کێمتر خەم کیە حکومەت یان ھاولاتی؟

عیماد ئالیخان

ژبەرکو ئەڤ سالە بارانێن باش باریبوون ل سەرانسەری ھەرێما کوردستانێ ئەگەر بھێتە بەراورد کرن بەرامبەر سالێن چووی، و وەرزێ بھارێ ژی، ژیێ خوە پتر درێژکربوو و خەملا خوە دابوو سرۆشتی و ببوو سەدەما شین بوون و بلندبوونا گیایی ل پرانیا جھان، تاکو گەھشتیە وی رادەی کو د نھا دا و لدەستپێکا وەرزێ ھاڤینێ ئەڤ گیایە ببیتە پیش و پەلەخ و ئاریشە و روودانێن ئاگربەربوونێ ژێ پەیداببن! د ڤان رۆژان دا بەردەوام ئاگر بەردبیتە ئاقار و بەرھەمێ جوتیاران، کو ددەمەکێ کێم دا ھژمارەکا زۆرا دونەمێن ئەردی ھاتیە سۆتن و بتمامی ژناڤچوویە! ئەڤە دەستپێکا وەرزێ ھاڤین و گەرمێ یە و بەردەوام نووچەیێن سۆتنا جھ و ئاقارێن ھاولاتی و جوتیاران ئەم د دەزگەھێن راگەھاندنێ و سۆشیال میدیایێ دا دبھیسین و دبینین، کۆ ب راستی جھێ داخێ یە، ھەردەمێ ئەڤان نووچەیێن دلتەزین دبینین ئەنجامێن وان ئاگربەربوونان زیانێن مەزن یێن مادی ب مولک و مالێ ھاولاتی و جوتیاران دکەڤیت و تاکو ئەو ئاگرە ژلایێ جھێن شولەژێ ڤە دھێتە کۆنترولکرن ئێدی ھەموو تشتەک ژناڤ دچیت و بێ مفایە و ب تایبەت گەنم و تەرش و کەوالێ جوتیاران! پرسیار ئەڤەیە کی بەرپرسە ژ پەیدابوونا ڤان روودانان؟ جھێن شولەژێ د کێمتر خەمن یان جوتیار؟ یان ژی ھاولاتی و ب تایبەت ژی شۆفێرێن ترۆمبێلان؟ بۆچی حکومەت و جھێن شولەژێ پێش وەخت بەرھەڤیێن باشتر نەدکرن بۆ کونترۆلکرنا ھەر روودانەکا ئاگربەربوونێ دا؟ کو یا ئاشکەرا و پێش چاڤ بوو دئەڤ سالەدا ئەڤ جورێن روودانان د زێدەبوونێ دابن؟ لەوا دڤێت باشتر ژ سالێن چوویی د ئامادەباشیەکا گەلەک ب ھێزتر دابان ژ ھەموو لایەکی ڤە ژبۆ پاراستنا بەرھەمێ جوتیاران و سرۆشتی ب گشتی! یا ئاشکەرایە ژ ئەنجامێ ئەڤان جورێن روودانێن ئاگری تەخا ژ ھەموویان پتر زیان ڤێدکەڤیت لدەستپێکێ و دووماھیێ ھەر جوتیار بخوەنە، کو بەرھەمێ ماندیبوونا وان یێ سالەکێ ب ھەروە دچیت و ئەڤ روودانە دبنە ئاستەنگ و گرفت وبێ ھیڤیبوونەکێ ل جەم جوتیاران پەیدادکەن کو د سالێن بھێت دا پەنایێ بۆ ڤی کەرتی نەبەن! و ئەڤە زەنگا مەترسیێ یە ل سەر کومەلگەھێ ب گشتی! ژلایەکێ دیڤە بۆچی تا نوکە راگەھاندنێ ب رەنگەکێ گشتی ژ تیڤی، رادیۆ و رۆژنامەیان گرنگی ب ھشیاریا ھاولاتیان ل سەر پاراستنا بەرھەمێ جوتیاران تایبەت د ڤی وەرزێ ھاڤینێ یێ گەرم دا نەدایە، ژ بەرنامە و راپۆرت و … ھتد؟ یان ژی سۆشیال میدیایێ رۆلێ خوە نەدیتیە د دیارکرنا تۆمەتبارەکی دا کو ئەگەر بیت د پەیدابوونا روودانێن ئاگربەربوونێ و سۆتنا ئاقارێن ھاولاتیان دا؟ بۆچی تا نوکە چ کەسەک نەھاتیە دەستەسەرکرن ل سەر ئەنجامدانا ئەڤان روودانێن دلتەزین کو د ڤان چەند رۆژێن کێم دا سۆتنا جھان رۆژ ب رۆژ د زێدەبوونێ دایە؟ ئایا ژلایێ یاسایی ڤە چ سەرەدەری دگەل کەسانێن ب ڤان روودانان رادبن دھێتە کرن؟ ژلایەکێ دیڤە دێ چارەنڤیسێ زیانڤێکەفتیان چ بیت؟ ژبەرکو نھا ئەو د رەوشەکا ئالۆز یا ئابووری و دەروونی و … ھتد دبورن، ئایا دێ ھێنە قەرەبووکرن ژلایێ حکومەتێ ڤە یان ماندیبوونا وان دێ ب ھەروە چیت؟ باشتر ئەوە جھێن شولەژێ دیڤچوونێ ل سەر ڤان روودانان بکەن، دبیت ھندەک کەس ب مەرەم ئەڤان کاران ئەنجامددەن و وەک خوشیەکێ بۆ وان پەیدا دبیت دەمێ دبینن ئاگر ب ئاقارێن ھاولاتیان دکەڤیت و ژبۆ تێکدان و ژناڤبرنا بەرھەمێ جوتیاران و کرێتکرنا روویێ جوانێ سرۆشتی! ھەروەسا یا فەرە پتر خوە ل چارەکرنا ڤان جورە روودانان بکەنە خودان ژ ئینان و پەیداکرنا کەرەستەیێن پێدڤی د کونترۆلکرنا ھەر ئاریشە و روودانەکا نەچاڤەرێکری یا ئاگربەربوونێ دا، ژ ترۆمبێل و زێدەکرنا ھژمارا فەرمانبەرێن رێڤەبەریا ئاگرڤەمراندنێ و پاراستنا ژینگەھێ و … ھتد، و بەردەوام مەشق و راھێنان پێ بھێنە دان لسەر چاوانیا کونترۆلکرنا ھەر روودانەکا ئاگربەربوونێ دا، ژبەرکو ئەڤە دەستپێکا وەرزێ ھاڤینێ و گەرمێ یە و پێشبینیا روودانێن ئاگری یێن بەردەوام دھێنە کرن! ھەروەسا باشتر ئەوە ھاولاتی و ب تایبەت شوفێر ژی د ھاریکاربن دگەل جھێن شولەژێ، ژبەرکو ئەگەرێ سەرەکی یێ پەیدابوونا ڤان روودانان ھاولاتی و شوفێرن، لەوا دەمێ قەستا ئاقاری دکەن ئاگرێن مەزن ھەلنەکەن داکو ژ کونترۆلا وان دەرنەکەڤیت و ئەڤ روودانێن دلتەزین پەیدانەبن، ھەروەسا ل دووماھیێ و یا ژ ھەموویێ گرنگتر شۆفێرێن ترۆمبێلان جگارێن خوە نەھاڤێژنە ژدەرڤەی ترۆمبێلان و رەخ و روویێن جادەیان، ژبەرکو ھاڤێتنا جگارەکێ دبیت ببیتە ئەگەرێ بڕینا داھاتێ سالەکێ یێ جوتیاران و تێکدان و کرێتکرنا روویێ جوانێ سرۆشتێ کوردستانێ ب گشتی.

بابه‌تێن ب ڤێ مژارێ ڤه‌ گرێدای