کوردستان ل سەر رێکا رواندا؟

سالح زاهێر زێباری

دەمێ رووپەلێن دیرۆکا کوردان ھەلددەین زۆرترین دەرفەتێن سەرکەفتنێ دکەڤنە بەرچاڤێن مرۆڤی و ھەر جار ژی ل رەخنە و خەمخارنەکا دەمکی ئەو رووپەلە ل سەر مە دەرباز دبن، کو براستی فەرە دیرۆک بو ھندێ بیت شیرەت و ئاقل لێ بێنە وەرگرتن نەک تنێ خاندنەک بیت و دەم بوراندن، 27 سالێن حوکمرانیا کوردی ل ھەرێما کوردستانێ نەشیایە وەکی پێدڤی خزمەتا کوردستانیان بکەت و زێدەبارێ ھەبوونا دەھان کێم و کورتیێن دیتر ژی کو جھێ پرسیارێ یە ھەتا نھا حکومەتا ھەرێمێ نەشیایە سنورەکێ بۆ ڤان دربێن کوژەکێن سیستەم و کیانێن سیاسی دابنێت، زێدەبارێ ھەبوونا کارەک مەزن کو بوویە خەون بۆ باشۆر و ناڤەراستا ئیراقێ دیڤ گوتنا خەلکێ پارچێن دیترێن ئیراقێ، بەلێ ھیڤی و خواست و خەباتا مە زێدەترێ دخوازیت ژ دەسەلاتا کوردی.
وەک ل ئولێ ئیسلامێ دا ھاتییە ھندێ روحا مرۆڤی نەگەھیت گەریێ و رۆژ ل روژئاڤایێ نە ھەلاتی ژ خوە زڤرین و تەوبەکرن یا وەرگرتییە و دێ ئێت قەبوولکرن، ل سیستەمێن سیاسی ژی چەند ژ خۆ زڤرین دیربکەڤیت و درێژی ب ژیێ گەندەلی و نەشەفافی و بێ سەروبەریێ بێتە دان وی دەمی دا ھەرفین و نەرازیبوون و پاشکەفتن نیزیک دبیت و ئیدی لادانا وێ پێتڤی ب چەند نڤشێن ئێک دیڤ ئێک دبیت، دو نموونە ل کیشوەرێ ئەفریقا ھەردەم جھێ ھندێ نە کو وەلاتێن پاشکەفتی و جیھانا نڤستی و جیھانا سیێ باس ژێ بکەن، ئەو ژی وەلاتێن ئەسیوبیا و رواندانە، کو نھا ھەر دو وەلات کەفتینە سەر سکەیەکێ چاکسازیێ و نەھێلانا گەندەلیێ و گرنگی دان ب شیانێن گەنجێن وەلاتی و ئالایێ پێشکەفتن و گەشەپێدانێ بلندکریە و ھەر ب وان داھاتێن کو بەری چەند سالەکان خەلک ژ برسان دمر و کوچبەرێ وەلاتێن جیھانێ دبو!
ئەرێ شیان ھەیە کوردستان ژی وەکی رواندا و ئەسیوبیاو وەلاتێن بەری وان مالیزیا و سەنگافورا لێبێتن ؟.
دیڤ خاندنا مە بۆ ریدانێن دیروکی کو زۆر نموونە ھەبووینە وەلاتێن پارچەکرییە و وێران و خەلکەک ریس و پێخاس ب گۆپیتکێ گەھشتینە، وەلاتێن کەنداڤی ل سالێن حەفیتێن سەدێ بیستێ سەربەخۆی بدەست ئینا و ھەمی ھیڤیا وان ئەو بو کو ب وەلاتەکێ وەکی ئیراقێ بگەھن! نھا کەنداڤێ ئەرەبی ل کیڤەیە و ئیراق ل کیڤەیە ؟ وەکی شەڤ و رۆژا ژێک جودانە! بۆچی؟ ھەروەسا مالیزیا و سەنگافۆرا و ھۆنگ کۆنگ و ژاپۆن و کۆریا باشور…تد. ھەمی ئەو وەلاتە بوون کو رێژەیا ھەژاری و و تاوان و گەندەلی و بندیوار و شەرێن نافخۆی ل گوپیتکێ بوون، ب وێ گەھشتن کو نھا ئەم دبینین، ھەمی ژی بەر سەروەریا یاسایێ و نەھێلانا گەندەلیێ و یەکسانی و دادپەروەریێ و کەسێ ھەژی بۆ جھێ ھەژی و ئارامیا سیاسی و پلانێن ئابۆریێن موکم و کارکرن ل سەر سێکتەرێن پەروەردە و فێرکرن و ساخلەمییێ، نیزیک بوونا ئاڤاکرنا حکومەتا نوی یا ھەرێمێ و باشتر بوونا پەیوەندیێن ناڤبەرا ھەولێر و بەغدا و ئارامتربوونا رەوشا سیاسی و ئابۆری و جڤاکی ل نافخۆ دا و ڤەبوونا دەرگەھێن دبلۆماسی ل سەرکوردستانێ و دیاربوونا گرنگیا پێگەھێ ھەرێمی د ئیراق و دەڤەرێ و ھەبوونا دەھان ژێدەرێن ئابۆری د وەلاتی دا ھەمی ھاریکارن کۆ مرۆڤ بێژیت د شیان دا ھەیە کوردستان ژی بکەڤیتە سەر وی سککەیێ پێشکەفتنێ کو رواندا و ئەسیوبیا و مالیزیا و کەنداڤ و ھەمی وەلاتێن پێشکەفتی پێگەھشتی.

