ژێكڤه‌بوون د قۆناغا ده‌زگریێ‌ دا و كاریگه‌ریێن لدووڤڕا دهێن

ژێكڤه‌بوون د قۆناغا ده‌زگریێ‌ دا و كاریگه‌ریێن لدووڤڕا دهێن

Capture

وار – سامی رێكانی :

دهێته‌ گۆتن دیارده‌یا هێلانا كچێ‌ د قۆناغا ده‌زگریێ‌ دا، به‌ربه‌لاڤدبیت و ئاڕێشه‌یێن مه‌زن لپشتخوه‌ دهێلیت و دبیته‌ سه‌ده‌ما ناكۆكییان د ناڤبه‌را دو خێزانان دا و به‌ختێ‌ كچان ژی دهێته‌ ره‌شكرن و كه‌سایه‌تییا خوه‌ ژده‌ستدده‌ت د جڤاكی دا. هه‌روه‌سا باندۆر لسه‌ر كوڕی ژی دهێته‌كرن و بێباوه‌ر دبیت د ناڤ خه‌لكی دا و تایبه‌تی لده‌ف كچان كو د چاڤێن وان دا دهێته‌ شكاندن. لدۆر ڤی بابه‌تی؛ مه‌ ئه‌ڤ راپۆرته‌ به‌رهه‌ڤكرییه‌.

