کونترۆلکرنا فشارا خوونێ بۆ پاراستنا کارێ ئەندامێن لەشی گرنگە

کونترۆلکرنا فشارا خوونێ بۆ پاراستنا کارێ ئەندامێن لەشی گرنگە

وار – دهۆک :

هه‌ر وەکی یا دیار بلندبوونا فشارا خوونێ ئێک ژ وان نەخوەشییانە یێن گەلەک بەربەلاڤ دناڤ هەمی جڤاکان دا ل سەرانسەری جیهانێ، ب تایبەت د ناڤا تۆخیبا دانعەمران دا، دناڤ جڤاکێ مە ژی دا دێ بینی کو بەهراپتر ژ کەسێن دانعەمر ژ نەخوەشییا بلندبوونا فشارا خوونێ د ناڵن، و گەلەک دەرمانان د خۆن دا کو بشێن کونترۆلا ئەڤێ زێدەبوونا فشارا خوونێ بکەن، دگەل هندێ دا دێ بینین کو هێشتا کێماسییەکا هەی د شیانێن کونترۆلکرنێ دا و گەلەک ژ وان ئاریشەیێن ساخلەمی لدەف پەیدادبن کو ئەگەرێ وان ژی هەر ڤەدگەریتە بلندبوونا فشارا خوونێ، بۆ پتر گەنگەشەکرنێ ل سەر بابەتی، مە بفەر دیت دیدارەکێ دگەل نۆشدار “مەردان خەلیل هیدایەت” تایبەتمەندێ نەخوەشییێن دل و هناڤان سازبکەین.
لدەستپێکێ نۆشدار مەردان لدۆر فشارا خوونێ دبێژیت: فشارا خوونێ بریتییە ژ وێ فشارێ یا کو خوون دئێخیتە سەر دیوارێن بۆرییێن خوونێ لدەمێ بوورینا خوە دا، هەروەکی تو ئاڤێ بکەیە د ناڤ پڤدانکەکیدا و لدووڤدا فشارێ بێخییە سەر کا چەوان ئەو ئاڤە دبیتە ئەگەرێ فشارێ لسەر پڤدانکێ؛ ب هەمان رەنگ خوون ژی فشارێ دئێخیتە سەر بۆرییێن خوونێ.
لدۆر ئەگەرێن نەخوەشییا فشارا خوونێ یا بلند؛ ناڤبری گۆت: دەمێ ئاستێ فشارا خوونێ یا نۆرمال، فشارا خوونێ ڤەدگەریتە کارێ دلی لدەمێ پالدانا خوونێ بۆ ناڤ بۆرییێن خوونێ، فشارا خوونێ یا نۆرمال ژی 120 ملیمێن جیوەییە لسەر 80 ملیمێن جیوەیی، یا سەری پتر ڤەدگەریتە خوە گڤاشتنا دلی بۆ پالدانا خوونێ، و یا بنێ ژی ڤەدگەریتە قەبارەیێ ناڤپۆشێ دلی لدەمێ سستییا دلیدا کا فشارا خوونا مایی دناڤ دلیدا چەندە. لێ دەمێ هەبوونا نەخوەشییا فشارا خوونێ یا بلند؛ ئەگەرێ سەرەکی ۆ ڤێ بلند بوونێ و ب رێژەیا 95% نە یا دیارە، ئانکو ئەو بخوە لدەف مرۆڤی پەیدادبیت و چ ئەگەرێن راست و دروست نەهاتینە دیارکرن سەبارەت ڤێ بلندبوونێ، و رێژەیا 5% دهێتە گرێدان ب هندەک نەخوەشییێن دەستنیشانکری کو دبیتە بلندبوونا فشارا خوونێ مینا تەنگبوونا بۆرییێن خوونێ یێن گۆرچکان، رشتنا هندەک مادەیێن رژێنێن سەر گۆرچکان و چەند ئەگەرێن دی ب تایبەت لدەمێ هەبوونا هندەک ئاریشەیێن دی د لەشیدا مینا زێدەبوونا رێژەیا روونی د ناڤ خوونێدا و نەخوەشییا شەکرێ ژی دەستێ هەی دگەل پەیدابوونا نەخوەشییا فشارا خوونێ یا بلند.