بۆ ھندێ ب ئاستێ وەلاتێن پێشکەفتی بگەھین و ببینە نموونەک ژ سەرکەفتن و پێشکەفتنێ فەرە سەکرداتییا سیاسی یا کوردستانی ب تایبەت سەرۆکێ ھەرێمێ و سەرۆکێ حکومەتێ ھەمی شیانێن خوە پێخنە کاری بۆ ھندێ یاسا سەروەر بیت وھەمی وەلاتی بەرامبەر یاسایێ یەکسان بن و خەلک ھەست ب داوەریی بکەت و واستە و واستەکاری نەمینیت و کارئینانا پلە و پۆستێن گشتی بۆ بەرژەوەندیا تایبەت نەمینیت، ھەروەسا بەردەوامی ب کاروانێ چاکسازیێ بێتە دان ئەوێ کو ل کابینا چووی دا سەرۆکێ حکومەتێ پێشکێش کری و ل بەر کێشمە کێشما سیاسی نەھاتیە تێپەراندن ل پەرلەمانی، بدیتنا من فەرە ب یاسا و دادگەھا ریبریێ گەندەلی و بندیوار و نەشەفافیەت و دزیێ بێتە کرن بۆ ھندێ باوەریا سازیێن حکومی دەف خەلک زێدەتر ژێ بیت و سنۆرەک بۆ راوەستاندنا کاروانێ گەشەپێدانێ بێتە دان، بنگەھێ پێشکەفتنێ و گەشەپێدانێ ئێمناھیا سیاسی و جڤاکی یە ل وەلاتی دا فەرە ژ کارێن ھەری پێشین یێن سەرکرداتیا سیاسی یا کوردستانێ ل ڤان چار سالێن بھێت کارکرن بیت کو پەیوەندیێن ئالیێن سیاسی ب دەسەلاتدار و ئۆپوزسیۆن د باش بن و ل خزمەتا کوردستانیان دا بن، کەشێ ئازادیێ رەخساندن بۆ میدیایێ ب گشتی و چالاکڤان و نڤیسەر و روشنبیرا پێنگاڤێن سەرکەفتنێ نیزیکتر دکەن و حکومەتێ ژی ل کریاریێن خراب ھشیار دکەت، ئەڤ پێنگاڤە ھەمی ژ ئالیەکێ و گرنگی دان ب پەروەردە و فێرکرنێ ل ئالیەکێ دیتر ژ بەرکو ئەو وەلاتێ سیستەمێ پەروەردەیی یێ پێشکەفتی بیت ئەو وەلاتە یێ سەرکەفتی و پێشکەفتی یە و نموونا مالیزیا و یابان و یھانا نوی ژ پێش چاڤێن مەیە، سیستەمێ پەروەردەیی ل کوردستانێ پێتڤی ب چەندین پێنگاڤێن چاکسازیێ یە و نەھاڤێتنا وان پێنگاڤان کوردستانێ ل پێشکەفتن و سەرکەفتن و پێشڤەچونێ دیردکەت.

بابه‌تێن ب ڤێ مژارێ ڤه‌ گرێدای