کورد چاوا دکارن بەرسڤا داعشێ و داگیركه‌ران بدەن؟

 

ئەحمەد بالایی :

هەرکەس دزانیت ئیرۆ ئەورێن رەشێن تاری ب ناڤێ داعش لگەل هێرشێن رۆمارەش ل ئەسمانێ کوردستانێ دخۆرن، رۆژانە تۆڤێ ژەهرێ ل دەرازینکێن مە درژینن و بارانا مرنێ لسەر گەلێ مە دبارینن. هەر ل خانەقین هەیا کۆبانێ کەتییە بەرهێرشێن وان هێزێن تاریپەرێس، ئەو هێزێن هار و هۆڤ کو هەموو نرخێن مرۆڤایەتیێ بنپێ دکەن، ژ دەرڤەیی چوارچۆڤه‌یێ یاسا و زاگۆنێن ناڤنەتەوەیی کارێ خوە یێ چەپەل دمەشینن. دڕندەییا وان گەها وێ رادده‌یێ هەیا سینگێ مرۆڤان دکەلێشن و کەزەبا وان دخۆن، سەرێ خۆرت و پیر و کالان دبڕن و خوینا وان فڕدکەن. لنگێن کچ و ژنان زنجیر دکەن و ل فرۆشگه‌هێن (مووسل، ڕققە، دێرەزۆر و…) ب به‌هایەک ئەرزان دفرۆشن و روومەتا وان دپەرچقینن. کار و رەفتارێن وان وژدانا تەڤ خەلکێ جیهانێ هەژاندییە، هەیا وەلاتێن زلهێزێن جیهانی بوونە ئێکهەلوه‌ست و ئێکدەنگ ل همبەر وان کارێن وەحشیانە.
ئەڤرۆ گرنگە گەلێ کورد ب هەموو چین و تەخێن جڤاکیڤە، ب هەموو هێز و لایەنێن سیاسیڤە، بێى بەرچاڤکرنا بەرژوەندیێن حیزبی، هەرێمی و تاکەکەسی، ب گیانەک کوردایەتی ب ئنیەتەک سافی دەستێن خوە تێکبگرن هەموو ئارێشە و ناکۆکیێن د ناڤبەرا خوه‌دا بدەن لایەکی، هەموو ببنە ئێکدەست و ئێکدەنگ ل همبەر پیلانێن دژمن و نەیاران. پێدڤییە ئەڤرۆ گەلێ کورد بهەڤڕە لدۆر سنۆرێن کوردستانێ ببیتە خەلەکەک ئاگری و خاک و نیشتیمانێ خوە ژ لنگێن داگیڕکەران بپارێزیت، ژبەر کو هێزا هەرە مەزن بۆ سەرکەڤتنا گەل و نەتەوه‌یان تنێ هێزا گەلە، بلا بەس قەدەرا خوە بێخینە دەست تورک و ئیران و ئەرەبان، ئەڤە ب سەدان سالە مە دخاپینن، روومەتا مە بنپێ دکەن، خاکا مە داگیڕ دکەن و هەبوونا مە ماندەل دکەن، هەر کار و رەفتارەک نەمرۆڤایەتی لسەر گەلێ مە مەشاندییە ب ناڤێ دینی، مەزهەبی، نەژادپەرستی و ئایدۆلۆژیێن جودا، لەو پێویستە هێزێن سیاسی ل کوردستانێ ب گیانەک کوردایەتی و سیاسەتەک دادوەرانە ب روحەک نەتەوەیی هەست ب بەرپرسیێ بکەن و باوەرییا خوە ب هێزا گەل بینن، لێ ئەگەر هەر پارت و لایەنەک ژ هەرێمێن جودا بەرژوەندیێن خوە یێن حیزبایەتی وهەرێمی بپارێزن و خالێن گرنگ و ستراتیژی ل پاش خوە بهێلن، دێ هەرتم کارەسات و تراژیدیێن مینا، ئەنفالان، حەلەبچە، شه‌نگال، کۆبان و….) دێ بسەر گەلێ مە هێن.
