‌گه‌ر نه‌بوو دێ پشت به‌ستنێ لسه‌ر یاریكه‌ره‌كێ پارێزگه‌هێ یان هه‌رێمێ كه‌ین، ب مه‌ره‌ما وێ یه‌كێ رێزێن تیمێ بهتر لێ بهێن و بتایبه‌ت هێلا هێرشبرنێ ژبه‌ركو مه‌ تنێ ئێك یاریكه‌رێ هرشبر یێ هه‌ى.
ژلایه‌كێ دویڤه‌ و ده‌رباره‌ى شیانێن وان د خولا ئیراقێ دا شێروانى دیاركر كو مه‌ره‌ما وان نه‌تنێ پشكداریێ به‌لكو هه‌ڤركیێ لسه‌ر ده‌ربازبوونێ بۆ خولا پلا نایاب ل وه‌رزێ بهێت، ب سوپاسیڤه‌ سه‌رۆكێ فه‌خرى یێ یانه‌یێ هاریكارى و پشته‌ڤانییا خۆ دیاركریه‌ بۆ ڤێ چه‌ندێ، ده‌رباره‌ى ستافێ راهێنانێ و شیانێن وان بۆ برێڤه‌برنا تیمێ د هه‌ردو خولێن ئیراقێ و كوردستانێ ژى گۆت، پێنه‌ڤێت كاره‌كێ ب ساناهى نابیت، به‌لێ وه‌كو ده‌ستپێك دێ پشتبه‌ستنێ لسه‌ر ستافێ خۆ یێ كه‌ڤن كه‌ین ئه‌وێ پێكدهێت ژ خالد مووسا راهێنه‌ر و هاریكارێ وى ئاراز سلێمان و ته‌حسین خۆرشید راهێنه‌رێ گۆلچییان، مه‌ باوه‌رى ب شیانێن وان یێن هه‌ین و هه‌ر ئه‌ڤ ستافه‌ بوو تیم گه‌هاندییه‌ ڤێ قۆناغێ.
یانه‌یا گاره‌ ده‌مێ مه‌هه‌كێ یه‌ به‌رهه‌ڤیێن خۆ دكه‌ت و هه‌ر وه‌كى سه‌رۆكێ یانه‌یێ ئامه‌ژه‌ ب هندێ دده‌ت كو هه‌ر ژ ده‌ستپێكا مه‌ها ره‌مه‌زانا پیرۆز تیما مه‌ راهێنانێن هێزێ ل هۆلێ و مه‌له‌ڤانگه‌هێ دكرن و چاڤه‌رێیه‌ ئه‌ڤرۆ ده‌ست ب راهێنانان ل ناف یاریگه‌هێ یێن ته‌كنیكێ و ته‌كتیكێ بكه‌ن، پشتى هنگى دێ كه‌مپه‌كێ راهێنانێ یێ ناڤ خۆ ل ده‌وروبه‌رێن پارێزگه‌هێ دانین، ئه‌گه‌ر تیم ته‌مام بوو دێ ده‌ست ب به‌رهه‌ڤیێن كه‌مه‌كێ ژ ده‌رڤه‌ى هه‌رێمێ و ئێراقێ دانین ژ پێ خه‌مه‌ت بهێزكرنا رێزێن تیما خۆ یا ته‌پاپێى داكو پشكدارییه‌كا سه‌رفه‌راز د هه‌ردو خولا ندا بكه‌ت و زێده‌بارى قاره‌مانییا كاسا ئیراقێ كو بریاره‌ ل ناڤه‌راستا مه‌ها بهێت ده‌ست ب هه‌ڤركیێن وان بهێنه‌ كرن.
تێزانین یانه‌یا گاره‌ ل وه‌رزێ بۆرى بناسناڤێ خولا پلا ئێكێ یا هه‌رێما كوردستانێ هاتبوو خه‌لاتكرن و د سالێن نۆتان دا پشكدارى د خولا ئیراقێ دا لسه‌ر ئاستێ یانه‌یێن پلا ئێكێ كربوو و ژبه‌ر چه‌ند ئه‌گه‌ران خۆ ژ خولێ ڤه‌كێشابوو.

بابه‌تێن ب ڤێ مژارێ ڤه‌ گرێدای