کامیره‌یا (وار تیڤى) سه‌رهاتییا به‌رخوه‌دانا کۆبانێ ڤه‌دگێڕیت

 

فەهمی بالایی :

د دیرۆکا جیهانیدا، کامیره‌ بوویه‌ شاهدێ گەلەک راستییان، روودان و سه‌رهاتی‌ وەک راستی نیشا مە داینە. ب رێیا زووما کامیره‌یێ هێڤێنێ هه‌لبه‌ست، چیرۆک، رۆمان و فلمان بوویه‌. د کاره‌ساتا هیروشیمایێدا، زووما کامیره‌یا که‌سه‌کێ یابانی ببوو شاهدێ ڤێ بوویه‌رێ و ببوو ئه‌گه‌را وێ کو ژه‌نه‌رالێن ئه‌مریکی ب به‌هایێن خه‌یالی داخواز ژ خودانێ فوتوی کرى کو ئه‌و وێنه‌ به‌لاڤ نه‌بیت، لێ ژبه‌ر تێکدانا نرخێن مرۆڤاتیێ، کامیره‌ بوو شاهدێ راستییان د ڤێ کاره‌ساتێدا. هه‌روه‌سا د شه‌رێن جیهانیێن ئێک و دووێدا، هه‌مان بوویه‌ر ب زووما کامیرێ هاتینه‌ ڤه‌گوهاستن، کاره‌ساتا هه‌له‌بچه‌ ژی ژ ڤێ ئێکێ بێبه‌هر نه‌بوویه‌، ب رێیا کامیره‌یێ سه‌روچاڤێن کیمیابارانێ نیشا جیهانێ دان.
هه‌كه‌ ئه‌م بهێنه‌ ڤان بوویه‌رێن داویێ و شه‌ڕێ ل همبه‌ر تیرۆرا داعشێ، دێ ب ده‌هان به‌لگه‌ و وێنه‌یێن ڤیدیو و فوتویان که‌ڤنه‌ به‌رچاڤێن مه‌. ئه‌ڤه‌ وێ دیار دکه‌ت کو مه‌دیا و کامیره‌ به‌شه‌کێ گرنگبوون ژ ڤێ به‌رخوه‌دانێ. وه‌کی ئه‌م دبینین به‌رێ جیهانێ هه‌موویێ که‌تییه‌ سه‌ر کوردستانێ و به‌رخوه‌دانا هێزا پێشمه‌رگه‌ی و یه‌په‌گێ و یه‌په‌ژێ ل سه‌رانسه‌رى کوردستانێ ب تایبه‌تی ل کۆبانێ.
شەڤا دوشەمبی لسەر سێشەمبی، ل دەمژمێر دەهی شەڤێ، د ئەکرانا (وار تیڤی)ـدا و ب دلسۆزییا دو کارمه‌ندێن (وار تیڤی) “کاک مه‌سعود وه‌رمێلی و ستار ئارتس” ب دله‌کێ به‌رخوه‌دانێ و هه‌سته‌کا نه‌ته‌وه‌یی و فیداکارییه‌کا مه‌زن به‌رێ خوه‌دانه‌ کۆبانێ و دناڤا کۆلانێن ته‌نگ و تاریدا، سه‌رهاتیێن شه‌ڕه‌کێ وێرانكار و دژمنه‌کێ هۆڤ و به‌رخوه‌دانه‌کا پۆلایی ب زووما کامیرێ بۆ بینه‌ران ڤه‌دگێڕان. هه‌ر بوویه‌ره‌ک و گۆتنه‌ک سه‌رهاتییا رۆمانه‌کێ بوو دبێده‌نگیێدا کامیرێ وێنه‌ دلڤاندن و ژیان ددا هه‌موو کۆلان و شوونوارێن شه‌ڕی ل پاش خوە هێلاین. وه‌سا دیاردکر کو ئێدی دیوار و کۆلان به‌رسڤا هه‌ر پرسه‌کێ دده‌ن، هه‌مه‌ره‌نگییا مرۆڤان ژ فارسان، تورک، ئه‌مریکی، ئه‌ره‌ب و کوردێن هه‌رچوار پارچه‌یان هه‌موو د سه‌نگه‌رێ به‌رخوه‌دانێدا ببوونه‌ سه‌رهاتیێن کۆبانێ و به‌رسڤ ددان کامیرێ. که‌سه‌کی بده‌سته‌کی دگۆت “ئه‌ز بده‌سته‌کی چه‌کێ خوه‌ رادکه‌م و ب ئیراده‌یه‌کا بهیز و