کارتێکرنا حەپکان لسەر ساخلەمییا ژنا دوگیان

کارتێکرنا حەپکان لسەر ساخلەمییا ژنا دوگیان

 

Capture

وار – سیدرا مزووری :

هه‌روه‌کی ئه‌م هه‌می دزانین؛ ماوه‌یێ دوگیانییێ گه‌له‌ک هه‌ستیاره‌ ژبۆ گه‌شه‌یا سوریلانک، ب تایبه‌ت سێیه‌کا ده‌ستپێکێ، ژبه‌رکو ماوه‌یێ ژ ئێک جودا بوونا خانه‌یان، و ده‌ستپێکرنا چێبوونا ئه‌ندامێن له‌شێ سوریلانکیه‌، و هه‌ر جۆره‌ ماده‌یه‌ک بچیته‌ دناڤ خوونا ئافره‌تا دوگیان دا؛ راسته‌وخوه‌ د گه‌هیته‌ د ناڤ خوونا له‌شێ زارۆکی و پشکدارییێ د گه‌شه‌یا خانه‌یێن له‌شێ سوریلانک دا دکه‌ن، و ژ وان ماده‌یان ده‌رمانن، ئه‌رێ کارتێکرنا ئه‌ڤان ده‌رمانان لسه‌ر گه‌شه‌یا سوریلانک چییه‌؟ و د چ باران دا ئافره‌ت دشێت ده‌رمانان وه‌ربگریت؟
هه‌رچه‌نده‌ ده‌رمان بشێوه‌کێ گشتی خرابییه‌کا مه‌زن هه‌یه‌ لسه‌ر ساخله‌مییا زارۆکی، لێ ئافره‌ت ژبه‌ر گه‌له‌ک بارێن نه‌خوه‌شییان ده‌رمانان وه‌ردگرن کو چێدبیت دومدرێژ بن و چ په‌یوه‌ندی ب بارێ دوگیانییا وێ نه‌بیت، و د ماوه‌یێ دوگیانییێ دا کارتێکرنه‌کا نێگه‌تیڤ لسه‌ر ساخله‌مییا سوریلانک دکه‌ن، و ئه‌گه‌رێ ئه‌ڤێ چه‌ندێ ژی ڤه‌دگه‌ریته‌ وێ چه‌ندێ کو ئه‌ندامێن له‌شێ سوریلانک د قۆناغا گه‌شه‌یێ دانه‌، و کۆئه‌ندامێن پاقژکرنا له‌شی ژ ماده‌یێن ژه‌هرین ب شێوه‌یه‌کێ گونجای کارێ خوه‌ ناکه‌ن، و د ئه‌نجامدا ماده‌یێن ژه‌هرین کۆمدبن د له‌شی دا و رێ ل گه‌شه‌ و وه‌رارا خانه‌یان دگرن، و دبنه‌ ئه‌گه‌رێ گه‌له‌ک که‌شه‌فرێتان ژبۆ سوریلانک، و چێدبیت ببنه‌ ئه‌گه‌رێ کوشتنا سوریلانک د مالبچووکی دا، لێ ژبه‌ر ئه‌گه‌رێن ساخله‌می ئافره‌ت نه‌چاردبیت ده‌رمانێن خوه‌ وه‌ربگریت، هه‌روه‌کی هه‌بوونا نه‌خوه‌شییێن دلی، خوونێ و گه‌له‌ک نه‌خوه‌شییێن دی.
نۆشدار د ده‌مێ دوگیانییێ دا شیره‌تان ل نه‌خوه‌شی دکه‌ن ب وه‌رگرتنا ده‌رمانێ فولێت، ده‌رمانه‌که‌ گرنگییه‌کا مه‌زن هه‌یه‌ د وه‌رارا خانه‌یان دا، و به‌روڤاژی هه‌می ده‌رمانێن دی سوریلانک د پارێزیت ژ که‌شه‌فرێتان.
دا کو کارتێکرنێن ده‌رمانان یێن نێگه‌تیڤ لسه‌ر سوریلانک بهێنه‌ کێمکرن، باشتر ئه‌وه‌ کو نه‌خوه‌ش سه‌ره‌دانا نۆشدارێ خوه‌ یێ تایبه‌ت بکه‌ت ژبۆ گوهۆرینا جورێ ده‌رمانی ژبۆ جوره‌کێ دی یێ کو کارتێکرنه‌که‌کا سڤک لسه‌ر گه‌شه‌یا سوریلانک هه‌بیت و نه‌ بیته‌ ئه‌گه‌رێ په‌یدابوونا که‌شه‌فرێتان، یان ژی نۆشدار لدووڤ بارێ نه‌خوه‌شی دشێت ده‌رمانێ ب راوه‌ستینیت ژبۆ ده‌مه‌کێ دوورتر ژ دوگیانییێ داکو بشێن سوریلانک ب پارێزین ژ کارتێکرنا ماده‌یێن ژه‌هرین یێن ده‌رمانان لسه‌ر وه‌رارا خانه‌یان.
یا باشتر ئه‌وه‌ کو ئافره‌تا دوگیان ب چ شێوه‌یان بزاڤێ نه‌که‌ت ده‌رمانان بخۆت بێی چاڤدێری و شیره‌تا نۆشدارێ تایبه‌ت، ب تایبه‌ت ده‌رمان و حه‌بکێن سه‌ر مێزه‌یان ” ئانکو ئه‌و ده‌رمانێن کو مرۆڤ دشێت ب ده‌ست خوه‌ڤه‌ بینیت ژ ده‌رمانخانه‌یان بێی کو مرۆڤ هه‌وجه‌ی ئیمزایا نۆشداری ببیت”، ژبه‌رکو گه‌له‌ک جاران خوارنا وان ده‌رمانان چ کارتێکرنێن نه‌رێ لسه‌ر ساخله‌مییا نه‌خوه‌شی نابیت، لێ د کۆژه‌رن ژبۆ گه‌شه‌یا سوریلانک.

بابه‌تێن ب ڤێ مژارێ ڤه‌ گرێدای