کوردێن ب کەڤتنا شەنگالێ دلخوەش و ب رزگارکرنا وێ بێدەنگ!

رزگار كێسته‌ى :

ئێک ژ رەبەنی و خوەلیسەرییا مە کوردان ئەوە کو گەلەک جاران، ئارمانجێن خوە یێن ستەراتەژی دکینە قوربانی ئارمانجێن تەکتیکی، و بەرژەوەندیێن چارەنڤیس و نەتەوەیی دکینە قوربانی بەرژەوەندیێن کەسایەتی، عەشیرەتی، مەزهەبی و حزبی.
کەتنا شەنگالێ و هەلویستێ هندەک حزب و ریخستنێن کوردان باشترین نموونەیە بۆ ڤێ ئاخڤتنا مە، مە هەموویان دیت د وان رۆژێن تەنگاڤ و پڕی دەردەسەری دا ل دەستپێکا مەها (٨) تەباخا ئەڤ ساڵەدا کا چاوا ئەو هێرشا دژوار و هۆڤانە یا داعش ب درێژییا ١١٠٠ کلم ل دژی کوردستانێ دەستپێکر و گەلەک خەلکێ مە ژ پێشمەرگە و سڤیلان بدەستێ تەرۆریستێن داگیرکەر هاتنە شەهیدکرن و رەڤاندن و گەلەک دەڤەرێن کوردستانێ ژی ژ ئالێ وان ڤە هاتنە داگیرکرن، ژ وان ژی شەنگال.
د ڤێ دەلیڤا تەنگ دا، خەلکێ کوردستانێ ب پێشمەرگە و سڤیل و خانەنشین و کارمەند ڤە دەستهاڤێتە چەکی و بەرێ خوە دا بەرۆکێن شەڕی ژ بۆ پاراستنا گەل و وەڵاتێ خوە. لێ گەلەک مخابن هندەک حزب و رێخستنێن کوردان، کو خوە بهێزێن مەزن و خودان کاریگەری ژی دزانن، ل شوونا هەست ب ئەرکێ خوە یێ نەتەوەیی بکەن و وەکی هەموو خەلکێ کوردستانێ خوە پاڤێژنە د خەندەکا بەرگریێ دا و شەرەفا پاراستنا وەڵاتێ خوە وەربگرن، وەکی زۆڕنایەکا زڕ و نەشاز بەرێ هەموو تیڤی و دەزگایێن خوە یێن مەدیایێ وەرگێڕان و شوونا وان ل دژی داگیرکەرێن وەڵاتێ خوە بکاربینن، بەرێ وان دانە هێزێن بەرگرییا کوردستانێ و وەک بۆقەکێ د خزمەتا تابۆرێ پێنجێ یێ دژمنی دا بکارئینان و سیاسەتفرۆشێن وان بەزینە سەر کەنالێن تیڤیان و گەلەک ب کەیف و دلفرەهی دگۆتن: هاهاها پێشمەرگە ڕەڤی، پارتی شەنگال تەسلیمى داعش کر، پێشمەرگەی ژن و کەچێن شەنگالێ هێلانە د دەستێ داعش دا، پێشمەرگە هێزەکا شکەستییە و نەشێت بەرسینگا داعش بگریت!! هەلبەت هندەک ژ تیڤی یێن سەر ب پارتی دیمۆکراتی کوردستان ژی ڤە، ب نەزانی دەرگەهێن خوە بۆ ڤان سیاسەتفرۆشێن تابۆرێ پێنجێ ڤەکرن ل ژێر ناڤێ ئازادییا هزر و بیران؟؟!!
ژ ئەنجامێ ڤێ هێریشا بێبەختا ناڤخوەیی، ترس و رەڤ کەفتە ناڤ خەلکێ باژێڕێن کوردستانێ، ب تایبەت دهۆک و هەولێرێ و گەلەکا خوە کارخوەش کر ژ بۆ ڕەڤێ. ئەز ب پشتڕاستی ڤە دبێژم کو ئەگەر داعش ب ملیۆنان پارە مەزاختبان د ڤێ دەلیڤا نازک دا ئەو نەدشیان ڤێ کاریگەرییا خراب ل کوردستانێ بکەن یا ڤێ هێرشا مەدیایی یا ناڤخوەیی کری.
ئەڤە هەمی چوو و دەرباز بوو، بەلێ یا هێشتا ژ وێ ژی سەیرتر، ئەوە کو ئەڤە چەند رۆژەکە هێریشا پێشمەرگه‌یێ کوردستانێ ب سەرکێشییا سەرۆک بارزانی بۆ رزگارکرنا شەنگالێ دەستپێکری تاكو شه‌نگال رزگاربوویى، لێ ئەو دەزگایێن د کەتنا شەنگالێ دا بووینە زڕنا تابۆرێ پێنجێ، ئیرۆ وەسا بێدەنگن دێ بێژی یێ د گوهێ گای دا دنڤستینە، نە ل منێ و نە ل تەیێ. نە نووچەیەک لسەر دەستکەڤتێن پێشمەرگەی، نە شرۆڤەیەک، نە سروودەکا شۆڕشگێڕی و نە ژی کەس ژ وان سیاسەتفرۆشێن کو رۆژانە لسەر وان کەنالان کەنییەکا ئەحمەقانە دکر ژ بۆ کەتنا شەنگالێ، ئیرۆ ددیارنینن و دبەرزە و بێدەنگن، دا ئەم بزانین کانێ گەلۆ هەستا وان چیە بەرامبەر رزگارکرنا شەنگالێ یان چما بەرۆڤاژی هەمى خەلکێ کوردستان ئەو دلتەنگن!
مخابن ڤان حزب و رێخستنان سێکا مەدیایێن عەرەبا ژی، کو دژمنێن مەنە، پووتە نەدایە ڤان سەرکەڤتنێن پێشمەرگەی.
ئاها ئەڤ هەلویستێن نەساخ نەبەس گۆمانێ بۆ مرۆڤی چێدکەن، بەلکی مرۆڤی پشتڕاست دکەن کو ئەو داهۆلقۆتانا وان نە سەرخاترا خەلکێ مە یێ شەنگالێ بوو، لێ ئارمانجا وان شکاندن و بێ روومەتکرنا پێشمەرگەی و شکاندنا مۆرالا خەلکێ کوردستانێ و رەشکرنا ناڤێ پارتی دیمۆکراتی کوردستان بوو یاکو دەستهەڵاتدار بوو ل وێ دەڤەرێ. ئەڤە ژی وێ چەندێ بۆ مە دیاردکەت کو لگۆرەی لۆژیکێ وان یێ سەقەت، وان پێخوەش بوو داعش هەتا حاجی عومران و زاخۆ بهێت، مادەم دێ پارتی پێ ژناڤچیت !
ئەگەر وەسا نەبیت و راستە ئەو قاڕقاڕا وان ژ بۆ شەنگالێ و خەلکێ وێ بوویە، پانێ ئاها ئەڤە سەنگال و خەلکێ وێ بدەستێ پێشمەرگه‌یێن کوردستانێ و سەرۆکێ وێ رزگاربوون، پا کا دەنگێ وە، کانێ شادی و دەستخوەشیێن وە، کانێن سیاسەتفرۆشێن وە، بۆچی ددیارنینن لسەر تیڤییان؟ ئەگەر راستە هوون هند خەمخۆرێن شەنگالێ و خەلکێ وێ بوون، چما نوها هوون ب رزگارکرنا وێ مت و بێدەنگ و نە دلخوەشن؟.

بابه‌تێن ب ڤێ مژارێ ڤه‌ گرێدای