ڤیانه‌کا مه‌زن بۆ کوردستانێ دێ به‌رخوه‌دانێ ژ کۆبانێ و خاکا خوه‌ که‌م”. گڕنژینێن سه‌رچاڤێن شه‌ڕڤانان و که‌نییا سه‌ر لێڤێن کچێن کورد دێمێ خوه‌یێ نازک ژ بارۆتا گولـلەیێن شه‌ڕی و سوراتییا برینێن به‌رخوه‌دانێ و چه‌کێن ل ملان، خوه‌ وه‌ک بووکێن بخێلی خه‌ملاندبوون و چاڤه‌رێی مزگینییا سه‌رکه‌ڤتنێ بوون بۆ گه‌لێ کورد و جیهانێ و بەرب ئازادیێ دمەشیان.
فه‌رمانداره‌کا ژن ب ناڤێ مەدیا، دگۆت “ئه‌م مورالی ژ شه‌هیدان دگرین، بۆ مه‌ دژمن نه‌ تشته‌که‌ ماده‌م ڤیانا خاکا مه‌ و گه‌لێ مه‌ لپشتا مه‌یه‌، مه‌ دیرۆکه‌کا نوو نڤیسا چاڤێ جیهانێ هه‌موویێ لسه‌ر کۆبانێیه‌ د رێیا به‌رخوه‌دانا ژنێدا هێز دا مێران ژی”. هه‌روه‌سا دیمه‌نێن بالکێش دهاتنه‌ دیتن ژ سترانێن تژی هیڤی لبه‌رده‌نگێ سازێ و ده‌نگێ گولـله‌یان هه‌ڤڕکییا ژیانه‌کا ب رۆمه‌ت دکر. گیانه‌وه‌رێن بیرهاتنێن خوه‌یێن کۆلان به‌رنه‌دایی و ده‌نگێ سه‌یێن د ده‌رازینکا مالێن ڤالادا د به‌رخوه‌دان و پاراستنێدا بوون، نه‌ خاکا مه‌، نه‌ ژی گیانه‌وه‌ر و بالندێن مه‌ نه‌دهێلا هۆڤێن شه‌ڤێن تاری ڤێ خاکێ پیس بکه‌ن. ب تنێ دیمەنێن شەرمەزاری و قرێژى کو خاکا پیرۆز لەوتاندی، لاشێن گەنیێن داعشان بوون ئێدی بێرۆمەتییا شکەستنا وان لاشێن گەنی لپاش خوە هێلابوون.
ئێدی دێ کامیره‌یێن مە سەرهاتیێن چه‌له‌نگییان تۆمارکەن و قه‌هرەمانییا گەلێ کورد نیشانى جیهانێ دەن. هه‌مبێزکرنا پێشمه‌رگه‌یێن کوردستانێ دناڤا ڤان کۆلاناندا سه‌نگه‌ر ب هیڤی دئێخستن و هێزێن کوردی گۆڤه‌ندا ئازادیێ دگێڕا، ئێدی سینۆرێن ده‌ستکرد شه‌رم ژ خوه‌ دکر و دژمن نه‌دشیان خوه‌ لبه‌ر ڤێ هێز و به‌رخوه‌دانی بگرن.
سیمبۆلا ئێکه‌تییا کوردان و له‌شکرێ کوردستانێ بۆ سه‌رانسه‌رى جیهانێ راستییه‌ک و مزگینییه‌ک بوو. هوسا کامیره‌یا (وار تیڤی) ب چه‌له‌نگییا هه‌ردو مه‌دیاکارێن خودان ئیراده‌ و شیان، رووپه‌له‌کێ دی یێ سه‌رکه‌ڤتنێ ل دیرۆکا کوردستانێ بنه‌خشینن و ئه‌ڤ دیمه‌ن و سه‌رهاتییه‌ دێ بنه‌ ژێده‌رێن گه‌له‌ک مه‌دیایێن کوردستانی، هه‌رێمی و جیهانی. ژبه‌ر ڤی کارێ پیرۆز، ده‌ستخوه‌شیێ ل هه‌ردو رێزداران دکه‌م، که‌کێ مه‌سعود و که‌کێ ستار، هوون و کامیره‌ ڤه‌گه‌ران راستیان رێیا وه‌ بیت و هوون دێ بنه‌ قه‌هره‌مانێن رۆمانێن سه‌رکه‌ڤتنێ د به‌ره‌یێ به‌رخوه‌دانێدا.

بابه‌تێن ب ڤێ مژارێ ڤه‌ گرێدای