هیدایەتی لدۆر هەمان بابەت پتر روونکر و گۆت: ل ڤان چەند ساڵێن بووریدا گەلەک ئامار و ڤەکۆلین هاتینە ئەنجامدان لسەر مرنا بەروەخت ئانکو یا زی دناڤبەرا ژییێ 40 ساڵی هەتا 50 ساڵی، یا دیاربووی کو فشارا خوونێ یا بلند دشێت ببیتە ئێک ژ ئەگەرێن ژ دەستدانا جانێ مرۆڤی و ژ وان فاکتەرێن بەروەخت دبنە ئەگەرێ مرنێ. ئەڤێ چەندێ ژی گەلەک پەیوەندی دگەل پلەیا فشارێ نینە هەروەکی پەیوەندی دگەل ماوەیێ هەبونا فشارێ ڤە هەی، ژبەرکو دگەل دەمی و ب تایبەت پشتی پتر ژ 10 ساڵێن ناڵینێ ژ نەخوەشییا فشارا خوونێ؛ لەشێ مرۆڤی دەست پێ دکەت ب ژناڤچوونێ، و د ئەنجامدا گەلەک نەخوەشی لدەف مرۆڤی پەیدادبن مینا نەخوەشی و جەلتەیێن دلی، نەخوەشی و جەلتەیێن مێشکی، نەخوەشییێن گۆرچکان و ژناڤچوونا وان و گەلەکێن دی، کو هەر ئەڤەنە دشێن ببنە ئەگەرێ مرنێ د نەخوەشێن خوەدان فشارەکا خوونێ یا بلند.
نۆشدار مەردان لدۆر چەوانییا سەرەدەریکرنێ دگەل نەخوەشییێ دبێژیت؛ پێدڤییە ئەو کەسێن فشارا خوونێ لدەف وان بلندبیت د ماوەیێن جودا دا فشارا خوە یا خوونێ ب پیڤن دا کو بزانن ئەو جورە چارەسەرییا وەرگرتین ژ نۆشدارێ تایبەتمەند دروست کاردکەت ل سەر لەشێ وان یان نە، لێ ئەو کەسێن نەخوەشییا فشارا خوونێ ل دەف وان نەبیت لێ مەترسییا پەیدابوونا نەخوەشییێ هەبیت، هەر 6 هەیڤان جارەکێ ب کێمی پشکنینا فشارا خوە یا خوونێ بکەن دا کو زوو نەخوەشییێ دەستنیشان بکەن و هەر گاڤەکا پەیدابوو؛ زوو بهێتە کونترۆلکرن.
ناڤبری لدۆر شێوازێ خوارنێ داخۆیاکرن: پێدڤییە خوارنا مرۆڤێ خوەدان فشارەکا خوونێ یا بەرز یا کێم خوێ بیت ئانکو نە وەکی هندەک کەسان کو ژ بنیرا خوێ ناخۆن لێ بلا یا کێم خوێ بیت کو چ کارتێکرنێ ل ساخلەمییا وان نەکەت، دیسان گرنگیدان ب نە خوارنا خوارنێن تژی روون، و گرنگیدان ب سیستەمەکێ خوارنێ یێ ساخلەم، ئەنجامدانا وەرزشەکا گونجای مینا رێڤەچوونێ ئەڤە هەمی پێکڤە دێ بنە هاریکار بۆ کونترۆلکرنا فشارا خوونێ دگەل خوارنا دەرمانێن کو تایبەتمەندێ نەخوەشییێن فشارا خوونێ ددەتە نەخوەشی. ب ڤی رەنگی دێ د شیاندابیت مرۆڤ خوە ژ گوهۆرینێن لەشی یێن دۆمدرێژ گرێدای ب فشارا خوونێ یا بلند پارێزیت.

بابه‌تێن ب ڤێ مژارێ ڤه‌ گرێدای