مووسا جه‌عفه‌ر وه‌كو گه‌نجه‌ك دبێژیت: ”ئه‌ڤ دیارده‌ د ناڤا جڤاكی دا به‌ربه‌لاڤدبیت و روویه‌كێ‌ نه‌شارستانی په‌یداكرییه‌ و باوه‌ری ژی د ناڤبه‌را كوڕ و كچان دا كه‌ڤتییه‌ د گومانێ‌ دا، سه‌ده‌ما وێ‌ ژی بۆ وێ ئێكێ ڤه‌دگه‌ریت كو ده‌ما كوڕ بۆ هه‌ڤژینیێ‌ په‌یوه‌ندییان دگه‌ل كچه‌كی گرێدده‌ت نه‌ لسه‌ر بنه‌مایێ‌ باوه‌ریێ‌ و به‌رێخوه‌دانا پاشه‌رۆژێیه‌، به‌لكو لسه‌ر بنه‌مایێ‌ جوانى‌ و زه‌نگینیێ‌ و به‌ژنبلندییا كچێیه‌ و ئه‌ڤینه‌كا دۆمدرێژ دگه‌ل ناكه‌ت و ده‌روونێ‌ وێ‌ ناخوینیت كا ئه‌رێ‌ تا چ رادده‌ ئه‌ڤ كچه‌ دێ‌ خوه‌ لبه‌ر كاودانێن وی یێن كه‌سی و ئابووری گریت و دێ‌ شوو ب كه‌سایه‌تیبا وی كه‌ت، نه‌كو ب به‌ژن و مالێ‌ وی، هه‌ر زوو دێ‌ چیت وێ‌ كچێ‌ خوازیت و ده‌مێ‌ دهێته‌ نیشانكرن؛ ژنوو كچ دێ‌ داخوازیێن گران ژێ‌ كه‌ت و وی ژی ئه‌و شیان نینن بۆ بجهبینیت، له‌و نه‌چاردبیت په‌نایێ ببه‌ته‌ به‌ر هێلانا وێ‌ و ژێكڤه‌دبن و هنده‌ك جاران ژی كه‌سێن ده‌وروبه‌رێن وان هه‌ردویان بزاڤا په‌یداكرنا ناكۆكییان د ناڤبه‌را وان دا دكه‌ن و كێماسیێن وان بۆ خێزانێن وان دبێژن”.
شیلان محه‌مه‌د سالح چالاك د بوارێ‌ ژنان دا دبێژیت: ”سه‌ده‌ما ڤێ‌ دیارده‌یێ‌ ژهه‌ردو ره‌گه‌زانه‌، ده‌ما كچ ب رێیا تێله‌فۆنێ‌ بۆ خوه‌ هه‌ڤژینه‌كی هه‌لدبژێریت یان به‌روڤاژی، دێ‌ ئه‌نجامێن وێ‌ هێلان یان لێڤه‌بوون بیت، ئه‌ز نابینم كو ئه‌ڤینی ب ڤی ره‌نگی بیت، به‌ری هه‌ر تشته‌كی چو كوڕ بیت یان كچ، دڤێت كه‌سایه‌تییا هه‌ڤدو بخوینن، پاشان ده‌رگه‌هێ‌ ئه‌ڤینیێ‌ ڤه‌كه‌ن و تاكو هه‌ڤژینیێ‌ پێكبینن. كچ ب تنێ به‌رێ‌ خوه‌ دده‌نه‌ جوانی و مالێ‌ كوڕی، ئانكو ناسه‌كحه‌نه‌ ره‌وشت و شیانێن وی كا دی چاوا شێت وێ‌ ب سه‌رفه‌رازی و بێ‌ ئاڕێشه‌ ب خودانكه‌ت. ئه‌ڤرۆ كچ ژی گوهـ ل شیره‌تێن دایباب و هه‌ڤالێن خوه‌ ناكه‌ن، ب ته‌نا سه‌رێ‌ خوه‌نه‌ هه‌تا ئاڕێشه‌ په‌یدادبیت، ژنوو هشێن وان دهێنه‌ سه‌ری، لێ په‌شێمانی چو مفایه‌كی ناگه‌هیننێ،‌ له‌و دڤێت به‌ری هه‌ر تشته‌كی كچ پرسیارا كوڕی و خێزانا وی بكه‌ت كا دێ‌ تا چ رادده‌ دگه‌ل گونجینیت، هه‌روه‌سا د ده‌مێ‌ خواستن و نیشانكرنا وێ‌ ژی دڤێت بارێ‌ كوڕی گران نه‌كه‌ت كو گه‌له‌ك زێرا ژێ‌ نه‌خوازیت، ژبه‌ر بارێ‌ ئابووریێ‌ خه‌لكی گه‌له‌كێ لاوازه‌، ده‌ما كوڕ داخوازیێن وێ‌ بجهنه‌ئینیت، نه‌چاردبیت د قۆناغا ده‌زگریێ‌ دا وى بهێلیت و به‌ختێ‌ وێ‌ ژی دهێته‌ ره‌شكرن، ژبه‌ركو زوو ب زوو ئه‌ڤ كچه‌ شووناكه‌ت و دێ‌ د چاڤێن خه‌لكی دا كێمبیت، له‌و بلا كچ زوو بڕیارێ‌ لسه‌ر شووكرنا خوه‌ نه‌ده‌ن و كه‌سایه‌تییا خوه‌ ژده‌ستنه‌ده‌ن”.
یووسف محه‌مه‌د حه‌مۆ وه‌كو جڤاكناسه‌ك دبێژیت: ”ئه‌ز ڤێ‌ دیارده‌یێ‌ بۆ چه‌ند خاله‌كان ڤه‌دگه‌رینم كو نه‌بوونا ڤیانه‌كا راست و دروسته‌ د ناڤبه‌را وان دا، هه‌روه‌سا پشتی خواستنێ‌ ناكۆكی یێن خێزانێن وان ژی دبنه‌ سه‌ده‌مێن ژێكڤه‌بوونێ‌ و هه‌بوونا دودلی و دلسارییا هه‌لبژارتنا هه‌ڤژینیێ،‌ نه‌خاسمه‌ ژئالیێ‌ خێزانا كوڕی ڤه‌ و بێسه‌روبه‌رییا بارێ‌ ئابووریێ كوڕی ڤه‌ و گه‌له‌ك جاران ژی كوڕ حه‌زا خوه‌ دئێخیته‌ سه‌ر كچه‌كا دی و ئه‌و لبه‌ر ره‌شدبیت و یا ژ هه‌موویان گرنكتر نه‌بوونا باوه‌ری بخوه‌بوونێ‌ لده‌ف كوڕییه‌ كو به‌رپرسیاریه‌تییا خێزانێ‌ هه‌لبگریت و پاشی نه‌خوه‌شییه‌كا ده‌روونی ل نك په‌یدادبیت و دێ‌ هه‌جه‌ته‌كێ هه‌لێخیت و ده‌ست ژ ده‌زگرا خوه‌ به‌رده‌ت”.

بابه‌تێن ب ڤێ مژارێ ڤه‌ گرێدای