پێویستە حیزبێن مە یێن سیاسی و ئیسلامی دەست ژ دۆستایەتییا وەلاتێن هەرێمی بەردەن و ئاورییەکێ ل گەلێ خوە بدەن، بلا پەیوەندیێن ئابۆری و کەلتۆری و جڤاکی لگەل وان وەلاتان هەبن، ژبەر کو ئەو هەڤسویێن کوردستانێنە، بەلکو ب وان پەیوەندییان بەرژوەندیێن ئێکدو بپارێزن، لێ نە مینا نها چارەنڤێسێ کوردستانێ بێخن دەست تورک و ئیران و ئەرەبان کو هەردەمێ بخوازن دەرگەهێن ژیانێ ل مە قوت بکەن و کوردستانێ داگیڕ بکەن و ئەنفالان بسەر گەلێ مە بینن. ئێدی دەم و زەمەن خوە ل مە ناگریت، دیرۆک رەحمێ ب مە نابەت، سەبرێ گەل نەما ل هەمبەر ڤان تراژیدیێن بێ وێنە.
ئەڤرۆ ب سەدان کۆمپانی، فێرم، ئوفیس و دەزگه‌هێن نهێنیێن تورک و ئیران و ئەرەبان ب ناڤێ (بازرگانی و ئاڤاکرنا رێکوبان و شوقه‌یان و…) ل باشۆرێ کوردستانێ ئاکنجی بوونە و لژێر کارێن سیخۆڕیێ ره‌هـ و ریشالێن خوە دناڤ جڤاکا کوردستانێدا داهێلاینە، ئەقل و مەژیێ وان داگیرکرییە و بەرب سیاسەت و ئایدۆلۆژیێن خوە یێن نەژادپەرستی رادکێشن و ژ دۆزا رەوایا کوردی دووردئێخن، چەندین نهێنی و پێزانینان لسەر رەوشا کوردستانێ ددەنە دامودەزگەهێن خوە یێن سیخۆڕیێ. ئەڤە مەزنترین کارەساتە بسەر گەلێ کورد دهێت، لێ هەیا نها هێش کوردان مفایەک ژ وان سەربۆرێن دیرۆکی وەرنەگرتییە، لەو هەرتم مەرگەسات و تراژیدی لجه‌م مه‌ دوبارە و سەدبارە دبن. بۆ نموونە؛ مە چەند باوەری ب سۆز و پەیمانێن تورکیا ئینان، چو نەمایە مە بۆ تورکیا نەکری و خواستەکێن وان بجهنەئیناین، هەر ل دەستپێکا سالێن دوهزارێ وهەیا نها، هێزەک مەزن یا ئارتێشا تورکیا ل باشۆرێ کوردستانێ بنەجـ بوویە بۆ پاراستنا باشۆر و تورکیا وەک پەیمانەک د ناڤبەرا واند هاتبوو ئیمزاکرن کو ئەو هێز تەنگاڤییەکێ دهەوارا کوردان بهێت. لێ مە دیت دەما هێزێن داعشێ ل رۆژا ٩ ئابا سالا ٢٠١٤ شه‌نگال، زومار، مەخموور و…) داگیرکرین و نێزیکى پایتەختێ باشۆرێ کوردستانێ هەولێر بووین، پێش هەرکەسی حوکمەتا هەرێما کوردستانێ داخواز ژ تورکیا کر دهەوارا وان بهێن و سۆزێن خوە لگەل کوردان بجهبینن، وان هێزێن سۆپایێ تورکیا ئەوێن ل باشۆرێ کوردستانێ ل دژی داعش بکاربینن، لێ حوکمەتا تورکیا هەر بەرسڤا کوردان ژی نەدان، بەلکو هەول و بزاڤدکرن داعش کوردستانێ داگیڕبکەت و کومکۆژییەک دی بسەر گەلێ کورد بینن، لەو ئیرۆ پێویستە په‌رلەمان و هێزێن سیاسی ل باشۆرێ کوردستانێ ب شێوەک فەرمی رژێما تورکیا ئاگەهدار بکەن کو وان هێزێن نەژادپەرست و داگیڕکەر لسەر خاکا باشۆرێ کوردستانێ بارکەن و نەهێلن ئێدی هێزەک داگیڕکەر خاکا پیرۆزا کوردستانێ داگیڕبکەت.

 

بابه‌تێن ب ڤێ مژارێ ڤه‌ گرێدای